Frogs

Aristophanes

Aristophanes. Aristophanis Comoediae, Vol. 2. Hall, F. W. and Geldart, William M., editors. Oxford: Clarendon Press, 1907.

  1. καὶ δὴ χρὴ λέγειν.
Εὐριπίδης
  1. Αἴγυπτος, ὡς ὁ πλεῖστος ἔσπαρται λόγος,
  2. ξὺν παισὶ πεντήκοντα ναυτίλῳ πλάτῃ
  3. Ἄργος κατασχών—
Αἰσχύλος
  1. ληκύθιον ἀπώλεσεν.
Διόνυσος
  1. τουτὶ τί ἦν τὸ ληκύθιον; οὐ κλαύσεται;
  2. λέγʼ ἕτερον αὐτῷ πρόλογον, ἵνα καὶ γνῶ πάλιν.
Εὐριπίδης
  1. Διόνυσος, ὃς θύρσοισι καὶ νεβρῶν δοραῖς
  2. καθαπτὸς ἐν πεύκαισι Παρνασσὸν κάτα
  3. πηδᾷ χορεύων—
Αἰσχύλος
  1. ληκύθιον ἀπώλεσεν.
Διόνυσος
  1. οἴμοι πεπλήγμεθʼ αὖθις ὑπὸ τῆς ληκύθου.
Εὐριπίδης
  1. ἀλλʼ οὐδὲν ἔσται πρᾶγμα· πρὸς γὰρ τουτονὶ
  2. τὸν πρόλογον οὐχ ἕξει προσάψαι λήκυθον.
  3. οὐκ ἔστιν ὅστις πάντʼ ἀνὴρ εὐδαιμονεῖ·
  4. ἢ γὰρ πεφυκὼς ἐσθλὸς οὐκ ἔχει βίον,
  5. ἢ δυσγενὴς ὤν—
Αἰσχύλος
  1. ληκύθιον ἀπώλεσεν.
Διόνυσος
  1. Εὐριπίδη—
Εὐριπίδης
  1. τί ἔσθʼ;
Διόνυσος
  1. ὑφέσθαι μοι δοκεῖ·
  2. τὸ ληκύθιον γὰρ τοῦτο πνευσεῖται πολύ.
Εὐριπίδης
  1. οὐδʼ ἂν μὰ τὴν Δήμητρα φροντίσαιμί γε·
  2. νυνὶ γὰρ αὐτοῦ τοῦτό γʼ ἐκκεκόψεται.
Διόνυσος
  1. ἴθι δὴ λέγʼ ἕτερον κἀπέχου τῆς ληκύθου.
Εὐριπίδης
  1. Σιδώνιόν ποτʼ ἄστυ Κάδμος ἐκλιπὼν
  2. Ἀγήνορος παῖς—