Batrachomyomachia

Batrachomyomachia. Homeri Opera, Volume 5. Allen, Thomas W., editor. Oxford: Clarendon, 1912.

σείοντες λόγχας, θυμοῦ δʼ ἔμπλητο ἕκαστος.

Ζεὺς δὲ θεοὺς καλέσας εἰς οὐρανὸν ἀστερόεντα,

καὶ πολέμου πληθὺν δείξας κρατερούς τε μαχητάς,

πολλοὺς καὶ μεγάλους ἠδʼ ἔγχεα μακρὰ φέροντας,

οἷος Κενταύρων στρατὸς ἔρχεται ἠὲ Γιγάντων,

ἡδὺ γελῶν ἐρέεινε· τίνες βατράχοισιν ἀρωγοὶ

ἢ μυσὶν ἀθανάτων; καὶ Ἀθηναίην προσέειπεν·

Ὦ θύγατερ μυσὶν ἦ ῥα βοηθήσουσα πορεύσῃ;

καὶ γὰρ σοῦ κατὰ νηὸν ἀεὶ σκιρτῶσιν ἅπαντες

κνίσῃ τερπόμενοι καὶ ἐδέσμασι παντοδαποῖσιν.

Ὣς ἄρʼ ἔφη Κρονίδης· τὸν δὲ προσέειπεν Ἀθήνη·

ὦ πάτερ οὐκ ἄν πώ ποτʼ ἐγὼ μυσὶ τειρομένοισιν