Halieutica

Oppian

Oppian. Halieutica. Mair, A. W., editor. London, William Heinemann, Ltd.; New York: G.P. Putnam's Sons. 1928.

  1. ἱέμενοι πύργων τε καὶ ἄστεος ἔνδον ἱκέσθαι,
  2. ἔντεα συλήσαντες ἀρηϊφάτων ἀπὸ νεκρῶν
  3. αὐτοὶ θωρήξαντο καὶ ἔδραμον ἄγχι πυλάων·
  4. οἱ δʼ ὥστε σφετέροισιν ἐπειγομένοις πολιήταις
  5. ἀγκλίνουσι θύρετρα καὶ οὐ γήθησαν ἑταίροις·
  6. ὣς ἄρα καὶ ξιφίην ἴκελον δέμας ἤπαφε νηῶν.
  7. καὶ μὲν δὴ σκολιῇσιν ἐν ἀγκοίνῃσι λίνοιο
  8. κυκλωθεὶς ξιφίης μέγα νήπιος ἀφροσύνῃσιν
  9. ὄλλυται, ὃς θρώσκει μὲν ὑπεκδῦναι μενεαίνων,
  10. ἐγγύθι δὲ τρομέων πλεκτὸν δόλον αὖτις ὀπίσσω
  11. χάζεται· οὐδέ οἱ ὅπλον ἐνὶ φρεσίν, οἷον ἄρηρεν
  12. ἐκ γενύων, δειλὸς δὲ μένει κεκαφηότι θυμῷ,
  13. ὄφρα μιν ἐξερύσωσιν ἐπʼ ᾐόνας· ἔνθα δὲ δούροις
  14. ἄνδρες ἐπασσυτέροισι καταΐγδην ἐλόωντες
  15. κρᾶτα συνηλοίησαν, ὁ δʼ ὄλλυται ἄφρονι πότμῳ.
  16. ἀφροσύνη καὶ σκόμβρον ἕλεν καὶ πίονα θύννον
  17. καὶ ῥαφίδας καὶ φῦλα πολυσπερέων συνοδόντων.
  18. σκόμβροι μὲν λεύσσοντες ἐν ἕρκεϊ πεπτηῶτας
  19. ἄλλους ἠράσσαντο λίνου πολύωπον ὄλεθρον
  20. ἐσδῦναι· τοίη τις ἐσέρχεται εἰσορόωντας