Proverbia
Septuaginta
Septuaginta. The Old Testament in Greek According to the Septuagint. Volume 2: I Chronicles-Tobit. Swete, Henry Barclay, editor. Cambridge: Cambridge University Press, 1896.
- μυκτηρίζει πολίτας ἐνδεὴς φρενῶν,
- ἀνὴρ δὲ φρόνιμος ἡσυχίαν ἄγει.
- ἀνὴρ δίγλωσσος ἀποκαλύπτει βουλὰς ἐν συνεδρίῳ,
- πιστὸς δὲ πνοῇ κρύπτει πράγματα.
- οἷς μὴ ὑπάρχει κυβέρνησις, πίπτουσιν ὥσπερ φύλλα,
- σωτηρία δὲ ὑπάρχει ἐν πολλῇ βουλῇ.
- πονηρὸς κακοποιεῖ ὅταν συνμίξῃ δικαίῳ,
- μισεῖ δὲ ἦχον ἀσφαλείας.
- γυνὴ εὐχάριστος ἐγείρει ἀνδρὶ δόξαν,
- θρόνος δὲ ἀτιμίας γυνὴ μισοῦσα δίκαια.
- πλούτου ὀκνηροὶ ἐνδεεῖς γίνονται,
- οἱ δὲ ἀνδρεῖοι ἐρείδονται πλούτῳ.
- τῇ ψυχῇ αὐτοῦ ἀγαθὸν ποιεῖ ἀνὴρ ἐλεήμων,
- ἐξολλύει δὲ αὐτοῦ σῶμα ὁ ἀνελεήμων.
- ἀσεβὴς ποιεῖ ἔργα ἄδικα,
- σπέρμα δὲ δικαίων μισθὸς ἀληθείας.
- υἱὸς δίκαιος γεννᾶται εἰς ζωήν,
- διωγμὸς δὲ ἀσεβοῦς εἰς θάνατον.
- βδέλυγμα Κυρίῳ διεστραμμέναι ὁδοί,
- προσδεκτοὶ δὲ αὐτῷ πάντες ἄμωμοι ἐν ταῖς ὁδοῖς αὐτῶν.
438
[*](B)- χειρὶ χεῖρας ἐμβαλὼν ἀδίκως οὐκ ἀτιμώρητος ἔσται,
- ὁ δὲ σπείρων δικαιοσύνην λήμψεται μισθὸν πιστόν.
- ὥσπερ ἐνώτιον ἐν ῥινὶ ὑός,
- οὕτως γυναικὶ κακόφρονι κάλλος.
- ἐπιθυμία δικαίων πᾶσα ἀγαθή,
- ἐλπὶς δὲ ἀσεβῶν ἀπολεῖται.
- εἰσὶν οἳ τὰ ἴδια σπείροντες πλείονα ποιοῦσιν·
- εἰσὶν καὶ οἳ συνάγοντες ἐλαττονοῦνται.
- ψυχὴ εὐλογουμένη πᾶσα ἁπλῆ,
- ἀνὴρ δὲ θυμώδης οὐκ εὐσχήμων.
- ὁ συνέχων σῖτον, ὑπολίποιτο αὐτὸν τοῖς ἔθνεσιν·
- εὐλογία δὲ εἰς κεφαλὴν τοῦ μεταδιδόντος.
- τεκταινόμενος ἀγαθὰ ζητεῖ χάριν ἀγαθήν,
- ἐκζητοῦντα δὲ κακὰ καταλήμψεται αὐτόν.
- ὁ πεποιθὼς ἐπὶ πλούτῳ, οὗτος πεσεῖται,
- ὁ δὲ ἀντιλαμβανόμενος δικαίων, οὗτος ἀνατελεῖ.
- ὁ μὴ συνπεριφερόμενος τῷ ἑαυτοῦ οἴκῳ κληρονομήσει ἄνεμον,
- δουλεύσει δὲ ἄφρων φρονίμῳ.
- ἐκ καρποῦ δικαιοσύνης φύεται δένδρον ζωῆς,
- ἀφαιροῦνται δὲ ἄωροι ψυχαὶ παρανόμαων.
- εἰ ὁ μὲν δίκαιος μόλις σώζεται, ὁ ἀσεβὴς καὶ ἁμαρτωλὸς ποῦ
- φανεῖται;