Epitaphius Bios

Moschus

Moschus. The Greek Bucolic Poets. Edmonds, J. M., editor. London: William Heinemann, Ltd.; New York: G. P. Putnam's Sons, 1916.

  1. τοῦτο, Μέλη, νέον ἄλγος. ἀπώλετο πρᾶν τοι Ὅμηρος,
  2. τῆνο τὸ Καλλιόπας γλυκερὸν στόμα, καί σε λέγοντι
  3. μύρασθαι καλὸν υἷα πολυκλαύτοισι ῥεέθροις,
  4. πᾶσαν δ’ ἔπλησας φωνᾶς ἅλα· νῦν πάλιν ἄλλον
  5. υἱέα δακρύεις, καινῷ δ’ ἐπὶ πένθεϊ τάκῃ.
  6. ἀμφότεροι παγαῖς πεφιλημένοι, ὃς μὲν ἔπινε
  7. Παγασίδος κράνας, ὃ δ’ ἔχεν πόμα τᾶς Ἀρεθοίσας.
  8. χὢ μὲν Τυνδαρέοιο καλὰν ἄεισε θύγατρα
  9. καὶ Θέτιδος μέγαν υἷα καὶ Ἀτρείδαν Μενέλαον·
  10. τῆνος δ’ οὐ πολέμους, οὐ δάκρυα, Πᾶνα δ’ ἔμελπε,
  11. καὶ βούτας ἐλίγαινε καὶ ἀείδων ἐνόμευε,
  12. καὶ σύριγγας ἔτευχε καὶ ἁδέα πόρτιν ἄμελγε,
  13. καὶ παίδων ἐδίδασκε φιλήματα, καὶ τὸν Ἔρωτα
  14. ἔτρεφεν ἐν κόλποισι καὶ ἤρεθε τὰν Ἀφροδίταν.
  15. ἄρχετε Σικελικαὶ τῶ πένθεος ἄρχετε Μοῖσαι.
  16. πᾶσα Βίων θρηνεῖ σε κλυτὰ πόλις, ἄστεα πάντα.
  17. Ἄσκρα μὲν γοάει σε πολὺ πλέον Ἡσιόδοιο·
  18. Πίνδαρον οὐ ποθέοντι τόσον Βοιωτίδες ὗλαι·
  19. οὐ τόσον Ἀλκαίῳ περιμύρατο Λέσβος ἐραννά·
  20. οὐδὲ τόσον ὃν ἀοιδὸν ὀδύρατο Τήϊον ἄστυ·
  21. σὲ πλέον Ἀρχιλόχοιο ποθεῖ Πάρος· ἀντὶ δὲ Σαπφῶς
  22. εἰσέτι σεῦ τὸ μέλισμα κινύρεται ἁ Μιτυλάνα.
  23. εἶ δὲ Συρακοσίοισι Θεόκριτος· αὐτὰρ ἐγώ τοι
  24. Αὐσονικᾶς ὀδύνας μέλπω μέλος, οὐ ξένος ᾠδᾶς
  25. βουκολικᾶς, ἀλλ’ ἅντε διδάξαο σεῖο μαθητὰς
  26. κλαρονόμος Μοίσας τᾶς Δωρίδος, ᾇ με γεραίρων
  27. ἄλλοις μὲν τεὸν ὄλβον, ἐμοὶ δ’ ἀπέλειπες ἀοιδάν.
  28. ἄρχετε Σικελικαὶ τῶ πένθεος ἄρχετε Μοῖσαι.
  29. αἰαῖ ταὶ μαλάχαι μέν, ἐπὰν κατὰ κᾶπον ὄλωνται,
  30. ἠδὲ τὰ χλωρὰ σέλινα τό τ’ εὐθαλὲς οὖλον ἄνηθον,
  31. ὕστερον αὖ ζώοντι καὶ εἰς ἔτος ἄλλο φύοντι·
  32. ἄμμες δ’ οἱ μεγάλοι καὶ καρτεροί, οἱ σοφοὶ ἄνδρες,
  33. ὁππότε πρᾶτα θάνωμες, ἀνάκοοι ἐν χθονὶ κοίλᾳ
  34. εὕδομες εὖ μάλα μακρὸν ἀτέρμονα νήγρετον ὕπνον.
  35. καὶ σὺ μὲν ὦν σιγᾷ πεπυκασμένος ἔσσεαι ἐν γᾷ,
  36. ταῖς Νύμφαισι δ’ ἔδοξεν ἀεὶ τὸν βάτραχον ᾅδειν.
  37. ταῖς δ’ ἐγὼ οὐ φθονέοιμι· τὸ γὰρ μέλος οὐ καλὸν ᾅδει.
  38. ἄρχετε Σικελικαὶ τῶ πένθεος ἄρχετε Μοῖσαι.
  39. φάρμακον ἦλθε, Βίων, ποτὶ σὸν στόμα, φάρμακον ἦδες—
  40. τοιούτοις χείλεσσι ποτέδραμε κοὐκ ἐγλυκάνθη;
  41. τίς δὲ βροτὸς τοσσοῦτον ἀνάμερος ὡς κεράσαι τοι
  42. ἢ δοῦναι καλέοντι τὸ φάρμακον;—ἔκψυγεν ᾠδά.
  43. ἄρχετε Σικελικαὶ τῶ πένθεος ἄρχετε Μοῖσαι.
  44. ἀλλὰ Δίκα κίχε πάντας. ἐγὼ δ’ ἐπὶ πένθεϊ τῷδε
  45. δακρυχέων τεὸν οἶτον ὀδύρομαι. εἰ δυνάμαν δέ,
  46. ὡς Ὀρφεὺς καταβὰς ποτὶ Τάρταρον, ὥς ποκ’ Ὀδυσσεύς,
  47. ὡς πάρος Ἀλκείδας, κἠγὼ τάχ’ ἂν ἐς δόμον ἦνθον
  48. Πλουτέος, ὥς κεν ἴδοιμι, καὶ εἰ Πλουτῆι μελίσδεις,
  49. ὡς ἂν ἀκουσαίμαν, τί μελίσδεαι. ἀλλ’ ἄγε Κώρᾳ
  50. Σικελικόν τι λίγαινε και ἁδύ τι βουκολιάζευ.
  51. καὶ κείνα Σικελά, καὶ ἐν Αἰτναίαισιν ἔπαιζεν
  52. ᾀόσι, καὶ μέλος οἶδε τὸ Δώριον· οὐκ ἀγέραστος
  53. ἐσσεῖθ’ ἁ μολπά. χὠς Ὀρφέϊ πρόσθεν ἔδωκεν
  54. ἁδέα φορμίζοντι παλίσσυτον Εὐρυδίκειαν,
  55. καὶ σὲ Βίων πέμψει τοῖς ὤρεσιν. εἰ δέ τι κἠγὼν
  56. συρίσδων δυνάμαν, παρὰ Πλουτέϊ κ’ αὐτὸς ἄειδον.