Odyssey

Homer

Homer. The Odyssey, Volume 1-2. Murray, A. T. (Augustus Taber), editor. London: William Heinmann; New York: G.P. Putnam's Sons, 1919.

  1. μή με, Ποσείδαον γαιήοχε, ταῦτα κέλευε·
  2. δειλαί τοι δειλῶν γε καὶ ἐγγύαι ἐγγυάασθαι.
  3. πῶς ἂν ἐγώ σε δέοιμι μετʼ ἀθανάτοισι θεοῖσιν,
  4. εἴ κεν Ἄρης οἴχοιτο χρέος καὶ δεσμὸν ἀλύξας;
  5. τὸν δʼ αὖτε προσέειπε Ποσειδάων ἐνοσίχθων·
  6. Ἥφαιστʼ, εἴ περ γάρ κεν Ἄρης χρεῖος ὑπαλύξας
  7. οἴχηται φεύγων, αὐτός τοι ἐγὼ τάδε τίσω.
  8. τὸν δʼ ἠμείβετʼ ἔπειτα περικλυτὸς ἀμφιγυήεις·
  9. οὐκ ἔστʼ οὐδὲ ἔοικε τεὸν ἔπος ἀρνήσασθαι.
  10. ὣς εἰπὼν δεσμὸν ἀνίει μένος Ἡφαίστοιο.
  11. τὼ δʼ ἐπεὶ ἐκ δεσμοῖο λύθεν, κρατεροῦ περ ἐόντος,
  12. αὐτίκʼ ἀναΐξαντε ὁ μὲν Θρῄκηνδε βεβήκει,
  13. ἡ δʼ ἄρα Κύπρον ἵκανε φιλομμειδὴς Ἀφροδίτη,
  14. ἐς Πάφον· ἔνθα δέ οἱ τέμενος βωμός τε θυήεις.
  15. ἔνθα δέ μιν Χάριτες λοῦσαν καὶ χρῖσαν ἐλαίῳ
  16. ἀμβρότῳ, οἷα θεοὺς ἐπενήνοθεν αἰὲν ἐόντας,
  17. ἀμφὶ δὲ εἵματα ἕσσαν ἐπήρατα, θαῦμα ἰδέσθαι.
  18. ταῦτʼ ἄρʼ ἀοιδὸς ἄειδε περικλυτός· αὐτὰρ Ὀδυσσεὺς
  19. τέρπετʼ ἐνὶ φρεσὶν ᾗσιν ἀκούων ἠδὲ καὶ ἄλλοι
  20. Φαίηκες δολιχήρετμοι, ναυσίκλυτοι ἄνδρες.
  21. Ἀλκίνοος δʼ Ἅλιον καὶ Λαοδάμαντα κέλευσεν
  22. μουνὰξ ὀρχήσασθαι, ἐπεί σφισιν οὔ τις ἔριζεν.
  23. οἱ δʼ ἐπεὶ οὖν σφαῖραν καλὴν μετὰ χερσὶν ἕλοντο,
  24. πορφυρέην, τήν σφιν Πόλυβος ποίησε δαΐφρων,
  25. τὴν ἕτερος ῥίπτασκε ποτὶ νέφεα σκιόεντα
  26. ἰδνωθεὶς ὀπίσω, ὁ δʼ ἀπὸ χθονὸς ὑψόσʼ ἀερθεὶς
  27. ῥηιδίως μεθέλεσκε, πάρος ποσὶν οὖδας ἱκέσθαι.
  28. αὐτὰρ ἐπεὶ δὴ σφαίρῃ ἀνʼ ἰθὺν πειρήσαντο,
  29. ὠρχείσθην δὴ ἔπειτα ποτὶ χθονὶ πουλυβοτείρῃ
  30. ταρφέʼ ἀμειβομένω· κοῦροι δʼ ἐπελήκεον ἄλλοι
  31. ἑστεῶτες κατʼ ἀγῶνα, πολὺς δʼ ὑπὸ κόμπος ὀρώρει.
  32. δὴ τότʼ ἄρʼ Ἀλκίνοον προσεφώνεε δῖος Ὀδυσσεύς·
  33. Ἀλκίνοε κρεῖον, πάντων ἀριδείκετε λαῶν,
  34. ἠμὲν ἀπείλησας βητάρμονας εἶναι ἀρίστους,
  35. ἠδʼ ἄρʼ ἑτοῖμα τέτυκτο· σέβας μʼ ἔχει εἰσορόωντα.
  36. ὣς φάτο, γήθησεν δʼ ἱερὸν μένος Ἀλκινόοιο,
  37. αἶψα δὲ Φαιήκεσσι φιληρέτμοισι μετηύδα·
  38. κέκλυτε, Φαιήκων ἡγήτορες ἠδὲ μέδοντες.
  39. ὁ ξεῖνος μάλα μοι δοκέει πεπνυμένος εἶναι.
  40. ἀλλʼ ἄγε οἱ δῶμεν ξεινήιον, ὡς ἐπιεικές.
  41. δώδεκα γὰρ κατὰ δῆμον ἀριπρεπέες βασιλῆες
  42. ἀρχοὶ κραίνουσι, τρισκαιδέκατος δʼ ἐγὼ αὐτός·
  43. τῶν οἱ ἕκαστος φᾶρος ἐυπλυνὲς ἠδὲ χιτῶνα
  44. καὶ χρυσοῖο τάλαντον ἐνείκατε τιμήεντος.
  45. αἶψα δὲ πάντα φέρωμεν ἀολλέα, ὄφρʼ ἐνὶ χερσὶν
  46. ξεῖνος ἔχων ἐπὶ δόρπον ἴῃ χαίρων ἐνὶ θυμῷ.
  47. Εὐρύαλος δέ ἑ αὐτὸν ἀρεσσάσθω ἐπέεσσι
  48. καὶ δώρῳ, ἐπεὶ οὔ τι ἔπος κατὰ μοῖραν ἔειπεν.
  49. ὣς ἔφαθʼ, οἱ δʼ ἄρα πάντες ἐπῄνεον ἠδʼ ἐκέλευον,
  50. δῶρα δʼ ἄρʼ οἰσέμεναι πρόεσαν κήρυκα ἕκαστος.
  51. τὸν δʼ αὖτʼ Εὐρύαλος ἀπαμείβετο φώνησέν τε·
  52. Ἀλκίνοε κρεῖον, πάντων ἀριδείκετε λαῶν,
  53. τοιγὰρ ἐγὼ τὸν ξεῖνον ἀρέσσομαι, ὡς σὺ κελεύεις.
  54. δώσω οἱ τόδʼ ἄορ παγχάλκεον, ᾧ ἔπι κώπη
  55. ἀργυρέη, κολεὸν δὲ νεοπρίστου ἐλέφαντος
  56. ἀμφιδεδίνηται· πολέος δέ οἱ ἄξιον ἔσται.
  57. ὣς εἰπὼν ἐν χερσὶ τίθει ξίφος ἀργυρόηλον
  58. καί μιν φωνήσας ἔπεα πτερόεντα προσηύδα·
  59. χαῖρε, πάτερ ὦ ξεῖνε· ἔπος δʼ εἴ πέρ τι βέβακται
  60. δεινόν, ἄφαρ τὸ φέροιεν ἀναρπάξασαι ἄελλαι.
  61. σοὶ δὲ θεοὶ ἄλοχόν τʼ ἰδέειν καὶ πατρίδʼ ἱκέσθαι
  62. δοῖεν, ἐπεὶ δὴ δηθὰ φίλων ἄπο πήματα πάσχεις.
  63. τὸν δʼ ἀπαμειβόμενος προσέφη πολύμητις Ὀδυσσεύς·
  64. καὶ σὺ φίλος μάλα χαῖρε, θεοὶ δέ τοι ὄλβια δοῖεν.
  65. μηδέ τι τοι ξίφεός γε ποθὴ μετόπισθε γένοιτο
  66. τούτου, ὃ δή μοι δῶκας ἀρεσσάμενος ἐπέεσσιν.
  67. ἦ ῥα καὶ ἀμφʼ ὤμοισι θέτο ξίφος ἀργυρόηλον.
  68. δύσετό τʼ ἠέλιος, καὶ τῷ κλυτὰ δῶρα παρῆεν.
  69. καὶ τά γʼ ἐς Ἀλκινόοιο φέρον κήρυκες ἀγαυοί·
  70. δεξάμενοι δʼ ἄρα παῖδες ἀμύμονος Ἀλκινόοιο
  71. μητρὶ παρʼ αἰδοίῃ ἔθεσαν περικαλλέα δῶρα.
  72. τοῖσιν δʼ ἡγεμόνευʼ ἱερὸν μένος Ἀλκινόοιο,
  73. ἐλθόντες δὲ καθῖζον ἐν ὑψηλοῖσι θρόνοισι.
  74. δή ῥα τότʼ Ἀρήτην προσέφη μένος Ἀλκινόοιο·
  75. δεῦρο, γύναι, φέρε χηλὸν ἀριπρεπέʼ, ἥ τις ἀρίστη·
  76. ἐν δʼ αὐτὴ θὲς φᾶρος ἐυπλυνὲς ἠδὲ χιτῶνα.
  77. ἀμφὶ δέ οἱ πυρὶ χαλκὸν ἰήνατε, θέρμετε δʼ ὕδωρ,
  78. ὄφρα λοεσσάμενός τε ἰδών τʼ ἐὺ κείμενα πάντα
  79. δῶρα, τά οἱ Φαίηκες ἀμύμονες ἐνθάδʼ ἔνεικαν,
  80. δαιτί τε τέρπηται καὶ ἀοιδῆς ὕμνον ἀκούων.
  81. καί οἱ ἐγὼ τόδʼ ἄλεισον ἐμὸν περικαλλὲς ὀπάσσω,
  82. χρύσεον, ὄφρʼ ἐμέθεν μεμνημένος ἤματα πάντα
  83. σπένδῃ ἐνὶ μεγάρῳ Διί τʼ ἄλλοισίν τε θεοῖσιν.
  84. ὣς ἔφατʼ, Ἀρήτη δὲ μετὰ δμῳῇσιν ἔειπεν
  85. ἀμφὶ πυρὶ στῆσαι τρίποδα μέγαν ὅττι τάχιστα.
  86. αἱ δὲ λοετροχόον τρίποδʼ ἵστασαν ἐν πυρὶ κηλέῳ,
  87. ἔν δʼ ἄρʼ ὕδωρ ἔχεαν, ὑπὸ δὲ ξύλα δαῖον ἑλοῦσαι.
  88. γάστρην μὲν τρίποδος πῦρ ἄμφεπε, θέρμετο δʼ ὕδωρ·
  89. τόφρα δʼ ἄρʼ Ἀρήτη ξείνῳ περικαλλέα χηλὸν
  90. ἐξέφερεν θαλάμοιο, τίθει δʼ ἐνὶ κάλλιμα δῶρα,
  91. ἐσθῆτα χρυσόν τε, τά οἱ Φαίηκες ἔδωκαν·
  92. ἐν δʼ αὐτὴ φᾶρος θῆκεν καλόν τε χιτῶνα,
  93. καί μιν φωνήσασʼ ἔπεα πτερόεντα προσηύδα·
  94. αὐτὸς νῦν ἴδε πῶμα, θοῶς δʼ ἐπὶ δεσμὸν ἴηλον,
  95. μή τίς τοι καθʼ ὁδὸν δηλήσεται, ὁππότʼ ἂν αὖτε
  96. εὕδῃσθα γλυκὺν ὕπνον ἰὼν ἐν νηὶ μελαίνῃ.
  97. αὐτὰρ ἐπεὶ τό γʼ ἄκουσε πολύτλας δῖος Ὀδυσσεύς,
  98. αὐτίκʼ ἐπήρτυε πῶμα, θοῶς δʼ ἐπὶ δεσμὸν ἴηλεν
  99. ποικίλον, ὅν ποτέ μιν δέδαε φρεσὶ πότνια Κίρκη·
  100. αὐτόδιον δʼ ἄρα μιν ταμίη λούσασθαι ἀνώγει
  101. ἔς ῥʼ ἀσάμινθον βάνθʼ· ὁ δʼ ἄρ ἀσπασίως ἴδε θυμῷ
  102. θερμὰ λοέτρʼ, ἐπεὶ οὔ τι κομιζόμενός γε θάμιζεν,
  103. ἐπεὶ δὴ λίπε δῶμα Καλυψοῦς ἠυκόμοιο.
  104. τόφρα δέ οἱ κομιδή γε θεῷ ὣς ἔμπεδος ἦεν.
  105. τὸν δʼ ἐπεὶ οὖν δμῳαὶ λοῦσαν καὶ χρῖσαν ἐλαίῳ,
  106. ἀμφὶ δέ μιν χλαῖναν καλὴν βάλον ἠδὲ χιτῶνα,
  107. ἔκ ῥʼ ἀσαμίνθου βὰς ἄνδρας μέτα οἰνοποτῆρας
  108. ἤιε· Ναυσικάα δὲ θεῶν ἄπο κάλλος ἔχουσα
  109. στῆ ῥα παρὰ σταθμὸν τέγεος πύκα ποιητοῖο,
  110. θαύμαζεν δʼ Ὀδυσῆα ἐν ὀφθαλμοῖσιν ὁρῶσα,
  111. καί μιν φωνήσασʼ ἔπεα πτερόεντα προσηύδα·
  112. χαῖρε, ξεῖνʼ, ἵνα καί ποτʼ ἐὼν ἐν πατρίδι γαίῃ
  113. μνήσῃ ἐμεῦ, ὅτι μοι πρώτῃ ζωάγριʼ ὀφέλλεις.
  114. τὴν δʼ ἀπαμειβόμενος προσέφη πολύμητις Ὀδυσσεύς.
  115. Ναυσικάα θύγατερ μεγαλήτορος Ἀλκινόοιο,
  116. οὕτω νῦν Ζεὺς θείη, ἐρίγδουπος πόσις Ἥρης,
  117. οἴκαδέ τʼ ἐλθέμεναι καὶ νόστιμον ἦμαρ ἰδέσθαι·
  118. τῷ κέν τοι καὶ κεῖθι θεῷ ὣς εὐχετοῴμην
  119. αἰεὶ ἤματα πάντα· σὺ γάρ μʼ ἐβιώσαο, κούρη.
  120. ἦ ῥα καὶ ἐς θρόνον ἷζε παρʼ Ἀλκίνοον βασιλῆα·
  121. οἱ δʼ ἤδη μοίρας τʼ ἔνεμον κερόωντό τε οἶνον.
  122. κῆρυξ δʼ ἐγγύθεν ἦλθεν ἄγων ἐρίηρον ἀοιδόν,
  123. Δημόδοκον λαοῖσι τετιμένον· εἷσε δʼ ἄρʼ αὐτὸν
  124. μέσσῳ δαιτυμόνων, πρὸς κίονα μακρὸν ἐρείσας.
  125. δὴ τότε κήρυκα προσέφη πολύμητις Ὀδυσσεύς,
  126. νώτου ἀποπροταμών, ἐπὶ δὲ πλεῖον ἐλέλειπτο,
  127. ἀργιόδοντος ὑός, θαλερὴ δʼ ἦν ἀμφὶς ἀλοιφή·
  128. κῆρυξ, τῆ δή, τοῦτο πόρε κρέας, ὄφρα φάγῃσιν,
  129. Δημοδόκῳ· καί μιν προσπτύξομαι ἀχνύμενός περ·
  130. πᾶσι γὰρ ἀνθρώποισιν ἐπιχθονίοισιν ἀοιδοὶ
  131. τιμῆς ἔμμοροί εἰσι καὶ αἰδοῦς, οὕνεκʼ ἄρα σφέας
  132. οἴμας μοῦσʼ ἐδίδαξε, φίλησε δὲ φῦλον ἀοιδῶν.
  133. ὣς ἄρʼ ἔφη, κῆρυξ δὲ φέρων ἐν χερσὶν ἔθηκεν
  134. ἥρῳ Δημοδόκῳ· ὁ δʼ ἐδέξατο, χαῖρε δὲ θυμῷ.
  135. οἱ δʼ ἐπʼ ὀνείαθʼ ἑτοῖμα προκείμενα χεῖρας ἴαλλον.
  136. αὐτὰρ ἐπεὶ πόσιος καὶ ἐδητύος ἐξ ἔρον ἕντο,
  137. δὴ τότε Δημόδοκον προσέφη πολύμητις Ὀδυσσεύς·
  138. Δημόδοκʼ, ἔξοχα δή σε βροτῶν αἰνίζομʼ ἁπάντων.
  139. ἢ σέ γε μοῦσʼ ἐδίδαξε, Διὸς πάϊς, ἢ σέ γʼ Ἀπόλλων·
  140. λίην γὰρ κατὰ κόσμον Ἀχαιῶν οἶτον ἀείδεις,
  141. ὅσσʼ ἔρξαν τʼ ἔπαθόν τε καὶ ὅσσʼ ἐμόγησαν Ἀχαιοί,
  142. ὥς τέ που ἢ αὐτὸς παρεὼν ἢ ἄλλου ἀκούσας.
  143. ἀλλʼ ἄγε δὴ μετάβηθι καὶ ἵππου κόσμον ἄεισον
  144. δουρατέου, τὸν Ἐπειὸς ἐποίησεν σὺν Ἀθήνῃ,
  145. ὅν ποτʼ ἐς ἀκρόπολιν δόλον ἤγαγε δῖος Ὀδυσσεὺς
  146. ἀνδρῶν ἐμπλήσας οἵ ῥʼ Ἴλιον ἐξαλάπαξαν.
  147. αἴ κεν δή μοι ταῦτα κατὰ μοῖραν καταλέξῃς,
  148. αὐτίκʼ ἐγὼ πᾶσιν μυθήσομαι ἀνθρώποισιν,
  149. ὡς ἄρα τοι πρόφρων θεὸς ὤπασε θέσπιν ἀοιδήν.
  150. ὣς φάθʼ, ὁ δʼ ὁρμηθεὶς θεοῦ ἤρχετο, φαῖνε δʼ ἀοιδήν,
  151. ἔνθεν ἑλὼν ὡς οἱ μὲν ἐυσσέλμων ἐπὶ νηῶν
  152. βάντες ἀπέπλειον, πῦρ ἐν κλισίῃσι βαλόντες,
  153. Ἀργεῖοι, τοὶ δʼ ἤδη ἀγακλυτὸν ἀμφʼ Ὀδυσῆα
  154. ἥατʼ ἐνὶ Τρώων ἀγορῇ κεκαλυμμένοι ἵππῳ·
  155. αὐτοὶ γάρ μιν Τρῶες ἐς ἀκρόπολιν ἐρύσαντο.
  156. ὣς ὁ μὲν ἑστήκει, τοὶ δʼ ἄκριτα πόλλʼ ἀγόρευον
  157. ἥμενοι ἀμφʼ αὐτόν· τρίχα δέ σφισιν ἥνδανε βουλή,
  158. ἠὲ διαπλῆξαι κοῖλον δόρυ νηλέι χαλκῷ,
  159. ἢ κατὰ πετράων βαλέειν ἐρύσαντας ἐπʼ ἄκρης,
  160. ἢ ἐάαν μέγʼ ἄγαλμα θεῶν θελκτήριον εἶναι,
  161. τῇ περ δὴ καὶ ἔπειτα τελευτήσεσθαι ἔμελλεν·
  162. αἶσα γὰρ ἦν ἀπολέσθαι, ἐπὴν πόλις ἀμφικαλύψῃ
  163. δουράτεον μέγαν ἵππον, ὅθʼ ἥατο πάντες ἄριστοι
  164. Ἀργείων Τρώεσσι φόνον καὶ κῆρα φέροντες.
  165. ἤειδεν δʼ ὡς ἄστυ διέπραθον υἷες Ἀχαιῶν
  166. ἱππόθεν ἐκχύμενοι, κοῖλον λόχον ἐκπρολιπόντες.
  167. ἄλλον δʼ ἄλλῃ ἄειδε πόλιν κεραϊζέμεν αἰπήν,
  168. αὐτὰρ Ὀδυσσῆα προτὶ δώματα Δηιφόβοιο
  169. βήμεναι, ἠύτʼ Ἄρηα σὺν ἀντιθέῳ Μενελάῳ.
  170. κεῖθι δὴ αἰνότατον πόλεμον φάτο τολμήσαντα
  171. νικῆσαι καὶ ἔπειτα διὰ μεγάθυμον Ἀθήνην.
  172. ταῦτʼ ἄρʼ ἀοιδὸς ἄειδε περικλυτός· αὐτὰρ Ὀδυσσεὺς
  173. τήκετο, δάκρυ δʼ ἔδευεν ὑπὸ βλεφάροισι παρειάς.
  174. ὡς δὲ γυνὴ κλαίῃσι φίλον πόσιν ἀμφιπεσοῦσα,
  175. ὅς τε ἑῆς πρόσθεν πόλιος λαῶν τε πέσῃσιν,
  176. ἄστεϊ καὶ τεκέεσσιν ἀμύνων νηλεὲς ἦμαρ·
  177. ἡ μὲν τὸν θνήσκοντα καὶ ἀσπαίροντα ἰδοῦσα
  178. ἀμφʼ αὐτῷ χυμένη λίγα κωκύει· οἱ δέ τʼ ὄπισθε
  179. κόπτοντες δούρεσσι μετάφρενον ἠδὲ καὶ ὤμους
  180. εἴρερον εἰσανάγουσι, πόνον τʼ ἐχέμεν καὶ ὀιζύν·
  181. τῆς δʼ ἐλεεινοτάτῳ ἄχεϊ φθινύθουσι παρειαί·
  182. ὣς Ὀδυσεὺς ἐλεεινὸν ὑπʼ ὀφρύσι δάκρυον εἶβεν.
  183. ἔνθʼ ἄλλους μὲν πάντας ἐλάνθανε δάκρυα λείβων,
  184. Ἀλκίνοος δέ μιν οἶος ἐπεφράσατʼ ἠδʼ ἐνόησεν,
  185. ἥμενος ἄγχʼ αὐτοῦ, βαρὺ δὲ στενάχοντος ἄκουσεν.
  186. αἶψα δὲ Φαιήκεσσι φιληρέτμοισι μετηύδα·
  187. κέκλυτε, Φαιήκων ἡγήτορες ἠδὲ μέδοντες,
  188. Δημόδοκος δʼ ἤδη σχεθέτω φόρμιγγα λίγειαν·
  189. οὐ γάρ πως πάντεσσι χαριζόμενος τάδʼ ἀείδει.
  190. ἐξ οὗ δορπέομέν τε καὶ ὤρορε θεῖος ἀοιδός,
  191. ἐκ τοῦ δʼ οὔ πω παύσατʼ ὀιζυροῖο γόοιο
  192. ὁ ξεῖνος· μάλα πού μιν ἄχος φρένας ἀμφιβέβηκεν.
  193. ἀλλʼ ἄγʼ ὁ μὲν σχεθέτω, ἵνʼ ὁμῶς τερπώμεθα πάντες,
  194. ξεινοδόκοι καὶ ξεῖνος, ἐπεὶ πολὺ κάλλιον οὕτως·
  195. εἵνεκα γὰρ ξείνοιο τάδʼ αἰδοίοιο τέτυκται,
  196. πομπὴ καὶ φίλα δῶρα, τά οἱ δίδομεν φιλέοντες.
  197. ἀντὶ κασιγνήτου ξεῖνός θʼ ἱκέτης τε τέτυκται
  198. ἀνέρι, ὅς τʼ ὀλίγον περ ἐπιψαύῃ πραπίδεσσι.
  199. τῷ νῦν μηδὲ σὺ κεῦθε νοήμασι κερδαλέοισιν
  200. ὅττι κέ σʼ εἴρωμαι· φάσθαι δέ σε κάλλιόν ἐστιν.
  201. εἴπʼ ὄνομʼ ὅττι σε κεῖθι κάλεον μήτηρ τε πατήρ τε
  202. ἄλλοι θʼ οἳ κατὰ ἄστυ καὶ οἳ περιναιετάουσιν.
  203. οὐ μὲν γάρ τις πάμπαν ἀνώνυμός ἐστʼ ἀνθρώπων,
  204. οὐ κακὸς οὐδὲ μὲν ἐσθλός, ἐπὴν τὰ πρῶτα γένηται,
  205. ἀλλʼ ἐπὶ πᾶσι τίθενται, ἐπεί κε τέκωσι, τοκῆες.
  206. εἰπὲ δέ μοι γαῖάν τε· τεὴν δῆμόν τε πόλιν τε,
  207. ὄφρα σε τῇ πέμπωσι τιτυσκόμεναι φρεσὶ νῆες·
  208. οὐ γὰρ Φαιήκεσσι κυβερνητῆρες ἔασιν,
  209. οὐδέ τι πηδάλιʼ ἔστι, τά τʼ ἄλλαι νῆες ἔχουσιν·
  210. ἀλλʼ αὐταὶ ἴσασι νοήματα καὶ φρένας ἀνδρῶν,
  211. καὶ πάντων ἴσασι πόλιας καὶ πίονας ἀγροὺς
  212. ἀνθρώπων, καὶ λαῖτμα τάχισθʼ ἁλὸς ἐκπερόωσιν
  213. ἠέρι καὶ νεφέλῃ κεκαλυμμέναι· οὐδέ ποτέ σφιν
  214. οὔτε τι πημανθῆναι ἔπι δέος οὔτʼ ἀπολέσθαι.
  215. ἀλλὰ τόδʼ ὥς ποτε πατρὸς ἐγὼν εἰπόντος ἄκουσα
  216. Ναυσιθόου, ὃς ἔφασκε Ποσειδάωνʼ ἀγάσασθαι
  217. ἡμῖν, οὕνεκα πομποὶ ἀπήμονές εἰμεν ἁπάντων.
  218. φῆ ποτὲ Φαιήκων ἀνδρῶν ἐυεργέα νῆα
  219. ἐκ πομπῆς ἀνιοῦσαν ἐν ἠεροειδέι πόντῳ
  220. ῥαισέμεναι, μέγα δʼ ἧμιν ὄρος πόλει ἀμφικαλύψειν.
  221. ὣς ἀγόρευʼ ὁ γέρων· τὰ δέ κεν θεὸς ἢ τελέσειεν
  222. ἤ κʼ ἀτέλεστʼ εἴη, ὥς οἱ φίλον ἔπλετο θυμῷ·
  223. ἀλλʼ ἄγε μοι τόδε εἰπὲ καὶ ἀτρεκέως κατάλεξον,
  224. ὅππῃ ἀπεπλάγχθης τε καὶ ἅς τινας ἵκεο χώρας
  225. ἀνθρώπων, αὐτούς τε πόλιάς τʼ ἐὺ ναιετοώσας,
  226. ἠμὲν ὅσοι χαλεποί τε καὶ ἄγριοι οὐδὲ δίκαιοι,
  227. οἵ τε φιλόξεινοι, καί σφιν νόος ἐστὶ θεουδής.
  228. εἰπὲ δʼ ὅ τι κλαίεις καὶ ὀδύρεαι ἔνδοθι θυμῷ
  229. Ἀργείων Δαναῶν ἠδʼ Ἰλίου οἶτον ἀκούων.
  230. τὸν δὲ θεοὶ μὲν τεῦξαν, ἐπεκλώσαντο δʼ ὄλεθρον
  231. ἀνθρώποις, ἵνα ᾖσι καὶ ἐσσομένοισιν ἀοιδή.
  232. ἦ τίς τοι καὶ πηὸς ἀπέφθιτο Ἰλιόθι πρὸ
  233. ἐσθλὸς ἐών, γαμβρὸς ἢ πενθερός, οἵ τε μάλιστα
  234. κήδιστοι τελέθουσι μεθʼ αἷμά τε καὶ γένος αὐτῶν;
  235. ἦ τίς που καὶ ἑταῖρος ἀνὴρ κεχαρισμένα εἰδώς,
  236. ἐσθλός; ἐπεὶ οὐ μέν τι κασιγνήτοιο χερείων
  237. γίγνεται, ὅς κεν ἑταῖρος ἐὼν πεπνυμένα εἰδῇ.
  1. τὸν δʼ ἀπαμειβόμενος προσέφη πολύμητις Ὀδυσσεύς·
  2. Ἀλκίνοε κρεῖον, πάντων ἀριδείκετε λαῶν,
  3. ἦ τοι μὲν τόδε καλὸν ἀκουέμεν ἐστὶν ἀοιδοῦ
  4. τοιοῦδʼ οἷος ὅδʼ ἐστί, θεοῖς ἐναλίγκιος αὐδήν.
  5. οὐ γὰρ ἐγώ γέ τί φημι τέλος χαριέστερον εἶναι
  6. ἢ ὅτʼ ἐυφροσύνη μὲν ἔχῃ κάτα δῆμον ἅπαντα,
  7. δαιτυμόνες δʼ ἀνὰ δώματʼ ἀκουάζωνται ἀοιδοῦ
  8. ἥμενοι ἑξείης, παρὰ δὲ πλήθωσι τράπεζαι
  9. σίτου καὶ κρειῶν, μέθυ δʼ ἐκ κρητῆρος ἀφύσσων
  10. οἰνοχόος φορέῃσι καὶ ἐγχείῃ δεπάεσσι·
  11. τοῦτό τί μοι κάλλιστον ἐνὶ φρεσὶν εἴδεται εἶναι.
  12. σοὶ δʼ ἐμὰ κήδεα θυμὸς ἐπετράπετο στονόεντα
  13. εἴρεσθʼ, ὄφρʼ ἔτι μᾶλλον ὀδυρόμενος στεναχίζω·
  14. τί πρῶτόν τοι ἔπειτα, τί δʼ ὑστάτιον καταλέξω;
  15. κήδεʼ ἐπεί μοι πολλὰ δόσαν θεοὶ Οὐρανίωνες.
  16. νῦν δʼ ὄνομα πρῶτον μυθήσομαι, ὄφρα καὶ ὑμεῖς
  17. εἴδετʼ, ἐγὼ δʼ ἂν ἔπειτα φυγὼν ὕπο νηλεὲς ἦμαρ
  18. ὑμῖν ξεῖνος ἔω καὶ ἀπόπροθι δώματα ναίων.
  19. εἴμʼ Ὀδυσεὺς Λαερτιάδης, ὃς πᾶσι δόλοισιν
  20. ἀνθρώποισι μέλω, καί μευ κλέος οὐρανὸν ἵκει.
  21. ναιετάω δʼ Ἰθάκην ἐυδείελον· ἐν δʼ ὄρος αὐτῇ
  22. Νήριτον εἰνοσίφυλλον, ἀριπρεπές· ἀμφὶ δὲ νῆσοι
  23. πολλαὶ ναιετάουσι μάλα σχεδὸν ἀλλήλῃσι,
  24. Δουλίχιόν τε Σάμη τε καὶ ὑλήεσσα Ζάκυνθος.
  25. αὐτὴ δὲ χθαμαλὴ πανυπερτάτη εἰν ἁλὶ κεῖται
  26. πρὸς ζόφον, αἱ δέ τʼ ἄνευθε πρὸς ἠῶ τʼ ἠέλιόν τε,
  27. τρηχεῖʼ, ἀλλʼ ἀγαθὴ κουροτρόφος· οὔ τοι ἐγώ γε
  28. ἧς γαίης δύναμαι γλυκερώτερον ἄλλο ἰδέσθαι.
  29. ἦ μέν μʼ αὐτόθʼ ἔρυκε Καλυψώ, δῖα θεάων,
  30. ἐν σπέσσι γλαφυροῖσι, λιλαιομένη πόσιν εἶναι·
  31. ὣς δʼ αὔτως Κίρκη κατερήτυεν ἐν μεγάροισιν
  32. Αἰαίη δολόεσσα, λιλαιομένη πόσιν εἶναι·
  33. ἀλλʼ ἐμὸν οὔ ποτε θυμὸν ἐνὶ στήθεσσιν ἔπειθον.
  34. ὣς οὐδὲν γλύκιον ἧς πατρίδος οὐδὲ τοκήων
  35. γίγνεται, εἴ περ καί τις ἀπόπροθι πίονα οἶκον
  36. γαίῃ ἐν ἀλλοδαπῇ ναίει ἀπάνευθε τοκήων.
  37. εἰ δʼ ἄγε τοι καὶ νόστον ἐμὸν πολυκηδέʼ ἐνίσπω,
  38. ὅν μοι Ζεὺς ἐφέηκεν ἀπὸ Τροίηθεν ἰόντι.
  39. Ἰλιόθεν με φέρων ἄνεμος Κικόνεσσι πέλασσεν,
  40. Ἰσμάρῳ. ἔνθα δʼ ἐγὼ πόλιν ἔπραθον, ὤλεσα δʼ αὐτούς·
  41. ἐκ πόλιος δʼ ἀλόχους καὶ κτήματα πολλὰ λαβόντες
  42. δασσάμεθʼ, ὡς μή τίς μοι ἀτεμβόμενος κίοι ἴσης.
  43. ἔνθʼ ἦ τοι μὲν ἐγὼ διερῷ ποδὶ φευγέμεν ἡμέας
  44. ἠνώγεα, τοὶ δὲ μέγα νήπιοι οὐκ ἐπίθοντο.
  45. ἔνθα δὲ πολλὸν μὲν μέθυ πίνετο, πολλὰ δὲ μῆλα
  46. ἔσφαζον παρὰ θῖνα καὶ εἰλίποδας ἕλικας βοῦς·
  47. τόφρα δʼ ἄρʼ οἰχόμενοι Κίκονες Κικόνεσσι γεγώνευν,
  48. οἵ σφιν γείτονες ἦσαν, ἅμα πλέονες καὶ ἀρείους,
  49. ἤπειρον ναίοντες, ἐπιστάμενοι μὲν ἀφʼ ἵππων
  50. ἀνδράσι μάρνασθαι καὶ ὅθι χρὴ πεζὸν ἐόντα.
  51. ἦλθον ἔπειθʼ ὅσα φύλλα καὶ ἄνθεα γίγνεται ὥρῃ,
  52. ἠέριοι· τότε δή ῥα κακὴ Διὸς αἶσα παρέστη
  53. ἡμῖν αἰνομόροισιν, ἵνʼ ἄλγεα πολλὰ πάθοιμεν.
  54. στησάμενοι δʼ ἐμάχοντο μάχην παρὰ νηυσὶ θοῇσι,
  55. βάλλον δʼ ἀλλήλους χαλκήρεσιν ἐγχείῃσιν.
  56. ὄφρα μὲν ἠὼς ἦν καὶ ἀέξετο ἱερὸν ἦμαρ,
  57. τόφρα δʼ ἀλεξόμενοι μένομεν πλέονάς περ ἐόντας.
  58. ἦμος δʼ ἠέλιος μετενίσσετο βουλυτόνδε,
  59. καὶ τότε δὴ Κίκονες κλῖναν δαμάσαντες Ἀχαιούς.
  60. ἓξ δʼ ἀφʼ ἑκάστης νηὸς ἐυκνήμιδες ἑταῖροι
  61. ὤλονθʼ· οἱ δʼ ἄλλοι φύγομεν θάνατόν τε μόρον τε.
  62. ἔνθεν δὲ προτέρω πλέομεν ἀκαχήμενοι ἦτορ,
  63. ἄσμενοι ἐκ θανάτοιο, φίλους ὀλέσαντες ἑταίρους.
  64. οὐδʼ ἄρα μοι προτέρω νῆες κίον ἀμφιέλισσαι,
  65. πρίν τινα τῶν δειλῶν ἑτάρων τρὶς ἕκαστον ἀῦσαι,
  66. οἳ θάνον ἐν πεδίῳ Κικόνων ὕπο δῃωθέντες.
  67. νηυσὶ δʼ ἐπῶρσʼ ἄνεμον Βορέην νεφεληγερέτα Ζεὺς
  68. λαίλαπι θεσπεσίῃ, σὺν δὲ νεφέεσσι κάλυψε
  69. γαῖαν ὁμοῦ καὶ πόντον· ὀρώρει δʼ οὐρανόθεν νύξ.
  70. αἱ μὲν ἔπειτʼ ἐφέροντʼ ἐπικάρσιαι, ἱστία δέ σφιν
  71. τριχθά τε καὶ τετραχθὰ διέσχισεν ἲς ἀνέμοιο.
  72. καὶ τὰ μὲν ἐς νῆας κάθεμεν, δείσαντες ὄλεθρον,
  73. αὐτὰς δʼ ἐσσυμένως προερέσσαμεν ἤπειρόνδε.
  74. ἔνθα δύω νύκτας δύο τʼ ἤματα συνεχὲς αἰεὶ
  75. κείμεθʼ, ὁμοῦ καμάτῳ τε καὶ ἄλγεσι θυμὸν ἔδοντες.
  76. ἀλλʼ ὅτε δὴ τρίτον ἦμαρ ἐυπλόκαμος τέλεσʼ Ἠώς,
  77. ἱστοὺς στησάμενοι ἀνά θʼ ἱστία λεύκʼ ἐρύσαντες
  78. ἥμεθα, τὰς δʼ ἄνεμός τε κυβερνῆταί τʼ ἴθυνον.
  79. καί νύ κεν ἀσκηθὴς ἱκόμην ἐς πατρίδα γαῖαν·
  80. ἀλλά με κῦμα ῥόος τε περιγνάμπτοντα Μάλειαν
  81. καὶ Βορέης ἀπέωσε, παρέπλαγξεν δὲ Κυθήρων.
  82. ἔνθεν δʼ ἐννῆμαρ φερόμην ὀλοοῖς ἀνέμοισιν
  83. πόντον ἐπʼ ἰχθυόεντα· ἀτὰρ δεκάτῃ ἐπέβημεν
  84. γαίης Λωτοφάγων, οἵ τʼ ἄνθινον εἶδαρ ἔδουσιν.
  85. ἔνθα δʼ ἐπʼ ἠπείρου βῆμεν καὶ ἀφυσσάμεθʼ ὕδωρ,
  86. αἶψα δὲ δεῖπνον ἕλοντο θοῇς παρὰ νηυσὶν ἑταῖροι.
  87. αὐτὰρ ἐπεὶ σίτοιό τʼ ἐπασσάμεθʼ ἠδὲ ποτῆτος,
  88. δὴ τοτʼ ἐγὼν ἑτάρους προΐειν πεύθεσθαι ἰόντας,
  89. οἵ τινες ἀνέρες εἶεν ἐπὶ χθονὶ σῖτον ἔδοντες
  90. ἄνδρε δύω κρίνας, τρίτατον κήρυχʼ ἅμʼ ὀπάσσας.
  91. οἱ δʼ αἶψʼ οἰχόμενοι μίγεν ἀνδράσι Λωτοφάγοισιν·
  92. οὐδʼ ἄρα Λωτοφάγοι μήδονθʼ ἑτάροισιν ὄλεθρον
  93. ἡμετέροις, ἀλλά σφι δόσαν λωτοῖο πάσασθαι.
  94. τῶν δʼ ὅς τις λωτοῖο φάγοι μελιηδέα καρπόν,
  95. οὐκέτʼ ἀπαγγεῖλαι πάλιν ἤθελεν οὐδὲ νέεσθαι,
  96. ἀλλʼ αὐτοῦ βούλοντο μετʼ ἀνδράσι Λωτοφάγοισι
  97. λωτὸν ἐρεπτόμενοι μενέμεν νόστου τε λαθέσθαι.
  98. τοὺς μὲν ἐγὼν ἐπὶ νῆας ἄγον κλαίοντας ἀνάγκῃ,
  99. νηυσὶ δʼ ἐνὶ γλαφυρῇσιν ὑπὸ ζυγὰ δῆσα ἐρύσσας.
  100. αὐτὰρ τοὺς ἄλλους κελόμην ἐρίηρας ἑταίρους
  101. σπερχομένους νηῶν ἐπιβαινέμεν ὠκειάων,
  102. μή πώς τις λωτοῖο φαγὼν νόστοιο λάθηται.
  103. οἱ δʼ αἶψʼ εἴσβαινον καὶ ἐπὶ κληῖσι καθῖζον,
  104. ἑξῆς δʼ ἑζόμενοι πολιὴν ἅλα τύπτον ἐρετμοῖς.
  105. ἔνθεν δὲ προτέρω πλέομεν ἀκαχήμενοι ἦτορ·
  106. Κυκλώπων δʼ ἐς γαῖαν ὑπερφιάλων ἀθεμίστων
  107. ἱκόμεθʼ, οἵ ῥα θεοῖσι πεποιθότες ἀθανάτοισιν
  108. οὔτε φυτεύουσιν χερσὶν φυτὸν οὔτʼ ἀρόωσιν,
  109. ἀλλὰ τά γʼ ἄσπαρτα καὶ ἀνήροτα πάντα φύονται,
  110. πυροὶ καὶ κριθαὶ ἠδʼ ἄμπελοι, αἵ τε φέρουσιν
  111. οἶνον ἐριστάφυλον, καί σφιν Διὸς ὄμβρος ἀέξει.
  112. τοῖσιν δʼ οὔτʼ ἀγοραὶ βουληφόροι οὔτε θέμιστες,
  113. ἀλλʼ οἵ γʼ ὑψηλῶν ὀρέων ναίουσι κάρηνα
  114. ἐν σπέσσι γλαφυροῖσι, θεμιστεύει δὲ ἕκαστος
  115. παίδων ἠδʼ ἀλόχων, οὐδʼ ἀλλήλων ἀλέγουσιν.
  116. νῆσος ἔπειτα λάχεια παρὲκ λιμένος τετάνυσται,
  117. γαίης Κυκλώπων οὔτε σχεδὸν οὔτʼ ἀποτηλοῦ,
  118. ὑλήεσσʼ· ἐν δʼ αἶγες ἀπειρέσιαι γεγάασιν
  119. ἄγριαι· οὐ μὲν γὰρ πάτος ἀνθρώπων ἀπερύκει,
  120. οὐδέ μιν εἰσοιχνεῦσι κυνηγέται, οἵ τε καθʼ ὕλην
  121. ἄλγεα πάσχουσιν κορυφὰς ὀρέων ἐφέποντες.
  122. οὔτʼ ἄρα ποίμνῃσιν καταΐσχεται οὔτʼ ἀρότοισιν,
  123. ἀλλʼ ἥ γʼ ἄσπαρτος καὶ ἀνήροτος ἤματα πάντα
  124. ἀνδρῶν χηρεύει, βόσκει δέ τε μηκάδας αἶγας.
  125. οὐ γὰρ Κυκλώπεσσι νέες πάρα μιλτοπάρῃοι,
  126. οὐδʼ ἄνδρες νηῶν ἔνι τέκτονες, οἵ κε κάμοιεν
  127. νῆας ἐυσσέλμους, αἵ κεν τελέοιεν ἕκαστα
  128. ἄστεʼ ἐπʼ ἀνθρώπων ἱκνεύμεναι, οἷά τε πολλὰ
  129. ἄνδρες ἐπʼ ἀλλήλους νηυσὶν περόωσι θάλασσαν·
  130. οἵ κέ σφιν καὶ νῆσον ἐυκτιμένην ἐκάμοντο.
  131. οὐ μὲν γάρ τι κακή γε, φέροι δέ κεν ὥρια πάντα·
  132. ἐν μὲν γὰρ λειμῶνες ἁλὸς πολιοῖο παρʼ ὄχθας
  133. ὑδρηλοὶ μαλακοί· μάλα κʼ ἄφθιτοι ἄμπελοι εἶεν.
  134. ἐν δʼ ἄροσις λείη· μάλα κεν βαθὺ λήιον αἰεὶ
  135. εἰς ὥρας ἀμῷεν, ἐπεὶ μάλα πῖαρ ὑπʼ οὖδας.
  136. ἐν δὲ λιμὴν ἐύορμος, ἵνʼ οὐ χρεὼ πείσματός ἐστιν,
  137. οὔτʼ εὐνὰς βαλέειν οὔτε πρυμνήσιʼ ἀνάψαι,
  138. ἀλλʼ ἐπικέλσαντας μεῖναι χρόνον εἰς ὅ κε ναυτέων
  139. θυμὸς ἐποτρύνῃ καὶ ἐπιπνεύσωσιν ἀῆται.
  140. αὐτὰρ ἐπὶ κρατὸς λιμένος ῥέει ἀγλαὸν ὕδωρ,
  141. κρήνη ὑπὸ σπείους· περὶ δʼ αἴγειροι πεφύασιν.
  142. ἔνθα κατεπλέομεν, καί τις θεὸς ἡγεμόνευεν
  143. νύκτα διʼ ὀρφναίην, οὐδὲ προυφαίνετʼ ἰδέσθαι·
  144. ἀὴρ γὰρ περὶ νηυσὶ βαθεῖʼ ἦν, οὐδὲ σελήνη
  145. οὐρανόθεν προύφαινε, κατείχετο δὲ νεφέεσσιν.
  146. ἔνθʼ οὔ τις τὴν νῆσον ἐσέδρακεν ὀφθαλμοῖσιν,
  147. οὔτʼ οὖν κύματα μακρὰ κυλινδόμενα προτὶ χέρσον
  148. εἰσίδομεν, πρὶν νῆας ἐυσσέλμους ἐπικέλσαι.
  149. κελσάσῃσι δὲ νηυσὶ καθείλομεν ἱστία πάντα,
  150. ἐκ δὲ καὶ αὐτοὶ βῆμεν ἐπὶ ῥηγμῖνι θαλάσσης·
  151. ἔνθα δʼ ἀποβρίξαντες ἐμείναμεν Ἠῶ δῖαν.
  152. ἦμος δʼ ἠριγένεια φάνη ῥοδοδάκτυλος Ἠώς,
  153. νῆσον θαυμάζοντες ἐδινεόμεσθα κατʼ αὐτήν.
  154. ὦρσαν δὲ νύμφαι, κοῦραι Διὸς αἰγιόχοιο,
  155. αἶγας ὀρεσκῴους, ἵνα δειπνήσειαν ἑταῖροι.
  156. αὐτίκα καμπύλα τόξα καὶ αἰγανέας δολιχαύλους
  157. εἱλόμεθʼ ἐκ νηῶν, διὰ δὲ τρίχα κοσμηθέντες
  158. βάλλομεν· αἶψα δʼ ἔδωκε θεὸς μενοεικέα θήρην.
  159. νῆες μέν μοι ἕποντο δυώδεκα, ἐς δὲ ἑκάστην
  160. ἐννέα λάγχανον αἶγες· ἐμοὶ δὲ δέκʼ ἔξελον οἴῳ.
  161. ὣς τότε μὲν πρόπαν ἦμαρ ἐς ἠέλιον καταδύντα
  162. ἥμεθα δαινύμενοι κρέα τʼ ἄσπετα καὶ μέθυ ἡδύ·
  163. οὐ γάρ πω νηῶν ἐξέφθιτο οἶνος ἐρυθρός,
  164. ἀλλʼ ἐνέην· πολλὸν γὰρ ἐν ἀμφιφορεῦσιν ἕκαστοι
  165. ἠφύσαμεν Κικόνων. ἱερὸν πτολίεθρον ἑλόντες.
  166. Κυκλώπων δʼ ἐς γαῖαν ἐλεύσσομεν ἐγγὺς ἐόντων,
  167. καπνόν τʼ αὐτῶν τε φθογγὴν ὀίων τε καὶ αἰγῶν.
  168. ἦμος δʼ ἠέλιος κατέδυ καὶ ἐπὶ κνέφας ἦλθε,
  169. δὴ τότε κοιμήθημεν ἐπὶ ῥηγμῖνι θαλάσσης.
  170. ἦμος δʼ ἠριγένεια φάνη ῥοδοδάκτυλος Ἠώς,
  171. καὶ τότʼ ἐγὼν ἀγορὴν θέμενος μετὰ πᾶσιν ἔειπον·
  172. ἄλλοι μὲν νῦν μίμνετʼ, ἐμοὶ ἐρίηρες ἑταῖροι·
  173. αὐτὰρ ἐγὼ σὺν νηί τʼ ἐμῇ καὶ ἐμοῖς ἑτάροισιν
  174. ἐλθὼν τῶνδʼ ἀνδρῶν πειρήσομαι, οἵ τινές εἰσιν,
  175. ἤ ῥʼ οἵ γʼ ὑβρισταί τε καὶ ἄγριοι οὐδὲ δίκαιοι,
  176. ἦε φιλόξεινοι, καί σφιν νόος ἐστὶ θεουδής.
  177. ὣς εἰπὼν ἀνὰ νηὸς ἔβην, ἐκέλευσα δʼ ἑταίρους
  178. αὐτούς τʼ ἀμβαίνειν ἀνά τε πρυμνήσια λῦσαι.
  179. οἱ δʼ αἶψʼ εἴσβαινον καὶ ἐπὶ κληῖσι καθῖζον,
  180. ἑξῆς δʼ ἑζόμενοι πολιὴν ἅλα τύπτον ἐρετμοῖς.
  181. ἀλλʼ ὅτε δὴ τὸν χῶρον ἀφικόμεθʼ ἐγγὺς ἐόντα,
  182. ἔνθα δʼ ἐπʼ ἐσχατιῇ σπέος εἴδομεν ἄγχι θαλάσσης,
  183. ὑψηλόν, δάφνῃσι κατηρεφές. ἔνθα δὲ πολλὰ
  184. μῆλʼ, ὄιές τε καὶ αἶγες, ἰαύεσκον· περὶ δʼ αὐλὴ
  185. ὑψηλὴ δέδμητο κατωρυχέεσσι λίθοισι
  186. μακρῇσίν τε πίτυσσιν ἰδὲ δρυσὶν ὑψικόμοισιν.
  187. ἔνθα δʼ ἀνὴρ ἐνίαυε πελώριος, ὅς ῥα τὰ μῆλα
  188. οἶος ποιμαίνεσκεν ἀπόπροθεν· οὐδὲ μετʼ ἄλλους
  189. πωλεῖτʼ, ἀλλʼ ἀπάνευθεν ἐὼν ἀθεμίστια ᾔδη.
  190. καὶ γὰρ θαῦμʼ ἐτέτυκτο πελώριον, οὐδὲ ἐῴκει
  191. ἀνδρί γε σιτοφάγῳ, ἀλλὰ ῥίῳ ὑλήεντι
  192. ὑψηλῶν ὀρέων, ὅ τε φαίνεται οἶον ἀπʼ ἄλλων.
  193. δὴ τότε τοὺς ἄλλους κελόμην ἐρίηρας ἑταίρους
  194. αὐτοῦ πὰρ νηί τε μένειν καὶ νῆα ἔρυσθαι,
  195. αὐτὰρ ἐγὼ κρίνας ἑτάρων δυοκαίδεκʼ ἀρίστους
  196. βῆν· ἀτὰρ αἴγεον ἀσκὸν ἔχον μέλανος οἴνοιο
  197. ἡδέος, ὅν μοι ἔδωκε Μάρων, Εὐάνθεος υἱός,
  198. ἱρεὺς Ἀπόλλωνος, ὃς Ἴσμαρον ἀμφιβεβήκει,
  199. οὕνεκά μιν σὺν παιδὶ περισχόμεθʼ ἠδὲ γυναικὶ
  200. ἁζόμενοι· ᾤκει γὰρ ἐν ἄλσεϊ δενδρήεντι
  201. Φοίβου Ἀπόλλωνος. ὁ δέ μοι πόρεν ἀγλαὰ δῶρα·
  202. χρυσοῦ μέν μοι ἔδωκʼ ἐυεργέος ἑπτὰ τάλαντα,
  203. δῶκε δέ μοι κρητῆρα πανάργυρον, αὐτὰρ ἔπειτα
  204. οἶνον ἐν ἀμφιφορεῦσι δυώδεκα πᾶσιν ἀφύσσας
  205. ἡδὺν ἀκηράσιον, θεῖον ποτόν· οὐδέ τις αὐτὸν
  206. ἠείδη δμώων οὐδʼ ἀμφιπόλων ἐνὶ οἴκῳ,
  207. ἀλλʼ αὐτὸς ἄλοχός τε φίλη ταμίη τε μίʼ οἴη.
  208. τὸν δʼ ὅτε πίνοιεν μελιηδέα οἶνον ἐρυθρόν,
  209. ἓν δέπας ἐμπλήσας ὕδατος ἀνὰ εἴκοσι μέτρα
  210. χεῦʼ, ὀδμὴ δʼ ἡδεῖα ἀπὸ κρητῆρος ὀδώδει
  211. θεσπεσίη· τότʼ ἂν οὔ τοι ἀποσχέσθαι φίλον ἦεν.
  212. τοῦ φέρον ἐμπλήσας ἀσκὸν μέγαν, ἐν δὲ καὶ ᾖα
  213. κωρύκῳ· αὐτίκα γάρ μοι ὀίσατο θυμὸς ἀγήνωρ
  214. ἄνδρʼ ἐπελεύσεσθαι μεγάλην ἐπιειμένον ἀλκήν,
  215. ἄγριον, οὔτε δίκας ἐὺ εἰδότα οὔτε θέμιστας.
  216. καρπαλίμως δʼ εἰς ἄντρον ἀφικόμεθʼ, οὐδέ μιν ἔνδον
  217. εὕρομεν, ἀλλʼ ἐνόμευε νομὸν κάτα πίονα μῆλα.
  218. ἐλθόντες δʼ εἰς ἄντρον ἐθηεύμεσθα ἕκαστα.
  219. ταρσοὶ μὲν τυρῶν βρῖθον, στείνοντο δὲ σηκοὶ
  220. ἀρνῶν ἠδʼ ἐρίφων· διακεκριμέναι δὲ ἕκασται
  221. ἔρχατο, χωρὶς μὲν πρόγονοι, χωρὶς δὲ μέτασσαι,
  222. χωρὶς δʼ αὖθʼ ἕρσαι. ναῖον δʼ ὀρῷ ἄγγεα πάντα,
  223. γαυλοί τε σκαφίδες τε, τετυγμένα, τοῖς ἐνάμελγεν.
  224. ἔνθʼ ἐμὲ μὲν πρώτισθʼ ἕταροι λίσσοντʼ ἐπέεσσιν
  225. τυρῶν αἰνυμένους ἰέναι πάλιν, αὐτὰρ ἔπειτα
  226. καρπαλίμως ἐπὶ νῆα θοὴν ἐρίφους τε καὶ ἄρνας
  227. σηκῶν ἐξελάσαντας ἐπιπλεῖν ἁλμυρὸν ὕδωρ·
  228. ἀλλʼ ἐγὼ οὐ πιθόμην, ἦ τʼ ἂν πολὺ κέρδιον ἦεν,
  229. ὄφρʼ αὐτόν τε ἴδοιμι, καὶ εἴ μοι ξείνια δοίη.
  230. οὐδʼ ἄρʼ ἔμελλʼ ἑτάροισι φανεὶς ἐρατεινὸς ἔσεσθαι.
  231. ἔνθα δὲ πῦρ κήαντες ἐθύσαμεν ἠδὲ καὶ αὐτοὶ
  232. τυρῶν αἰνύμενοι φάγομεν, μένομέν τέ μιν ἔνδον
  233. ἥμενοι, ἧος ἐπῆλθε νέμων. φέρε δʼ ὄβριμον ἄχθος
  234. ὕλης ἀζαλέης, ἵνα οἱ ποτιδόρπιον εἴη,
  235. ἔντοσθεν δʼ ἄντροιο βαλὼν ὀρυμαγδὸν ἔθηκεν·
  236. ἡμεῖς δὲ δείσαντες ἀπεσσύμεθʼ ἐς μυχὸν ἄντρου.
  237. αὐτὰρ ὅ γʼ εἰς εὐρὺ σπέος ἤλασε πίονα μῆλα
  238. πάντα μάλʼ ὅσσʼ ἤμελγε, τὰ δʼ ἄρσενα λεῖπε θύρηφιν,
  239. ἀρνειούς τε τράγους τε, βαθείης ἔκτοθεν αὐλῆς.
  240. αὐτὰρ ἔπειτʼ ἐπέθηκε θυρεὸν μέγαν ὑψόσʼ ἀείρας,
  241. ὄβριμον· οὐκ ἂν τόν γε δύω καὶ εἴκοσʼ ἄμαξαι
  242. ἐσθλαὶ τετράκυκλοι ἀπʼ οὔδεος ὀχλίσσειαν·
  243. τόσσην ἠλίβατον πέτρην ἐπέθηκε θύρῃσιν.
  244. ἑζόμενος δʼ ἤμελγεν ὄις καὶ μηκάδας αἶγας,
  245. πάντα κατὰ μοῖραν, καὶ ὑπʼ ἔμβρυον ἧκεν ἑκάστῃ.
  246. αὐτίκα δʼ ἥμισυ μὲν θρέψας λευκοῖο γάλακτος
  247. πλεκτοῖς ἐν ταλάροισιν ἀμησάμενος κατέθηκεν,
  248. ἥμισυ δʼ αὖτʼ ἔστησεν ἐν ἄγγεσιν, ὄφρα οἱ εἴη
  249. πίνειν αἰνυμένῳ καί οἱ ποτιδόρπιον εἴη.
  250. αὐτὰρ ἐπεὶ δὴ σπεῦσε πονησάμενος τὰ ἃ ἔργα,
  251. καὶ τότε πῦρ ἀνέκαιε καὶ εἴσιδεν, εἴρετο δʼ ἡμέας·
  252. ὦ ξεῖνοι, τίνες ἐστέ; πόθεν πλεῖθʼ ὑγρὰ κέλευθα;
  253. ἦ τι κατὰ πρῆξιν ἦ μαψιδίως ἀλάλησθε,
  254. οἷά τε ληιστῆρες, ὑπεὶρ ἅλα, τοί τʼ ἀλόωνται
  255. ψυχὰς παρθέμενοι κακὸν ἀλλοδαποῖσι φέροντες;
  256. ὣς ἔφαθʼ, ἡμῖν δʼ αὖτε κατεκλάσθη φίλον ἦτορ,
  257. δεισάντων φθόγγον τε βαρὺν αὐτόν τε πέλωρον.
  258. ἀλλὰ καὶ ὥς μιν ἔπεσσιν ἀμειβόμενος προσέειπον·
  259. ἡμεῖς τοι Τροίηθεν ἀποπλαγχθέντες Ἀχαιοὶ
  260. παντοίοις ἀνέμοισιν ὑπὲρ μέγα λαῖτμα θαλάσσης,
  261. οἴκαδε ἱέμενοι, ἄλλην ὁδὸν ἄλλα κέλευθα
  262. ἤλθομεν· οὕτω που Ζεὺς ἤθελε μητίσασθαι.
  263. λαοὶ δʼ Ἀτρεΐδεω Ἀγαμέμνονος εὐχόμεθʼ εἶναι,
  264. τοῦ δὴ νῦν γε μέγιστον ὑπουράνιον κλέος ἐστί·
  265. τόσσην γὰρ διέπερσε πόλιν καὶ ἀπώλεσε λαοὺς
  266. πολλούς. ἡμεῖς δʼ αὖτε κιχανόμενοι τὰ σὰ γοῦνα
  267. ἱκόμεθʼ, εἴ τι πόροις ξεινήιον ἠὲ καὶ ἄλλως
  268. δοίης δωτίνην, ἥ τε ξείνων θέμις ἐστίν.
  269. ἀλλʼ αἰδεῖο, φέριστε, θεούς· ἱκέται δέ τοί εἰμεν,
  270. Ζεὺς δʼ ἐπιτιμήτωρ ἱκετάων τε ξείνων τε,
  271. ξείνιος, ὃς ξείνοισιν ἅμʼ αἰδοίοισιν ὀπηδεῖ.
  272. ὣς ἐφάμην, ὁ δέ μʼ αὐτίκʼ ἀμείβετο νηλέι θυμῷ·
  273. νήπιός εἰς, ὦ ξεῖνʼ, ἢ τηλόθεν εἰλήλουθας,
  274. ὅς με θεοὺς κέλεαι ἢ δειδίμεν ἢ ἀλέασθαι·
  275. οὐ γὰρ Κύκλωπες Διὸς αἰγιόχου ἀλέγουσιν
  276. οὐδὲ θεῶν μακάρων, ἐπεὶ ἦ πολὺ φέρτεροί εἰμεν·
  277. οὐδʼ ἂν ἐγὼ Διὸς ἔχθος ἀλευάμενος πεφιδοίμην
  278. οὔτε σεῦ οὔθʼ ἑτάρων, εἰ μὴ θυμός με κελεύοι.
  279. ἀλλά μοι εἴφʼ ὅπῃ ἔσχες ἰὼν ἐυεργέα νῆα,
  280. ἤ που ἐπʼ ἐσχατιῆς, ἦ καὶ σχεδόν, ὄφρα δαείω.
  281. ὣς φάτο πειράζων, ἐμὲ δʼ οὐ λάθεν εἰδότα πολλά,
  282. ἀλλά μιν ἄψορρον προσέφην δολίοις ἐπέεσσι·
  283. νέα μέν μοι κατέαξε Ποσειδάων ἐνοσίχθων
  284. πρὸς πέτρῃσι βαλὼν ὑμῆς ἐπὶ πείρασι γαίης,
  285. ἄκρῃ προσπελάσας· ἄνεμος δʼ ἐκ πόντου ἔνεικεν·
  286. αὐτὰρ ἐγὼ σὺν τοῖσδε ὑπέκφυγον αἰπὺν ὄλεθρον.
  287. ὣς ἐφάμην, ὁ δέ μʼ οὐδὲν ἀμείβετο νηλέι θυμῷ,
  288. ἀλλʼ ὅ γʼ ἀναΐξας ἑτάροις ἐπὶ χεῖρας ἴαλλε,
  289. σὺν δὲ δύω μάρψας ὥς τε σκύλακας ποτὶ γαίῃ
  290. κόπτʼ· ἐκ δʼ ἐγκέφαλος χαμάδις ῥέε, δεῦε δὲ γαῖαν.
  291. τοὺς δὲ διὰ μελεϊστὶ ταμὼν ὡπλίσσατο δόρπον·
  292. ἤσθιε δʼ ὥς τε λέων ὀρεσίτροφος, οὐδʼ ἀπέλειπεν,
  293. ἔγκατά τε σάρκας τε καὶ ὀστέα μυελόεντα.
  294. ἡμεῖς δὲ κλαίοντες ἀνεσχέθομεν Διὶ χεῖρας,
  295. σχέτλια ἔργʼ ὁρόωντες, ἀμηχανίη δʼ ἔχε θυμόν.
  296. αὐτὰρ ἐπεὶ Κύκλωψ μεγάλην ἐμπλήσατο νηδὺν
  297. ἀνδρόμεα κρέʼ ἔδων καὶ ἐπʼ ἄκρητον γάλα πίνων,
  298. κεῖτʼ ἔντοσθʼ ἄντροιο τανυσσάμενος διὰ μήλων.
  299. τὸν μὲν ἐγὼ βούλευσα κατὰ μεγαλήτορα θυμὸν
  300. ἆσσον ἰών, ξίφος ὀξὺ ἐρυσσάμενος παρὰ μηροῦ,
  301. οὐτάμεναι πρὸς στῆθος, ὅθι φρένες ἧπαρ ἔχουσι,
  302. χείρʼ ἐπιμασσάμενος· ἕτερος δέ με θυμὸς ἔρυκεν.
  303. αὐτοῦ γάρ κε καὶ ἄμμες ἀπωλόμεθʼ αἰπὺν ὄλεθρον·
  304. οὐ γάρ κεν δυνάμεσθα θυράων ὑψηλάων
  305. χερσὶν ἀπώσασθαι λίθον ὄβριμον, ὃν προσέθηκεν.
  306. ὣς τότε μὲν στενάχοντες ἐμείναμεν Ἠῶ δῖαν.
  307. ἦμος δʼ ἠριγένεια φάνη ῥοδοδάκτυλος Ἠώς,
  308. καὶ τότε πῦρ ἀνέκαιε καὶ ἤμελγε κλυτὰ μῆλα,
  309. πάντα κατὰ μοῖραν, καὶ ὑπʼ ἔμβρυον ἧκεν ἑκάστῃ.
  310. αὐτὰρ ἐπεὶ δὴ σπεῦσε πονησάμενος τὰ ἃ ἔργα,
  311. σὺν δʼ ὅ γε δὴ αὖτε δύω μάρψας ὡπλίσσατο δεῖπνον.
  312. δειπνήσας δʼ ἄντρου ἐξήλασε πίονα μῆλα,
  313. ῥηιδίως ἀφελὼν θυρεὸν μέγαν· αὐτὰρ ἔπειτα
  314. ἂψ ἐπέθηχʼ, ὡς εἴ τε φαρέτρῃ πῶμʼ ἐπιθείη.
  315. πολλῇ δὲ ῥοίζῳ πρὸς ὄρος τρέπε πίονα μῆλα
  316. Κύκλωψ· αὐτὰρ ἐγὼ λιπόμην κακὰ βυσσοδομεύων,
  317. εἴ πως τισαίμην, δοίη δέ μοι εὖχος Ἀθήνη.
  318. ἥδε δέ μοι κατὰ θυμὸν ἀρίστη φαίνετο βουλή.
  319. Κύκλωπος γὰρ ἔκειτο μέγα ῥόπαλον παρὰ σηκῷ,
  320. χλωρὸν ἐλαΐνεον· τὸ μὲν ἔκταμεν, ὄφρα φοροίη
  321. αὐανθέν. τὸ μὲν ἄμμες ἐίσκομεν εἰσορόωντες
  322. ὅσσον θʼ ἱστὸν νηὸς ἐεικοσόροιο μελαίνης,
  323. φορτίδος εὐρείης, ἥ τʼ ἐκπεράᾳ μέγα λαῖτμα·
  324. τόσσον ἔην μῆκος, τόσσον πάχος εἰσοράασθαι.
  325. τοῦ μὲν ὅσον τʼ ὄργυιαν ἐγὼν ἀπέκοψα παραστὰς
  326. καὶ παρέθηχʼ ἑτάροισιν, ἀποξῦναι δʼ ἐκέλευσα·
  327. οἱ δʼ ὁμαλὸν ποίησαν· ἐγὼ δʼ ἐθόωσα παραστὰς
  328. ἄκρον, ἄφαρ δὲ λαβὼν ἐπυράκτεον ἐν πυρὶ κηλέῳ.
  329. καὶ τὸ μὲν εὖ κατέθηκα κατακρύψας ὑπὸ κόπρῳ,
  330. ἥ ῥα κατὰ σπείους κέχυτο μεγάλʼ ἤλιθα πολλή·
  331. αὐτὰρ τοὺς ἄλλους κλήρῳ πεπαλάσθαι ἄνωγον,
  332. ὅς τις τολμήσειεν ἐμοὶ σὺν μοχλὸν ἀείρας
  333. τρῖψαι ἐν ὀφθαλμῷ, ὅτε τὸν γλυκὺς ὕπνος ἱκάνοι.
  334. οἱ δʼ ἔλαχον τοὺς ἄν κε καὶ ἤθελον αὐτὸς ἑλέσθαι,
  335. τέσσαρες, αὐτὰρ ἐγὼ πέμπτος μετὰ τοῖσιν ἐλέγμην.
  336. ἑσπέριος δʼ ἦλθεν καλλίτριχα μῆλα νομεύων.
  337. αὐτίκα δʼ εἰς εὐρὺ σπέος ἤλασε πίονα μῆλα
  338. πάντα μάλʼ, οὐδέ τι λεῖπε βαθείης ἔκτοθεν αὐλῆς,
  339. ἤ τι ὀισάμενος, ἢ καὶ θεὸς ὣς ἐκέλευσεν.
  340. αὐτὰρ ἔπειτʼ ἐπέθηκε θυρεὸν μέγαν ὑψόσʼ ἀείρας,
  341. ἑζόμενος δʼ ἤμελγεν ὄις καὶ μηκάδας αἶγας,
  342. πάντα κατὰ μοῖραν, καὶ ὑπʼ ἔμβρυον ἧκεν ἑκάστῃ.
  343. αὐτὰρ ἐπεὶ δὴ σπεῦσε πονησάμενος τὰ ἃ ἔργα,
  344. σὺν δʼ ὅ γε δὴ αὖτε δύω μάρψας ὡπλίσσατο δόρπον.
  345. καὶ τότʼ ἐγὼ Κύκλωπα προσηύδων ἄγχι παραστάς,
  346. κισσύβιον μετὰ χερσὶν ἔχων μέλανος οἴνοιο·
  347. Κύκλωψ, τῆ, πίε οἶνον, ἐπεὶ φάγες ἀνδρόμεα κρέα,
  348. ὄφρʼ εἰδῇς οἷόν τι ποτὸν τόδε νηῦς ἐκεκεύθει
  349. ἡμετέρη. σοὶ δʼ αὖ λοιβὴν φέρον, εἴ μʼ ἐλεήσας
  350. οἴκαδε πέμψειας· σὺ δὲ μαίνεαι οὐκέτʼ ἀνεκτῶς.
  351. σχέτλιε, πῶς κέν τίς σε καὶ ὕστερον ἄλλος ἵκοιτο
  352. ἀνθρώπων πολέων, ἐπεὶ οὐ κατὰ μοῖραν ἔρεξας;
  353. ὣς ἐφάμην, ὁ δʼ ἔδεκτο καὶ ἔκπιεν· ἥσατο δʼ αἰνῶς
  354. ἡδὺ ποτὸν πίνων καὶ μʼ ᾔτεε δεύτερον αὖτις·
  355. δός μοι ἔτι πρόφρων, καί μοι τεὸν οὔνομα εἰπὲ
  356. αὐτίκα νῦν, ἵνα τοι δῶ ξείνιον, ᾧ κε σὺ χαίρῃς·
  357. καὶ γὰρ Κυκλώπεσσι φέρει ζείδωρος ἄρουρα
  358. οἶνον ἐριστάφυλον, καί σφιν Διὸς ὄμβρος ἀέξει·
  359. ἀλλὰ τόδʼ ἀμβροσίης καὶ νέκταρός ἐστιν ἀπορρώξ.
  360. ὣς φάτʼ, ἀτάρ οἱ αὖτις ἐγὼ πόρον αἴθοπα οἶνον.
  361. τρὶς μὲν ἔδωκα φέρων, τρὶς δʼ ἔκπιεν ἀφραδίῃσιν.
  362. αὐτὰρ ἐπεὶ Κύκλωπα περὶ φρένας ἤλυθεν οἶνος,
  363. καὶ τότε δή μιν ἔπεσσι προσηύδων μειλιχίοισι·
  364. Κύκλωψ, εἰρωτᾷς μʼ ὄνομα κλυτόν, αὐτὰρ ἐγώ τοι
  365. ἐξερέω· σὺ δέ μοι δὸς ξείνιον, ὥς περ ὑπέστης.
  366. Οὖτις ἐμοί γʼ ὄνομα· Οὖτιν δέ με κικλήσκουσι
  367. μήτηρ ἠδὲ πατὴρ ἠδʼ ἄλλοι πάντες ἑταῖροι.
  368. ὣς ἐφάμην, ὁ δέ μʼ αὐτίκʼ ἀμείβετο νηλέι θυμῷ·
  369. Οὖτιν ἐγὼ πύματον ἔδομαι μετὰ οἷς ἑτάροισιν,
  370. τοὺς δʼ ἄλλους πρόσθεν· τὸ δέ τοι ξεινήιον ἔσται.
  371. ἦ καὶ ἀνακλινθεὶς πέσεν ὕπτιος, αὐτὰρ ἔπειτα
  372. κεῖτʼ ἀποδοχμώσας παχὺν αὐχένα, κὰδ δέ μιν ὕπνος
  373. ᾕρει πανδαμάτωρ· φάρυγος δʼ ἐξέσσυτο οἶνος
  374. ψωμοί τʼ ἀνδρόμεοι· ὁ δʼ ἐρεύγετο οἰνοβαρείων.
  375. καὶ τότʼ ἐγὼ τὸν μοχλὸν ὑπὸ σποδοῦ ἤλασα πολλῆς,
  376. ἧος θερμαίνοιτο· ἔπεσσι δὲ πάντας ἑταίρους
  377. θάρσυνον, μή τίς μοι ὑποδείσας ἀναδύη.
  378. ἀλλʼ ὅτε δὴ τάχʼ ὁ μοχλὸς ἐλάινος ἐν πυρὶ μέλλεν
  379. ἅψεσθαι, χλωρός περ ἐών, διεφαίνετο δʼ αἰνῶς,
  380. καὶ τότʼ ἐγὼν ἆσσον φέρον ἐκ πυρός, ἀμφὶ δʼ ἑταῖροι
  381. ἵσταντʼ· αὐτὰρ θάρσος ἐνέπνευσεν μέγα δαίμων.
  382. οἱ μὲν μοχλὸν ἑλόντες ἐλάινον, ὀξὺν ἐπʼ ἄκρῳ,
  383. ὀφθαλμῷ ἐνέρεισαν· ἐγὼ δʼ ἐφύπερθεν ἐρεισθεὶς
  384. δίνεον, ὡς ὅτε τις τρυπῷ δόρυ νήιον ἀνὴρ
  385. τρυπάνῳ, οἱ δέ τʼ ἔνερθεν ὑποσσείουσιν ἱμάντι
  386. ἁψάμενοι ἑκάτερθε, τὸ δὲ τρέχει ἐμμενὲς αἰεί.
  387. ὣς τοῦ ἐν ὀφθαλμῷ πυριήκεα μοχλὸν ἑλόντες
  388. δινέομεν, τὸν δʼ αἷμα περίρρεε θερμὸν ἐόντα.
  389. πάντα δέ οἱ βλέφαρʼ ἀμφὶ καὶ ὀφρύας εὗσεν ἀυτμὴ
  390. γλήνης καιομένης, σφαραγεῦντο δέ οἱ πυρὶ ῥίζαι.
  391. ὡς δʼ ὅτʼ ἀνὴρ χαλκεὺς πέλεκυν μέγαν ἠὲ σκέπαρνον
  392. εἰν ὕδατι ψυχρῷ βάπτῃ μεγάλα ἰάχοντα
  393. φαρμάσσων· τὸ γὰρ αὖτε σιδήρου γε κράτος ἐστίν
  394. ὣς τοῦ σίζʼ ὀφθαλμὸς ἐλαϊνέῳ περὶ μοχλῷ.
  395. σμερδαλέον δὲ μέγʼ ᾤμωξεν, περὶ δʼ ἴαχε πέτρη,
  396. ἡμεῖς δὲ δείσαντες ἀπεσσύμεθʼ· αὐτὰρ ὁ μοχλὸν
  397. ἐξέρυσʼ ὀφθαλμοῖο πεφυρμένον αἵματι πολλῷ.
  398. τὸν μὲν ἔπειτʼ ἔρριψεν ἀπὸ ἕο χερσὶν ἀλύων,
  399. αὐτὰρ ὁ Κύκλωπας μεγάλʼ ἤπυεν, οἵ ῥά μιν ἀμφὶς
  400. ᾤκεον ἐν σπήεσσι διʼ ἄκριας ἠνεμοέσσας.
  401. οἱ δὲ βοῆς ἀίοντες ἐφοίτων ἄλλοθεν ἄλλος,
  402. ἱστάμενοι δʼ εἴροντο περὶ σπέος ὅττι ἑ κήδοι·
  403. τίπτε τόσον, Πολύφημʼ, ἀρημένος ὧδʼ ἐβόησας
  404. νύκτα διʼ ἀμβροσίην καὶ ἀύπνους ἄμμε τίθησθα;
  405. ἦ μή τίς σευ μῆλα βροτῶν ἀέκοντος ἐλαύνει;
  406. ἦ μή τίς σʼ αὐτὸν κτείνει δόλῳ ἠὲ βίηφιν;
  407. τοὺς δʼ αὖτʼ ἐξ ἄντρου προσέφη κρατερὸς Πολύφημος·
  408. ὦ φίλοι, Οὖτίς με κτείνει δόλῳ οὐδὲ βίηφιν.
  409. οἱ δʼ ἀπαμειβόμενοι ἔπεα πτερόεντʼ ἀγόρευον·
  410. εἰ μὲν δὴ μή τίς σε βιάζεται οἶον ἐόντα,
  411. νοῦσον γʼ οὔ πως ἔστι Διὸς μεγάλου ἀλέασθαι,
  412. ἀλλὰ σύ γʼ εὔχεο πατρὶ Ποσειδάωνι ἄνακτι.
  413. ὣς ἄρʼ ἔφαν ἀπιόντες, ἐμὸν δʼ ἐγέλασσε φίλον κῆρ,
  414. ὡς ὄνομʼ ἐξαπάτησεν ἐμὸν καὶ μῆτις ἀμύμων.
  415. Κύκλωψ δὲ στενάχων τε καὶ ὠδίνων ὀδύνῃσι
  416. χερσὶ ψηλαφόων ἀπὸ μὲν λίθον εἷλε θυράων,
  417. αὐτὸς δʼ εἰνὶ θύρῃσι καθέζετο χεῖρε πετάσσας,
  418. εἴ τινά που μετʼ ὄεσσι λάβοι στείχοντα θύραζε·
  419. οὕτω γάρ πού μʼ ἤλπετʼ ἐνὶ φρεσὶ νήπιον εἶναι.
  420. αὐτὰρ ἐγὼ βούλευον, ὅπως ὄχʼ ἄριστα γένοιτο,
  421. εἴ τινʼ ἑταίροισιν θανάτου λύσιν ἠδʼ ἐμοὶ αὐτῷ
  422. εὑροίμην· πάντας δὲ δόλους καὶ μῆτιν ὕφαινον
  423. ὥς τε περὶ ψυχῆς· μέγα γὰρ κακὸν ἐγγύθεν ἦεν.
  424. ἥδε δέ μοι κατὰ θυμὸν ἀρίστη φαίνετο βουλή.
  425. ἄρσενες ὄιες ἦσαν ἐυτρεφέες, δασύμαλλοι,
  426. καλοί τε μεγάλοι τε, ἰοδνεφὲς εἶρος ἔχοντες·
  427. τοὺς ἀκέων συνέεργον ἐυστρεφέεσσι λύγοισιν,
  428. τῇς ἔπι Κύκλωψ εὗδε πέλωρ, ἀθεμίστια εἰδώς,
  429. σύντρεις αἰνύμενος· ὁ μὲν ἐν μέσῳ ἄνδρα φέρεσκε,
  430. τὼ δʼ ἑτέρω ἑκάτερθεν ἴτην σώοντες ἑταίρους.
  431. τρεῖς δὲ ἕκαστον φῶτʼ ὄιες φέρον· αὐτὰρ ἐγώ γε—
  432. ἀρνειὸς γὰρ ἔην μήλων ὄχʼ ἄριστος ἁπάντων,
  433. τοῦ κατὰ νῶτα λαβών, λασίην ὑπὸ γαστέρʼ ἐλυσθεὶς
  434. κείμην· αὐτὰρ χερσὶν ἀώτου θεσπεσίοιο
  435. νωλεμέως στρεφθεὶς ἐχόμην τετληότι θυμῷ.
  436. ὣς τότε μὲν στενάχοντες ἐμείναμεν Ἠῶ δῖαν.
  437. ἦμος δʼ ἠριγένεια φάνη ῥοδοδάκτυλος Ἠώς,
  438. καὶ τότʼ ἔπειτα νομόνδʼ ἐξέσσυτο ἄρσενα μῆλα,
  439. θήλειαι δὲ μέμηκον ἀνήμελκτοι περὶ σηκούς·
  440. οὔθατα γὰρ σφαραγεῦντο. ἄναξ δʼ ὀδύνῃσι κακῇσι
  441. τειρόμενος πάντων ὀίων ἐπεμαίετο νῶτα
  442. ὀρθῶν ἑσταότων· τὸ δὲ νήπιος οὐκ ἐνόησεν,
  443. ὥς οἱ ὑπʼ εἰροπόκων ὀίων στέρνοισι δέδεντο.
  444. ὕστατος ἀρνειὸς μήλων ἔστειχε θύραζε
  445. λάχνῳ στεινόμενος καὶ ἐμοὶ πυκινὰ φρονέοντι.
  446. τὸν δʼ ἐπιμασσάμενος προσέφη κρατερὸς Πολύφημος·
  447. κριὲ πέπον, τί μοι ὧδε διὰ σπέος ἔσσυο μήλων
  448. ὕστατος; οὔ τι πάρος γε λελειμμένος ἔρχεαι οἰῶν,
  449. ἀλλὰ πολὺ πρῶτος νέμεαι τέρενʼ ἄνθεα ποίης
  450. μακρὰ βιβάς, πρῶτος δὲ ῥοὰς ποταμῶν ἀφικάνεις,
  451. πρῶτος δὲ σταθμόνδε λιλαίεαι ἀπονέεσθαι
  452. ἑσπέριος· νῦν αὖτε πανύστατος. ἦ σύ γʼ ἄνακτος
  453. ὀφθαλμὸν ποθέεις, τὸν ἀνὴρ κακὸς ἐξαλάωσε
  454. σὺν λυγροῖς ἑτάροισι δαμασσάμενος φρένας οἴνῳ,
  455. Οὖτις, ὃν οὔ πώ φημι πεφυγμένον εἶναι ὄλεθρον.
  456. εἰ δὴ ὁμοφρονέοις ποτιφωνήεις τε γένοιο
  457. εἰπεῖν ὅππῃ κεῖνος ἐμὸν μένος ἠλασκάζει·
  458. τῷ κέ οἱ ἐγκέφαλός γε διὰ σπέος ἄλλυδις ἄλλῃ
  459. θεινομένου ῥαίοιτο πρὸς οὔδεϊ, κὰδ δέ κʼ ἐμὸν κῆρ
  460. λωφήσειε κακῶν, τά μοι οὐτιδανὸς πόρεν Οὖτις.
  461. ὣς εἰπὼν τὸν κριὸν ἀπὸ ἕο πέμπε θύραζε.
  462. ἐλθόντες δʼ ἠβαιὸν ἀπὸ σπείους τε καὶ αὐλῆς
  463. πρῶτος ὑπʼ ἀρνειοῦ λυόμην, ὑπέλυσα δʼ ἑταίρους.
  464. καρπαλίμως δὲ τὰ μῆλα ταναύποδα, πίονα δημῷ,
  465. πολλὰ περιτροπέοντες ἐλαύνομεν, ὄφρʼ ἐπὶ νῆα
  466. ἱκόμεθʼ. ἀσπάσιοι δὲ φίλοις ἑτάροισι φάνημεν,
  467. οἳ φύγομεν θάνατον, τοὺς δὲ στενάχοντο γοῶντες.
  468. ἀλλʼ ἐγὼ οὐκ εἴων, ἀνὰ δʼ ὀφρύσι νεῦον ἑκάστῳ,
  469. κλαίειν, ἀλλʼ ἐκέλευσα θοῶς καλλίτριχα μῆλα
  470. πόλλʼ ἐν νηὶ βαλόντας ἐπιπλεῖν ἁλμυρὸν ὕδωρ.
  471. οἱ δʼ αἶψʼ εἴσβαινον καὶ ἐπὶ κληῖσι καθῖζον,
  472. ἑξῆς δʼ ἑζόμενοι πολιὴν ἅλα τύπτον ἐρετμοῖς.
  473. ἀλλʼ ὅτε τόσσον ἀπῆν, ὅσσον τε γέγωνε βοήσας,
  474. καὶ τότʼ ἐγὼ Κύκλωπα προσηύδων κερτομίοισι·
  475. Κύκλωψ, οὐκ ἄρʼ ἔμελλες ἀνάλκιδος ἀνδρὸς ἑταίρους
  476. ἔδμεναι ἐν σπῆι γλαφυρῷ κρατερῆφι βίηφι.
  477. καὶ λίην σέ γʼ ἔμελλε κιχήσεσθαι κακὰ ἔργα,
  478. σχέτλιʼ, ἐπεὶ ξείνους οὐχ ἅζεο σῷ ἐνὶ οἴκῳ
  479. ἐσθέμεναι· τῷ σε Ζεὺς τίσατο καὶ θεοὶ ἄλλοι.
  480. ὣς ἐφάμην, ὁ δʼ ἔπειτα χολώσατο κηρόθι μᾶλλον,
  481. ἧκε δʼ ἀπορρήξας κορυφὴν ὄρεος μεγάλοιο,
  482. κὰδ δʼ ἔβαλε προπάροιθε νεὸς κυανοπρῴροιο
  483. τυτθόν, ἐδεύησεν δʼ οἰήιον ἄκρον ἱκέσθαι,
  484. ἐκλύσθη δὲ θάλασσα κατερχομένης ὑπὸ πέτρης·
  485. τὴν δʼ αἶψʼ ἤπειρόνδε παλιρρόθιον φέρε κῦμα,
  486. πλημυρὶς ἐκ πόντοιο, θέμωσε δὲ χέρσον ἱκέσθαι.
  487. αὐτὰρ ἐγὼ χείρεσσι λαβὼν περιμήκεα κοντὸν
  488. ὦσα παρέξ, ἑτάροισι δʼ ἐποτρύνας ἐκέλευσα
  489. ἐμβαλέειν κώπῃς, ἵνʼ ὑπὲκ κακότητα φύγοιμεν,
  490. κρατὶ κατανεύων· οἱ δὲ προπεσόντες ἔρεσσον.
  491. ἀλλʼ ὅτε δὴ δὶς τόσσον ἅλα πρήσσοντες ἀπῆμεν,
  492. καὶ τότε δὴ Κύκλωπα προσηύδων· ἀμφὶ δʼ ἑταῖροι
  493. μειλιχίοις ἐπέεσσιν ἐρήτυον ἄλλοθεν ἄλλος·
  494. σχέτλιε, τίπτʼ ἐθέλεις ἐρεθιζέμεν ἄγριον ἄνδρα;
  495. ὃς καὶ νῦν πόντονδε βαλὼν βέλος ἤγαγε νῆα
  496. αὖτις ἐς ἤπειρον, καὶ δὴ φάμεν αὐτόθʼ ὀλέσθαι.
  497. εἰ δὲ φθεγξαμένου τευ ἢ αὐδήσαντος ἄκουσε,
  498. σύν κεν ἄραξʼ ἡμέων κεφαλὰς καὶ νήια δοῦρα
  499. μαρμάρῳ ὀκριόεντι βαλών· τόσσον γὰρ ἵησιν.
  500. ὣς φάσαν, ἀλλʼ οὐ πεῖθον ἐμὸν μεγαλήτορα θυμόν,
  501. ἀλλά μιν ἄψορρον προσέφην κεκοτηότι θυμῷ·
  502. Κύκλωψ, αἴ κέν τίς σε καταθνητῶν ἀνθρώπων
  503. ὀφθαλμοῦ εἴρηται ἀεικελίην ἀλαωτύν,
  504. φάσθαι Ὀδυσσῆα πτολιπόρθιον ἐξαλαῶσαι,
  505. υἱὸν Λαέρτεω, Ἰθάκῃ ἔνι οἰκίʼ ἔχοντα.
  506. ὣς ἐφάμην, ὁ δέ μʼ οἰμώξας ἠμείβετο μύθῳ·
  507. ὢ πόποι, ἦ μάλα δή με παλαίφατα θέσφαθʼ ἱκάνει.
  508. ἔσκε τις ἐνθάδε μάντις ἀνὴρ ἠύς τε μέγας τε,
  509. Τήλεμος Εὐρυμίδης, ὃς μαντοσύνῃ ἐκέκαστο
  510. καὶ μαντευόμενος κατεγήρα Κυκλώπεσσιν·
  511. ὅς μοι ἔφη τάδε πάντα τελευτήσεσθαι ὀπίσσω,
  512. χειρῶν ἐξ Ὀδυσῆος ἁμαρτήσεσθαι ὀπωπῆς.
  513. ἀλλʼ αἰεί τινα φῶτα μέγαν καὶ καλὸν ἐδέγμην
  514. ἐνθάδʼ ἐλεύσεσθαι, μεγάλην ἐπιειμένον ἀλκήν·
  515. νῦν δέ μʼ ἐὼν ὀλίγος τε καὶ οὐτιδανὸς καὶ ἄκικυς
  516. ὀφθαλμοῦ ἀλάωσεν, ἐπεί μʼ ἐδαμάσσατο οἴνῳ.
  517. ἀλλʼ ἄγε δεῦρʼ, Ὀδυσεῦ, ἵνα τοι πὰρ ξείνια θείω
  518. πομπήν τʼ ὀτρύνω δόμεναι κλυτὸν ἐννοσίγαιον·
  519. τοῦ γὰρ ἐγὼ πάϊς εἰμί, πατὴρ δʼ ἐμὸς εὔχεται εἶναι.
  520. αὐτὸς δʼ, αἴ κʼ ἐθέλῃσʼ, ἰήσεται, οὐδέ τις ἄλλος
  521. οὔτε θεῶν μακάρων οὔτε θνητῶν ἀνθρώπων.
  522. ὣς ἔφατʼ, αὐτὰρ ἐγώ μιν ἀμειβόμενος προσέειπον·
  523. αἲ γὰρ δὴ ψυχῆς τε καὶ αἰῶνός σε δυναίμην
  524. εὖνιν ποιήσας πέμψαι δόμον Ἄϊδος εἴσω,
  525. ὡς οὐκ ὀφθαλμόν γʼ ἰήσεται οὐδʼ ἐνοσίχθων.
  526. ὣς ἐφάμην, ὁ δʼ ἔπειτα Ποσειδάωνι ἄνακτι
  527. εὔχετο χεῖρʼ ὀρέγων εἰς οὐρανὸν ἀστερόεντα·
  528. κλῦθι, Ποσείδαον γαιήοχε κυανοχαῖτα,
  529. εἰ ἐτεόν γε σός εἰμι, πατὴρ δʼ ἐμὸς εὔχεαι εἶναι,
  530. δὸς μὴ Ὀδυσσῆα πτολιπόρθιον οἴκαδʼ ἱκέσθαι
  531. υἱὸν Λαέρτεω, Ἰθάκῃ ἔνι οἰκίʼ ἔχοντα.
  532. ἀλλʼ εἴ οἱ μοῖρʼ ἐστὶ φίλους τʼ ἰδέειν καὶ ἱκέσθαι
  533. οἶκον ἐυκτίμενον καὶ ἑὴν ἐς πατρίδα γαῖαν,
  534. ὀψὲ κακῶς ἔλθοι, ὀλέσας ἄπο πάντας ἑταίρους,
  535. νηὸς ἐπʼ ἀλλοτρίης, εὕροι δʼ ἐν πήματα οἴκῳ.
  536. ὣς ἔφατʼ εὐχόμενος, τοῦ δʼ ἔκλυε κυανοχαίτης.
  537. αὐτὰρ ὅ γʼ ἐξαῦτις πολὺ μείζονα λᾶαν ἀείρας
  538. ἧκʼ ἐπιδινήσας, ἐπέρεισε δὲ ἶνʼ ἀπέλεθρον,
  539. κὰδʼ δʼ ἔβαλεν μετόπισθε νεὸς κυανοπρῴροιο
  540. τυτθόν, ἐδεύησεν δʼ οἰήιον ἄκρον ἱκέσθαι.
  541. ἐκλύσθη δὲ θάλασσα κατερχομένης ὑπὸ πέτρης·
  542. τὴν δὲ πρόσω φέρε κῦμα, θέμωσε δὲ χέρσον ἱκέσθαι.
  543. ἀλλʼ ὅτε δὴ τὴν νῆσον ἀφικόμεθʼ, ἔνθα περ ἄλλαι
  544. νῆες ἐύσσελμοι μένον ἁθρόαι, ἀμφὶ δʼ ἑταῖροι
  545. ἥατʼ ὀδυρόμενοι, ἡμέας ποτιδέγμενοι αἰεί,
  546. νῆα μὲν ἔνθʼ ἐλθόντες ἐκέλσαμεν ἐν ψαμάθοισιν,
  547. ἐκ δὲ καὶ αὐτοὶ βῆμεν ἐπὶ ῥηγμῖνι θαλάσσης.
  548. μῆλα δὲ Κύκλωπος γλαφυρῆς ἐκ νηὸς ἑλόντες
  549. δασσάμεθʼ, ὡς μή τίς μοι ἀτεμβόμενος κίοι ἴσης.
  550. ἀρνειὸν δʼ ἐμοὶ οἴῳ ἐυκνήμιδες ἑταῖροι
  551. μήλων δαιομένων δόσαν ἔξοχα· τὸν δʼ ἐπὶ θινὶ
  552. Ζηνὶ κελαινεφέι Κρονίδῃ, ὃς πᾶσιν ἀνάσσει,
  553. ῥέξας μηρίʼ ἔκαιον· ὁ δʼ οὐκ ἐμπάζετο ἱρῶν,
  554. ἀλλʼ ὅ γε μερμήριξεν ὅπως ἀπολοίατο πᾶσαι
  555. νῆες ἐύσσελμοι καὶ ἐμοὶ ἐρίηρες ἑταῖροι.
  556. ὣς τότε μὲν πρόπαν ἦμαρ ἐς ἠέλιον καταδύντα
  557. ἥμεθα δαινύμενοι κρέα τʼ ἄσπετα καὶ μέθυ ἡδύ·
  558. ἦμος δʼ ἠέλιος κατέδυ καὶ ἐπὶ κνέφας ἦλθε,
  559. δὴ τότε κοιμήθημεν ἐπὶ ῥηγμῖνι θαλάσσης.
  560. ἦμος δʼ ἠριγένεια φάνη ῥοδοδάκτυλος Ἠώς,
  561. δὴ τότʼ ἐγὼν ἑτάροισιν ἐποτρύνας ἐκέλευσα
  562. αὐτούς τʼ ἀμβαίνειν ἀνά τε πρυμνήσια λῦσαι·
  563. οἱ δʼ αἶψʼ εἴσβαινον καὶ ἐπὶ κληῖσι καθῖζον,
  564. ἑξῆς δʼ ἑζόμενοι πολιὴν ἅλα τύπτον ἐρετμοῖς.
  565. ἔνθεν δὲ προτέρω πλέομεν ἀκαχήμενοι ἦτορ,
  566. ἄσμενοι ἐκ θανάτοιο, φίλους ὀλέσαντες ἑταίρους.
  • Αἰολίην δʼ ἐς νῆσον ἀφικόμεθʼ· ἔνθα δʼ ἔναιεν
  • Αἴολος Ἱπποτάδης, φίλος ἀθανάτοισι θεοῖσιν,
  • πλωτῇ ἐνὶ νήσῳ· πᾶσαν δέ τέ μιν πέρι τεῖχος
  • χάλκεον ἄρρηκτον, λισσὴ δʼ ἀναδέδρομε πέτρη.
  • τοῦ καὶ δώδεκα παῖδες ἐνὶ μεγάροις γεγάασιν,
  • ἓξ μὲν θυγατέρες, ἓξ δʼ υἱέες ἡβώοντες·
  • ἔνθʼ ὅ γε θυγατέρας πόρεν υἱάσιν εἶναι ἀκοίτις.
  • οἱ δʼ αἰεὶ παρὰ πατρὶ φίλῳ καὶ μητέρι κεδνῇ
  • δαίνυνται, παρὰ δέ σφιν ὀνείατα μυρία κεῖται,
  • κνισῆεν δέ τε δῶμα περιστεναχίζεται αὐλῇ
  • ἤματα· νύκτας δʼ αὖτε παρʼ αἰδοίῃς ἀλόχοισιν
  • εὕδουσʼ ἔν τε τάπησι καὶ ἐν τρητοῖσι λέχεσσι.
  • καὶ μὲν τῶν ἱκόμεσθα πόλιν καὶ δώματα καλά.
  • μῆνα δὲ πάντα φίλει με καὶ ἐξερέεινεν ἕκαστα,
  • Ἴλιον Ἀργείων τε νέας καὶ νόστον Ἀχαιῶν·
  • καὶ μὲν ἐγὼ τῷ πάντα κατὰ μοῖραν κατέλεξα.
  • ἀλλʼ ὅτε δὴ καὶ ἐγὼν ὁδὸν ᾔτεον ἠδʼ ἐκέλευον
  • πεμπέμεν, οὐδέ τι κεῖνος ἀνήνατο, τεῦχε δὲ πομπήν.
  • δῶκε δέ μʼ ἐκδείρας ἀσκὸν βοὸς ἐννεώροιο,
  • ἔνθα δὲ βυκτάων ἀνέμων κατέδησε κέλευθα·
  • κεῖνον γὰρ ταμίην ἀνέμων ποίησε Κρονίων,
  • ἠμὲν παυέμεναι ἠδʼ ὀρνύμεν, ὅν κʼ ἐθέλῃσι.
  • νηὶ δʼ ἐνὶ γλαφυρῇ κατέδει μέρμιθι φαεινῇ
  • ἀργυρέῃ, ἵνα μή τι παραπνεύσῃ ὀλίγον περ·
  • αὐτὰρ ἐμοὶ πνοιὴν Ζεφύρου προέηκεν ἀῆναι,
  • ὄφρα φέροι νῆάς τε καὶ αὐτούς· οὐδʼ ἄρʼ ἔμελλεν
  • ἐκτελέειν· αὐτῶν γὰρ ἀπωλόμεθʼ ἀφραδίῃσιν.
  • ἐννῆμαρ μὲν ὁμῶς πλέομεν νύκτας τε καὶ ἦμαρ,
  • τῇ δεκάτῃ δʼ ἤδη ἀνεφαίνετο πατρὶς ἄρουρα,
  • καὶ δὴ πυρπολέοντας ἐλεύσσομεν ἐγγὺς ἐόντες·
  • ἔνθʼ ἐμὲ μὲν γλυκὺς ὕπνος ἐπήλυθε κεκμηῶτα,
  • αἰεὶ γὰρ πόδα νηὸς ἐνώμων, οὐδέ τῳ ἄλλῳ
  • δῶχʼ ἑτάρων, ἵνα θᾶσσον ἱκοίμεθα πατρίδα γαῖαν·
  • οἱ δʼ ἕταροι ἐπέεσσι πρὸς ἀλλήλους ἀγόρευον,
  • καί μʼ ἔφασαν χρυσόν τε καὶ ἄργυρον οἴκαδʼ ἄγεσθαι
  • δῶρα παρʼ Αἰόλου μεγαλήτορος Ἱπποτάδαο.
  • ὧδε δέ τις εἴπεσκεν ἰδὼν ἐς πλησίον ἄλλον·
  • ὦ πόποι, ὡς ὅδε πᾶσι φίλος καὶ τίμιός ἐστιν
  • ἀνθρώποις, ὅτεών τε πόλιν καὶ γαῖαν ἵκηται.
  • πολλὰ μὲν ἐκ Τροίης ἄγεται κειμήλια καλὰ
  • ληίδος, ἡμεῖς δʼ αὖτε ὁμὴν ὁδὸν ἐκτελέσαντες
  • οἴκαδε νισσόμεθα κενεὰς σὺν χεῖρας ἔχοντες·
  • καὶ νῦν οἱ τάδʼ ἔδωκε χαριζόμενος φιλότητι
  • Αἴολος. ἀλλʼ ἄγε θᾶσσον ἰδώμεθα ὅττι τάδʼ ἐστίν,
  • ὅσσος τις χρυσός τε καὶ ἄργυρος ἀσκῷ ἔνεστιν.
  • ὣς ἔφασαν, βουλὴ δὲ κακὴ νίκησεν ἑταίρων·
  • ἀσκὸν μὲν λῦσαν, ἄνεμοι δʼ ἐκ πάντες ὄρουσαν.
  • τοὺς δʼ αἶψʼ ἁρπάξασα φέρεν πόντονδε θύελλα
  • κλαίοντας, γαίης ἄπο πατρίδος. αὐτὰρ ἐγώ γε
  • ἐγρόμενος κατὰ θυμὸν ἀμύμονα μερμήριξα,
  • ἠὲ πεσὼν ἐκ νηὸς ἀποφθίμην ἐνὶ πόντῳ,
  • ἦ ἀκέων τλαίην καὶ ἔτι ζωοῖσι μετείην.
  • ἀλλʼ ἔτλην καὶ ἔμεινα, καλυψάμενος δʼ ἐνὶ νηὶ
  • κείμην. αἱ δʼ ἐφέροντο κακῇ ἀνέμοιο θυέλλῃ
  • αὖτις ἐπʼ Αἰολίην νῆσον, στενάχοντο δʼ ἑταῖροι.
  • ἔνθα δʼ ἐπʼ ἠπείρου βῆμεν καὶ ἀφυσσάμεθʼ ὕδωρ,
  • αἶψα δὲ δεῖπνον ἕλοντο θοῇς παρὰ νηυσὶν ἑταῖροι.
  • αὐτὰρ ἐπεὶ σίτοιό τʼ ἐπασσάμεθʼ ἠδὲ ποτῆτος,
  • δὴ τότʼ ἐγὼ κήρυκά τʼ ὀπασσάμενος καὶ ἑταῖρον
  • βῆν εἰς Αἰόλου κλυτὰ δώματα· τὸν δʼ ἐκίχανον
  • δαινύμενον παρὰ ᾗ τʼ ἀλόχῳ καὶ οἷσι τέκεσσιν.
  • ἐλθόντες δʼ ἐς δῶμα παρὰ σταθμοῖσιν ἐπʼ οὐδοῦ
  • ἑζόμεθʼ· οἱ δʼ ἀνὰ θυμὸν ἐθάμβεον ἔκ τʼ ἐρέοντο·
  • πῶς ἦλθες, Ὀδυσεῦ; τίς τοι κακὸς ἔχραε δαίμων;
  • ἦ μέν σʼ ἐνδυκέως ἀπεπέμπομεν, ὄφρʼ ἀφίκοιο
  • πατρίδα σὴν καὶ δῶμα καὶ εἴ πού τοι φίλον ἐστίν.
  • ὣς φάσαν, αὐτὰρ ἐγὼ μετεφώνεον ἀχνύμενος κῆρ·
  • ἄασάν μʼ ἕταροί τε κακοὶ πρὸς τοῖσί τε ὕπνος
  • σχέτλιος. ἀλλʼ ἀκέσασθε, φίλοι· δύναμις γὰρ ἐν ὑμῖν.
  • ὣς ἐφάμην μαλακοῖσι καθαπτόμενος ἐπέεσσιν,
  • οἱ δʼ ἄνεῳ ἐγένοντο· πατὴρ δʼ ἠμείβετο μύθῳ·
  • ἔρρʼ ἐκ νήσου θᾶσσον, ἐλέγχιστε ζωόντων·
  • οὐ γάρ μοι θέμις ἐστὶ κομιζέμεν οὐδʼ ἀποπέμπειν
  • ἄνδρα τόν, ὅς κε θεοῖσιν ἀπέχθηται μακάρεσσιν·
  • ἔρρε, ἐπεὶ ἄρα θεοῖσιν ἀπεχθόμενος τόδʼ ἱκάνεις.
  • ὣς εἰπὼν ἀπέπεμπε δόμων βαρέα στενάχοντα.
  • ἔνθεν δὲ προτέρω πλέομεν ἀκαχήμενοι ἦτορ.
  • τείρετο δʼ ἀνδρῶν θυμὸς ὑπʼ εἰρεσίης ἀλεγεινῆς
  • ἡμετέρῃ ματίῃ, ἐπεὶ οὐκέτι φαίνετο πομπή.
  • ἑξῆμαρ μὲν ὁμῶς πλέομεν νύκτας τε καὶ ἦμαρ,
  • ἑβδομάτῃ δʼ ἱκόμεσθα Λάμου αἰπὺ πτολίεθρον,
  • Τηλέπυλον Λαιστρυγονίην, ὅθι ποιμένα ποιμὴν
  • ἠπύει εἰσελάων, ὁ δέ τʼ ἐξελάων ὑπακούει.
  • ἔνθα κʼ ἄυπνος ἀνὴρ δοιοὺς ἐξήρατο μισθούς,
  • τὸν μὲν βουκολέων, τὸν δʼ ἄργυφα μῆλα νομεύων·
  • ἐγγὺς γὰρ νυκτός τε καὶ ἤματός εἰσι κέλευθοι.
  • ἔνθʼ ἐπεὶ ἐς λιμένα κλυτὸν ἤλθομεν, ὃν πέρι πέτρη
  • ἠλίβατος τετύχηκε διαμπερὲς ἀμφοτέρωθεν,
  • ἀκταὶ δὲ προβλῆτες ἐναντίαι ἀλλήλῃσιν
  • ἐν στόματι προύχουσιν, ἀραιὴ δʼ εἴσοδός ἐστιν,
  • ἔνθʼ οἵ γʼ εἴσω πάντες ἔχον νέας ἀμφιελίσσας.
  • αἱ μὲν ἄρʼ ἔντοσθεν λιμένος κοίλοιο δέδεντο
  • πλησίαι· οὐ μὲν γάρ ποτʼ ἀέξετο κῦμά γʼ ἐν αὐτῷ,
  • οὔτε μέγʼ οὔτʼ ὀλίγον, λευκὴ δʼ ἦν ἀμφὶ γαλήνη·
  • αὐτὰρ ἐγὼν οἶος σχέθον ἔξω νῆα μέλαιναν,
  • αὐτοῦ ἐπʼ ἐσχατιῇ, πέτρης ἐκ πείσματα δήσας·
  • ἔστην δὲ σκοπιὴν ἐς παιπαλόεσσαν ἀνελθών.
  • ἔνθα μὲν οὔτε βοῶν οὔτʼ ἀνδρῶν φαίνετο ἔργα,
  • καπνὸν δʼ οἶον ὁρῶμεν ἀπὸ χθονὸς ἀίσσοντα.
  • δὴ τότʼ ἐγὼν ἑτάρους προΐειν πεύθεσθαι ἰόντας,
  • οἵ τινες ἀνέρες εἶεν ἐπὶ χθονὶ σῖτον ἔδοντες,
  • ἄνδρε δύω κρίνας, τρίτατον κήρυχʼ ἅμʼ ὀπάσσας.
  • οἱ δʼ ἴσαν ἐκβάντες λείην ὁδόν, ᾗ περ ἄμαξαι
  • ἄστυδʼ ἀφʼ ὑψηλῶν ὀρέων καταγίνεον ὕλην,
  • κούρῃ δὲ ξύμβληντο πρὸ ἄστεος ὑδρευούσῃ,
  • θυγατέρʼ ἰφθίμῃ Λαιστρυγόνος Ἀντιφάταο.
  • ἡ μὲν ἄρʼ ἐς κρήνην κατεβήσετο καλλιρέεθρον
  • Ἀρτακίην· ἔνθεν γὰρ ὕδωρ προτὶ ἄστυ φέρεσκον·
  • οἱ δὲ παριστάμενοι προσεφώνεον ἔκ τʼ ἐρέοντο
  • ὅς τις τῶνδʼ εἴη βασιλεὺς καὶ οἷσιν ἀνάσσοι·
  • ἡ δὲ μάλʼ αὐτίκα πατρὸς ἐπέφραδεν ὑψερεφὲς δῶ.
  • οἱ δʼ ἐπεὶ εἰσῆλθον κλυτὰ δώματα, τὴν δὲ γυναῖκα
  • εὗρον, ὅσην τʼ ὄρεος κορυφήν, κατὰ δʼ ἔστυγον αὐτήν.
  • ἡ δʼ αἶψʼ ἐξ ἀγορῆς ἐκάλει κλυτὸν Ἀντιφατῆα,
  • ὃν πόσιν, ὃς δὴ τοῖσιν ἐμήσατο λυγρὸν ὄλεθρον.
  • αὐτίχʼ ἕνα μάρψας ἑτάρων ὡπλίσσατο δεῖπνον·
  • τὼ δὲ δύʼ ἀίξαντε φυγῇ ἐπὶ νῆας ἱκέσθην.
  • αὐτὰρ ὁ τεῦχε βοὴν διὰ ἄστεος· οἱ δʼ ἀίοντες
  • φοίτων ἴφθιμοι Λαιστρυγόνες ἄλλοθεν ἄλλος,
  • μυρίοι, οὐκ ἄνδρεσσιν ἐοικότες, ἀλλὰ Γίγασιν.
  • οἵ ῥʼ ἀπὸ πετράων ἀνδραχθέσι χερμαδίοισιν
  • βάλλον· ἄφαρ δὲ κακὸς κόναβος κατὰ νῆας ὀρώρει
  • ἀνδρῶν τʼ ὀλλυμένων νηῶν θʼ ἅμα ἀγνυμενάων·
  • ἰχθῦς δʼ ὣς πείροντες ἀτερπέα δαῖτα φέροντο.
  • ὄφρʼ οἱ τοὺς ὄλεκον λιμένος πολυβενθέος ἐντός,
  • τόφρα δʼ ἐγὼ ξίφος ὀξὺ ἐρυσσάμενος παρὰ μηροῦ
  • τῷ ἀπὸ πείσματʼ ἔκοψα νεὸς κυανοπρῴροιο.
  • αἶψα δʼ ἐμοῖς ἑτάροισιν ἐποτρύνας ἐκέλευσα
  • ἐμβαλέειν κώπῃς, ἵνʼ ὑπὲκ κακότητα φύγοιμεν·
  • οἱ δʼ ἅλα πάντες ἀνέρριψαν, δείσαντες ὄλεθρον.
  • ἀσπασίως δʼ ἐς πόντον ἐπηρεφέας φύγε πέτρας
  • νηῦς ἐμή· αὐτὰρ αἱ ἄλλαι ἀολλέες αὐτόθʼ ὄλοντο.
  • ἔνθεν δὲ προτέρω πλέομεν ἀκαχήμενοι ἦτορ,
  • ἄσμενοι ἐκ θανάτοιο, φίλους ὀλέσαντες ἑταίρους.
  • Αἰαίην δʼ ἐς νῆσον ἀφικόμεθʼ· ἔνθα δʼ ἔναιε
  • Κίρκη ἐυπλόκαμος, δεινὴ θεὸς αὐδήεσσα,
  • αὐτοκασιγνήτη ὀλοόφρονος Αἰήταο·
  • ἄμφω δʼ ἐκγεγάτην φαεσιμβρότου Ἠελίοιο
  • μητρός τʼ ἐκ Πέρσης, τὴν Ὠκεανὸς τέκε παῖδα.
  • ἔνθα δʼ ἐπʼ ἀκτῆς νηὶ κατηγαγόμεσθα σιωπῇ
  • ναύλοχον ἐς λιμένα, καί τις θεὸς ἡγεμόνευεν.
  • ἔνθα τότʼ ἐκβάντες δύο τʼ ἤματα καὶ δύο νύκτας
  • κείμεθʼ ὁμοῦ καμάτῳ τε καὶ ἄλγεσι θυμὸν ἔδοντες.
  • ἀλλʼ ὅτε δὴ τρίτον ἦμαρ ἐυπλόκαμος τέλεσʼ Ἠώς,
  • καὶ τότʼ ἐγὼν ἐμὸν ἔγχος ἑλὼν καὶ φάσγανον ὀξὺ
  • καρπαλίμως παρὰ νηὸς ἀνήιον ἐς περιωπήν,
  • εἴ πως ἔργα ἴδοιμι βροτῶν ἐνοπήν τε πυθοίμην.
  • ἔστην δὲ σκοπιὴν ἐς παιπαλόεσσαν ἀνελθών,
  • καί μοι ἐείσατο καπνὸς ἀπὸ χθονὸς εὐρυοδείης,
  • Κίρκης ἐν μεγάροισι, διὰ δρυμὰ πυκνὰ καὶ ὕλην.
  • μερμήριξα δʼ ἔπειτα κατὰ φρένα καὶ κατὰ θυμὸν
  • ἐλθεῖν ἠδὲ πυθέσθαι, ἐπεὶ ἴδον αἴθοπα καπνόν.
  • ὧδε δέ μοι φρονέοντι δοάσσατο κέρδιον εἶναι,
  • πρῶτʼ ἐλθόντʼ ἐπὶ νῆα θοὴν καὶ θῖνα θαλάσσης
  • δεῖπνον ἑταίροισιν δόμεναι προέμεν τε πυθέσθαι.
  • ἀλλʼ ὅτε δὴ σχεδὸν ἦα κιὼν νεὸς ἀμφιελίσσης,
  • καὶ τότε τίς με θεῶν ὀλοφύρατο μοῦνον ἐόντα,
  • ὅς ῥά μοι ὑψίκερων ἔλαφον μέγαν εἰς ὁδὸν αὐτὴν
  • ἧκεν. ὁ μὲν ποταμόνδε κατήιεν ἐκ νομοῦ ὕλης
  • πιόμενος· δὴ γάρ μιν ἔχεν μένος ἠελίοιο.
  • τὸν δʼ ἐγὼ ἐκβαίνοντα κατʼ ἄκνηστιν μέσα νῶτα
  • πλῆξα· τὸ δʼ ἀντικρὺ δόρυ χάλκεον ἐξεπέρησε,
  • κὰδ δʼ ἔπεσʼ ἐν κονίῃσι μακών, ἀπὸ δʼ ἔπτατο θυμός.
  • τῷ δʼ ἐγὼ ἐμβαίνων δόρυ χάλκεον ἐξ ὠτειλῆς
  • εἰρυσάμην· τὸ μὲν αὖθι κατακλίνας ἐπὶ γαίῃ
  • εἴασʼ· αὐτὰρ ἐγὼ σπασάμην ῥῶπάς τε λύγους τε,
  • πεῖσμα δʼ, ὅσον τʼ ὄργυιαν, ἐυστρεφὲς ἀμφοτέρωθεν
  • πλεξάμενος συνέδησα πόδας δεινοῖο πελώρου,
  • βῆν δὲ καταλοφάδεια φέρων ἐπὶ νῆα μέλαιναν
  • ἔγχει ἐρειδόμενος, ἐπεὶ οὔ πως ἦεν ἐπʼ ὤμου
  • χειρὶ φέρειν ἑτέρῃ· μάλα γὰρ μέγα θηρίον ἦεν.
  • κὰδʼ δʼ ἔβαλον προπάροιθε νεός, ἀνέγειρα δʼ ἑταίρους
  • μειλιχίοις ἐπέεσσι παρασταδὸν ἄνδρα ἕκαστον·
  • ὦ φίλοι, οὐ γάρ πω καταδυσόμεθʼ ἀχνύμενοί περ
  • εἰς Ἀίδαο δόμους, πρὶν μόρσιμον ἦμαρ ἐπέλθῃ·
  • ἀλλʼ ἄγετʼ, ὄφρʼ ἐν νηὶ θοῇ βρῶσίς τε πόσις τε,
  • μνησόμεθα βρώμης, μηδὲ τρυχώμεθα λιμῷ.
  • ὣς ἐφάμην, οἱ δʼ ὦκα ἐμοῖς ἐπέεσσι πίθοντο,
  • ἐκ δὲ καλυψάμενοι παρὰ θῖνʼ ἁλὸς ἀτρυγέτοιο
  • θηήσαντʼ ἔλαφον· μάλα γὰρ μέγα θηρίον ἦεν.
  • αὐτὰρ ἐπεὶ τάρπησαν ὁρώμενοι ὀφθαλμοῖσιν,
  • χεῖρας νιψάμενοι τεύχοντʼ ἐρικυδέα δαῖτα.
  • ὣς τότε μὲν πρόπαν ἦμαρ ἐς ἠέλιον καταδύντα
  • ἥμεθα δαινύμενοι κρέα τʼ ἄσπετα καὶ μέθυ ἡδύ·
  • ἦμος δʼ ἠέλιος κατέδυ καὶ ἐπὶ κνέφας ἦλθε,
  • δὴ τότε κοιμήθημεν ἐπὶ ῥηγμῖνι θαλάσσης.
  • ἦμος δʼ ἠριγένεια φάνη ῥοδοδάκτυλος Ἠώς,
  • καὶ τότʼ ἐγὼν ἀγορὴν θέμενος μετὰ πᾶσιν ἔειπον·
  • κέκλυτέ μευ μύθων, κακά περ πάσχοντες ἑταῖροι·
  • ὦ φίλοι, οὐ γάρ τʼ ἴδμεν, ὅπῃ ζόφος οὐδʼ ὅπῃ ἠώς,
  • οὐδʼ ὅπῃ ἠέλιος φαεσίμβροτος εἶσʼ ὑπὸ γαῖαν,
  • οὐδʼ ὅπῃ ἀννεῖται· ἀλλὰ φραζώμεθα θᾶσσον
  • εἴ τις ἔτʼ ἔσται μῆτις. ἐγὼ δʼ οὔκ οἴομαι εἶναι.
  • εἶδον γὰρ σκοπιὴν ἐς παιπαλόεσσαν ἀνελθὼν
  • νῆσον, τὴν πέρι πόντος ἀπείριτος ἐστεφάνωται·
  • αὐτὴ δὲ χθαμαλὴ κεῖται· καπνὸν δʼ ἐνὶ μέσσῃ
  • ἔδρακον ὀφθαλμοῖσι διὰ δρυμὰ πυκνὰ καὶ ὕλην.
  • ὣς ἐφάμην, τοῖσιν δὲ κατεκλάσθη φίλον ἦτορ
  • μνησαμένοις ἔργων Λαιστρυγόνος Ἀντιφάταο
  • Κύκλωπός τε βίης μεγαλήτορος, ἀνδροφάγοιο.
  • κλαῖον δὲ λιγέως θαλερὸν κατὰ δάκρυ χέοντες·
  • ἀλλʼ οὐ γάρ τις πρῆξις ἐγίγνετο μυρομένοισιν.
  • αὐτὰρ ἐγὼ δίχα πάντας ἐυκνήμιδας ἑταίρους
  • ἠρίθμεον, ἀρχὸν δὲ μετʼ ἀμφοτέροισιν ὄπασσα·
  • τῶν μὲν ἐγὼν ἦρχον, τῶν δʼ Εὐρύλοχος θεοειδής.
  • κλήρους δʼ ἐν κυνέῃ χαλκήρεϊ πάλλομεν ὦκα·
  • ἐκ δʼ ἔθορε κλῆρος μεγαλήτορος Εὐρυλόχοιο.
  • βῆ δʼ ἰέναι, ἅμα τῷ γε δύω καὶ εἴκοσʼ ἑταῖροι
  • κλαίοντες· κατὰ δʼ ἄμμε λίπον γοόωντας ὄπισθεν.
  • εὗρον δʼ ἐν βήσσῃσι τετυγμένα δώματα Κίρκης
  • ξεστοῖσιν λάεσσι, περισκέπτῳ ἐνὶ χώρῳ·
  • ἀμφὶ δέ μιν λύκοι ἦσαν ὀρέστεροι ἠδὲ λέοντες,
  • τοὺς αὐτὴ κατέθελξεν, ἐπεὶ κακὰ φάρμακʼ ἔδωκεν.
  • οὐδʼ οἵ γʼ ὡρμήθησαν ἐπʼ ἀνδράσιν, ἀλλʼ ἄρα τοί γε
  • οὐρῇσιν μακρῇσι περισσαίνοντες ἀνέσταν.
  • ὡς δʼ ὅτʼ ἂν ἀμφὶ ἄνακτα κύνες δαίτηθεν ἰόντα
  • σαίνωσʼ, αἰεὶ γάρ τε φέρει μειλίγματα θυμοῦ,
  • ὣς τοὺς ἀμφὶ λύκοι κρατερώνυχες ἠδὲ λέοντες
  • σαῖνον· τοὶ δʼ ἔδεισαν, ἐπεὶ ἴδον αἰνὰ πέλωρα.
  • ἔσταν δʼ ἐν προθύροισι θεᾶς καλλιπλοκάμοιο,
  • Κίρκης δʼ ἔνδον ἄκουον ἀειδούσης ὀπὶ καλῇ,
  • ἱστὸν ἐποιχομένης μέγαν ἄμβροτον, οἷα θεάων
  • λεπτά τε καὶ χαρίεντα καὶ ἀγλαὰ ἔργα πέλονται.
  • τοῖσι δὲ μύθων ἦρχε Πολίτης ὄρχαμος ἀνδρῶν,
  • ὅς μοι κήδιστος ἑτάρων ἦν κεδνότατός τε·
  • ὦ φίλοι, ἔνδον γάρ τις ἐποιχομένη μέγαν ἱστὸν
  • καλὸν ἀοιδιάει, δάπεδον δʼ ἅπαν ἀμφιμέμυκεν,
  • ἢ θεὸς ἠὲ γυνή· ἀλλὰ φθεγγώμεθα θᾶσσον.
  • ὣς ἄρʼ ἐφώνησεν, τοὶ δὲ φθέγγοντο καλεῦντες.
  • ἡ δʼ αἶψʼ ἐξελθοῦσα θύρας ὤιξε φαεινὰς
  • καὶ κάλει· οἱ δʼ ἅμα πάντες ἀιδρείῃσιν ἕποντο·
  • Εὐρύλοχος δʼ ὑπέμεινεν, ὀισάμενος δόλον εἶναι.
  • εἷσεν δʼ εἰσαγαγοῦσα κατὰ κλισμούς τε θρόνους τε,
  • ἐν δέ σφιν τυρόν τε καὶ ἄλφιτα καὶ μέλι χλωρὸν
  • οἴνῳ Πραμνείῳ ἐκύκα· ἀνέμισγε δὲ σίτῳ
  • φάρμακα λύγρʼ, ἵνα πάγχυ λαθοίατο πατρίδος αἴης.
  • αὐτὰρ ἐπεὶ δῶκέν τε καὶ ἔκπιον, αὐτίκʼ ἔπειτα
  • ῥάβδῳ πεπληγυῖα κατὰ συφεοῖσιν ἐέργνυ.
  • οἱ δὲ συῶν μὲν ἔχον κεφαλὰς φωνήν τε τρίχας τε
  • καὶ δέμας, αὐτὰρ νοῦς ἦν ἔμπεδος, ὡς τὸ πάρος περ.
  • ὣς οἱ μὲν κλαίοντες ἐέρχατο, τοῖσι δὲ Κίρκη
  • πάρ ῥʼ ἄκυλον βάλανόν τε βάλεν καρπόν τε κρανείης
  • ἔδμεναι, οἷα σύες χαμαιευνάδες αἰὲν ἔδουσιν.
  • Εὐρύλοχος δʼ αἶψʼ ἦλθε θοὴν ἐπὶ νῆα μέλαιναν
  • ἀγγελίην ἑτάρων ἐρέων καὶ ἀδευκέα πότμον.
  • οὐδέ τι ἐκφάσθαι δύνατο ἔπος ἱέμενός περ,
  • κῆρ ἄχεϊ μεγάλῳ βεβολημένος· ἐν δέ οἱ ὄσσε
  • δακρυόφιν πίμπλαντο, γόον δʼ ὠίετο θυμός.
  • ἀλλʼ ὅτε δή μιν πάντες ἀγασσάμεθʼ ἐξερέοντες,
  • καὶ τότε τῶν ἄλλων ἑτάρων κατέλεξεν ὄλεθρον·
  • ἤιομεν, ὡς ἐκέλευες, ἀνὰ δρυμά, φαίδιμʼ Ὀδυσσεῦ·
  • εὕρομεν ἐν βήσσῃσι τετυγμένα δώματα καλὰ
  • ξεστοῖσιν λάεσσι, περισκέπτῳ ἐνὶ χώρῳ.
  • ἔνθα δέ τις μέγαν ἱστὸν ἐποιχομένη λίγʼ ἄειδεν,
  • ἢ θεὸς ἠὲ γυνή· τοὶ δὲ φθέγγοντο καλεῦντες.
  • ἡ δʼ αἶψʼ ἐξελθοῦσα θύρας ὤιξε φαεινὰς
  • καὶ κάλει· οἱ δʼ ἅμα πάντες ἀιδρείῃσιν ἕποντο·
  • αὐτὰρ ἐγὼν ὑπέμεινα, ὀισάμενος δόλον εἶναι.
  • οἱ δʼ ἅμʼ ἀιστώθησαν ἀολλέες, οὐδέ τις αὐτῶν
  • ἐξεφάνη· δηρὸν δὲ καθήμενος ἐσκοπίαζον.
  • ὣς ἔφατʼ, αὐτὰρ ἐγὼ περὶ μὲν ξίφος ἀργυρόηλον
  • ὤμοιιν βαλόμην, μέγα χάλκεον, ἀμφὶ δὲ τόξα·
  • τὸν δʼ ἂψ ἠνώγεα αὐτὴν ὁδὸν ἡγήσασθαι.
  • αὐτὰρ ὅ γʼ ἀμφοτέρῃσι λαβὼν ἐλλίσσετο γούνων
  • καί μʼ ὀλοφυρόμενος ἔπεα πτερόεντα προσηύδα·
  • μή μʼ ἄγε κεῖσʼ ἀέκοντα, διοτρεφές, ἀλλὰ λίπʼ αὐτοῦ.
  • οἶδα γάρ, ὡς οὔτʼ αὐτὸς ἐλεύσεαι οὔτε τινʼ ἄλλον
  • ἄξεις σῶν ἑτάρων. ἀλλὰ ξὺν τοίσδεσι θᾶσσον
  • φεύγωμεν· ἔτι γάρ κεν ἀλύξαιμεν κακὸν ἦμαρ.
  • ὣς ἔφατʼ, αὐτὰρ ἐγώ μιν ἀμειβόμενος προσέειπον·
  • Εὐρύλοχʼ, ἦ τοι μὲν σὺ μένʼ αὐτοῦ τῷδʼ ἐνὶ χώρῳ
  • ἔσθων καὶ πίνων κοίλῃ παρὰ νηὶ μελαίνῃ·
  • αὐτὰρ ἐγὼν εἶμι, κρατερὴ δέ μοι ἔπλετʼ ἀνάγκη.
  • ὣς εἰπὼν παρὰ νηὸς ἀνήιον ἠδὲ θαλάσσης.
  • ἀλλʼ ὅτε δὴ ἄρʼ ἔμελλον ἰὼν ἱερὰς ἀνὰ βήσσας
  • Κίρκης ἵξεσθαι πολυφαρμάκου ἐς μέγα δῶμα,
  • ἔνθα μοι Ἑρμείας χρυσόρραπις ἀντεβόλησεν
  • ἐρχομένῳ πρὸς δῶμα, νεηνίῃ ἀνδρὶ ἐοικώς,
  • πρῶτον ὑπηνήτῃ, τοῦ περ χαριεστάτη ἥβη·
  • ἔν τʼ ἄρα μοι φῦ χειρί, ἔπος τʼ ἔφατʼ ἔκ τʼ ὀνόμαζε·
  • πῇ δὴ αὖτʼ, ὦ δύστηνε, διʼ ἄκριας ἔρχεαι οἶος,
  • χώρου ἄιδρις ἐών; ἕταροι δέ τοι οἵδʼ ἐνὶ Κίρκης
  • ἔρχαται ὥς τε σύες πυκινοὺς κευθμῶνας ἔχοντες.
  • ἦ τοὺς λυσόμενος δεῦρʼ ἔρχεαι; οὐδέ σέ φημι
  • αὐτὸν νοστήσειν, μενέεις δὲ σύ γʼ, ἔνθα περ ἄλλοι.
  • ἀλλʼ ἄγε δή σε κακῶν ἐκλύσομαι ἠδὲ σαώσω.
  • τῆ, τόδε φάρμακον ἐσθλὸν ἔχων ἐς δώματα Κίρκης
  • ἔρχευ, ὅ κέν τοι κρατὸς ἀλάλκῃσιν κακὸν ἦμαρ.
  • πάντα δέ τοι ἐρέω ὀλοφώια δήνεα Κίρκης.
  • τεύξει τοι κυκεῶ, βαλέει δʼ ἐν φάρμακα σίτῳ.
  • ἀλλʼ οὐδʼ ὣς θέλξαι σε δυνήσεται· οὐ γὰρ ἐάσει
  • φάρμακον ἐσθλόν, ὅ τοι δώσω, ἐρέω δὲ ἕκαστα.
  • ὁππότε κεν Κίρκη σʼ ἐλάσῃ περιμήκεϊ ῥάβδῳ,
  • δὴ τότε σὺ ξίφος ὀξὺ ἐρυσσάμενος παρὰ μηροῦ
  • Κίρκῃ ἐπαῖξαι, ὥς τε κτάμεναι μενεαίνων.
  • ἡ δέ σʼ ὑποδείσασα κελήσεται εὐνηθῆναι·
  • ἔνθα σὺ μηκέτʼ ἔπειτʼ ἀπανήνασθαι θεοῦ εὐνήν,
  • ὄφρα κέ τοι λύσῃ θʼ ἑτάρους αὐτόν τε κομίσσῃ·
  • ἀλλὰ κέλεσθαί μιν μακάρων μέγαν ὅρκον ὀμόσσαι,
  • μή τί τοι αὐτῷ πῆμα κακὸν βουλευσέμεν ἄλλο,
  • μή σʼ ἀπογυμνωθέντα κακὸν καὶ ἀνήνορα θήῃ.
  • ὣς ἄρα φωνήσας πόρε φάρμακον ἀργεϊφόντης
  • ἐκ γαίης ἐρύσας, καί μοι φύσιν αὐτοῦ ἔδειξε.
  • ῥίζῃ μὲν μέλαν ἔσκε, γάλακτι δὲ εἴκελον ἄνθος·
  • μῶλυ δέ μιν καλέουσι θεοί· χαλεπὸν δέ τʼ ὀρύσσειν
  • ἀνδράσι γε θνητοῖσι, θεοὶ δέ τε πάντα δύνανται.
  • Ἑρμείας μὲν ἔπειτʼ ἀπέβη πρὸς μακρὸν Ὄλυμπον
  • νῆσον ἀνʼ ὑλήεσσαν, ἐγὼ δʼ ἐς δώματα Κίρκης
  • ἤια, πολλὰ δέ μοι κραδίη πόρφυρε κιόντι.
  • ἔστην δʼ εἰνὶ θύρῃσι θεᾶς καλλιπλοκάμοιο·
  • ἔνθα στὰς ἐβόησα, θεὰ δέ μευ ἔκλυεν αὐδῆς.
  • ἡ δʼ αἶψʼ ἐξελθοῦσα θύρας ὤιξε φαεινὰς
  • καὶ κάλει· αὐτὰρ ἐγὼν ἑπόμην ἀκαχήμενος ἦτορ.
  • εἷσε δέ μʼ εἰσαγαγοῦσα ἐπὶ θρόνου ἀργυροήλου
  • καλοῦ δαιδαλέου· ὑπὸ δὲ θρῆνυς ποσὶν ἦεν·
  • τεῦχε δέ μοι κυκεῶ χρυσέῳ δέπαι, ὄφρα πίοιμι,
  • ἐν δέ τε φάρμακον ἧκε, κακὰ φρονέουσʼ ἐνὶ θυμῷ.
  • αὐτὰρ ἐπεὶ δῶκέν τε καὶ ἔκπιον, οὐδέ μʼ ἔθελξε,
  • ῥάβδῳ πεπληγυῖα ἔπος τʼ ἔφατʼ ἔκ τʼ ὀνόμαζεν·
  • ἔρχεο νῦν συφεόνδε, μετʼ ἄλλων λέξο ἑταίρων.
  • ὣς φάτʼ, ἐγὼ δʼ ἄορ ὀξὺ ἐρυσσάμενος παρὰ μηροῦ
  • Κίρκῃ ἐπήιξα ὥς τε κτάμεναι μενεαίνων.
  • ἡ δὲ μέγα ἰάχουσα ὑπέδραμε καὶ λάβε γούνων,
  • καί μʼ ὀλοφυρομένη ἔπεα πτερόεντα προσηύδα·
  • τίς πόθεν εἰς ἀνδρῶν; πόθι τοι πόλις ἠδὲ τοκῆες;
  • θαῦμά μʼ ἔχει ὡς οὔ τι πιὼν τάδε φάρμακʼ ἐθέλχθης·
  • οὐδὲ γὰρ οὐδέ τις ἄλλος ἀνὴρ τάδε φάρμακʼ ἀνέτλη,
  • ὅς κε πίῃ καὶ πρῶτον ἀμείψεται ἕρκος ὀδόντων.
  • σοὶ δέ τις ἐν στήθεσσιν ἀκήλητος νόος ἐστίν.
  • ἦ σύ γʼ Ὀδυσσεύς ἐσσι πολύτροπος, ὅν τέ μοι αἰεὶ
  • φάσκεν ἐλεύσεσθαι χρυσόρραπις ἀργεϊφόντης,
  • ἐκ Τροίης ἀνιόντα θοῇ σὺν νηὶ μελαίνῃ.
  • ἀλλʼ ἄγε δὴ κολεῷ μὲν ἄορ θέο, νῶι δʼ ἔπειτα
  • εὐνῆς ἡμετέρης ἐπιβείομεν, ὄφρα μιγέντε
  • εὐνῇ καὶ φιλότητι πεποίθομεν ἀλλήλοισιν.
  • ὣς ἔφατʼ, αὐτὰρ ἐγώ μιν ἀμειβόμενος προσέειπον·
  • ὦ Κίρκη, πῶς γάρ με κέλεαι σοὶ ἤπιον εἶναι,
  • ἥ μοι σῦς μὲν ἔθηκας ἐνὶ μεγάροισιν ἑταίρους,
  • αὐτὸν δʼ ἐνθάδʼ ἔχουσα δολοφρονέουσα κελεύεις
  • ἐς θάλαμόν τʼ ἰέναι καὶ σῆς ἐπιβήμεναι εὐνῆς,
  • ὄφρα με γυμνωθέντα κακὸν καὶ ἀνήνορα θήῃς.
  • οὐδʼ ἂν ἐγώ γʼ ἐθέλοιμι τεῆς ἐπιβήμεναι εὐνῆς,
  • εἰ μή μοι τλαίης γε, θεά, μέγαν ὅρκον ὀμόσσαι
  • μή τί μοι αὐτῷ πῆμα κακὸν βουλευσέμεν ἄλλο.
  • ὣς ἐφάμην, ἡ δʼ αὐτίκʼ ἀπώμνυεν, ὡς ἐκέλευον.
  • αὐτὰρ ἐπεί ῥʼ ὄμοσέν τε τελεύτησέν τε τὸν ὅρκον,
  • καὶ τότʼ ἐγὼ Κίρκης ἐπέβην περικαλλέος εὐνῆς.
  • ἀμφίπολοι δʼ ἄρα τέως μὲν ἐνὶ μεγάροισι πένοντο
  • τέσσαρες, αἵ οἱ δῶμα κάτα δρήστειραι ἔασι·
  • γίγνονται δʼ ἄρα ταί γʼ ἔκ τε κρηνέων ἀπό τʼ ἀλσέων
  • ἔκ θʼ ἱερῶν ποταμῶν, οἵ τʼ εἰς ἅλαδε προρέουσι.
  • τάων ἡ μὲν ἔβαλλε θρόνοις ἔνι ῥήγεα καλὰ
  • πορφύρεα καθύπερθʼ, ὑπένερθε δὲ λῖθʼ ὑπέβαλλεν·
  • ἡ δʼ ἑτέρη προπάροιθε θρόνων ἐτίταινε τραπέζας
  • ἀργυρέας, ἐπὶ δέ σφι τίθει χρύσεια κάνεια·
  • ἡ δὲ τρίτη κρητῆρι μελίφρονα οἶνον ἐκίρνα
  • ἡδὺν ἐν ἀργυρέῳ, νέμε δὲ χρύσεια κύπελλα·
  • ἡ δὲ τετάρτη ὕδωρ ἐφόρει καὶ πῦρ ἀνέκαιε
  • πολλὸν ὑπὸ τρίποδι μεγάλῳ· ἰαίνετο δʼ ὕδωρ.
  • αὐτὰρ ἐπεὶ δὴ ζέσσεν ὕδωρ ἐνὶ ἤνοπι χαλκῷ,
  • ἔς ῥʼ ἀσάμινθον ἕσασα λόʼ ἐκ τρίποδος μεγάλοιο,
  • θυμῆρες κεράσασα, κατὰ κρατός τε καὶ ὤμων,
  • ὄφρα μοι ἐκ κάματον θυμοφθόρον εἵλετο γυίων.
  • αὐτὰρ ἐπεὶ λοῦσέν τε καὶ ἔχρισεν λίπʼ ἐλαίῳ,
  • ἀμφὶ δέ με χλαῖναν καλὴν βάλεν ἠδὲ χιτῶνα,
  • εἷσε δέ μʼ εἰσαγαγοῦσα ἐπὶ θρόνου ἀργυροήλου
  • καλοῦ δαιδαλέου, ὑπὸ δὲ θρῆνυς ποσὶν ἦεν·
  • χέρνιβα δʼ ἀμφίπολος προχόῳ ἐπέχευε φέρουσα
  • καλῇ χρυσείῃ, ὑπὲρ ἀργυρέοιο λέβητος,
  • νίψασθαι· παρὰ δὲ ξεστὴν ἐτάνυσσε τράπεζαν.
  • σῖτον δʼ αἰδοίη ταμίη παρέθηκε φέρουσα,
  • εἴδατα πόλλʼ ἐπιθεῖσα, χαριζομένη παρεόντων.
  • ἐσθέμεναι δʼ ἐκέλευεν· ἐμῷ δʼ οὐχ ἥνδανε θυμῷ,
  • ἀλλʼ ἥμην ἀλλοφρονέων, κακὰ δʼ ὄσσετο θυμός.
  • Κίρκη δʼ ὡς ἐνόησεν ἔμʼ ἥμενον οὐδʼ ἐπὶ σίτῳ
  • χεῖρας ἰάλλοντα, κρατερὸν δέ με πένθος ἔχοντα,
  • ἄγχι παρισταμένη ἔπεα πτερόεντα προσηύδα·
  • τίφθʼ οὕτως, Ὀδυσεῦ, κατʼ ἄρʼ ἕζεαι ἶσος ἀναύδῳ,
  • θυμὸν ἔδων, βρώμης δʼ οὐχ ἅπτεαι οὐδὲ ποτῆτος;
  • ἦ τινά που δόλον ἄλλον ὀίεαι· οὐδέ τί σε χρὴ
  • δειδίμεν· ἤδη γάρ τοι ἀπώμοσα καρτερὸν ὅρκον.
  • ὣς ἔφατʼ, αὐτὰρ ἐγώ μιν ἀμειβόμενος προσέειπον·
  • ὦ Κίρκη, τίς γάρ κεν ἀνήρ, ὃς ἐναίσιμος εἴη,
  • πρὶν τλαίη πάσσασθαι ἐδητύος ἠδὲ ποτῆτος,
  • πρὶν λύσασθʼ ἑτάρους καὶ ἐν ὀφθαλμοῖσιν ἰδέσθαι;
  • ἀλλʼ εἰ δὴ πρόφρασσα πιεῖν φαγέμεν τε κελεύεις,
  • λῦσον, ἵνʼ ὀφθαλμοῖσιν ἴδω ἐρίηρας ἑταίρους.
  • ὣς ἐφάμην, Κίρκη δὲ διὲκ μεγάροιο βεβήκει
  • ῥάβδον ἔχουσʼ ἐν χειρί, θύρας δʼ ἀνέῳξε συφειοῦ,
  • ἐκ δʼ ἔλασεν σιάλοισιν ἐοικότας ἐννεώροισιν.
  • οἱ μὲν ἔπειτʼ ἔστησαν ἐναντίοι, ἡ δὲ διʼ αὐτῶν
  • ἐρχομένη προσάλειφεν ἑκάστῳ φάρμακον ἄλλο.
  • τῶν δʼ ἐκ μὲν μελέων τρίχες ἔρρεον, ἃς πρὶν ἔφυσε
  • φάρμακον οὐλόμενον, τό σφιν πόρε πότνια Κίρκη·
  • ἄνδρες δʼ ἂψ ἐγένοντο νεώτεροι ἢ πάρος ἦσαν,
  • καὶ πολὺ καλλίονες καὶ μείζονες εἰσοράασθαι.
  • ἔγνωσαν δέ μʼ ἐκεῖνοι ἔφυν τʼ ἐν χερσὶν ἕκαστος.
  • πᾶσιν δʼ ἱμερόεις ὑπέδυ γόος, ἀμφὶ δὲ δῶμα
  • σμερδαλέον κονάβιζε· θεὰ δʼ ἐλέαιρε καὶ αὐτή.
  • ἡ δέ μευ ἄγχι στᾶσα προσηύδα δῖα θεάων·
  • διογενὲς Λαερτιάδη, πολυμήχανʼ Ὀδυσσεῦ,
  • ἔρχεο νῦν ἐπὶ νῆα θοὴν καὶ θῖνα θαλάσσης.
  • νῆα μὲν ἂρ πάμπρωτον ἐρύσσατε ἤπειρόνδε,
  • κτήματα δʼ ἐν σπήεσσι πελάσσατε ὅπλα τε πάντα·
  • αὐτὸς δʼ ἂψ ἰέναι καὶ ἄγειν ἐρίηρας ἑταίρους.
  • ὣς ἔφατʼ, αὐτὰρ ἐμοί γʼ ἐπεπείθετο θυμὸς ἀγήνωρ,
  • βῆν δʼ ἰέναι ἐπὶ νῆα θοὴν καὶ θῖνα θαλάσσης.
  • εὗρον ἔπειτʼ ἐπὶ νηὶ θοῇ ἐρίηρας ἑταίρους
  • οἴκτρʼ ὀλοφυρομένους, θαλερὸν κατὰ δάκρυ χέοντας.
  • ὡς δʼ ὅτʼ ἂν ἄγραυλοι πόριες περὶ βοῦς ἀγελαίας,
  • ἐλθούσας ἐς κόπρον, ἐπὴν βοτάνης κορέσωνται,
  • πᾶσαι ἅμα σκαίρουσιν ἐναντίαι· οὐδʼ ἔτι σηκοὶ
  • ἴσχουσʼ, ἀλλʼ ἁδινὸν μυκώμεναι ἀμφιθέουσι·
  • μητέρας· ὣς ἔμʼ ἐκεῖνοι ἐπεὶ ἴδον ὀφθαλμοῖσι,
  • δακρυόεντες ἔχυντο· δόκησε δʼ ἄρα σφίσι θυμὸς
  • ὣς ἔμεν, ὡς εἰ πατρίδʼ ἱκοίατο καὶ πόλιν αὐτὴν
  • τρηχείης Ἰθάκης, ἵνα τʼ ἔτραφεν ἠδʼ ἐγένοντο.
  • καί μʼ ὀλοφυρόμενοι ἔπεα πτερόεντα προσηύδων·
  • σοὶ μὲν νοστήσαντι, διοτρεφές, ὣς ἐχάρημεν,
  • ὡς εἴ τʼ εἰς Ἰθάκην ἀφικοίμεθα πατρίδα γαῖαν·
  • ἀλλʼ ἄγε, τῶν ἄλλων ἑτάρων κατάλεξον ὄλεθρον.
  • ὣς ἔφαν, αὐτὰρ ἐγὼ προσέφην μαλακοῖς ἐπέεσσι·
  • νῆα μὲν ἂρ πάμπρωτον ἐρύσσομεν ἤπειρόνδε,
  • κτήματα δʼ ἐν σπήεσσι πελάσσομεν ὅπλα τε πάντα·
  • αὐτοὶ δʼ ὀτρύνεσθε ἐμοὶ ἅμα πάντες ἕπεσθαι,
  • ὄφρα ἴδηθʼ ἑτάρους ἱεροῖς ἐν δώμασι Κίρκης
  • πίνοντας καὶ ἔδοντας· ἐπηετανὸν γὰρ ἔχουσιν.
  • ὣς ἐφάμην, οἱ δʼ ὦκα ἐμοῖς ἐπέεσσι πίθοντο.
  • Εὐρύλοχος δέ μοι οἶος ἐρύκανε πάντας ἑταίρους·
  • καί σφεας φωνήσας ἔπεα πτερόεντα προσηύδα·
  • ἆ δειλοί, πόσʼ ἴμεν; τί κακῶν ἱμείρετε τούτων;
  • Κίρκης ἐς μέγαρον καταβήμεναι, ἥ κεν ἅπαντας
  • ἢ σῦς ἠὲ λύκους ποιήσεται ἠὲ λέοντας,
  • οἵ κέν οἱ μέγα δῶμα φυλάσσοιμεν καὶ ἀνάγκῃ,
  • ὥς περ Κύκλωψ ἔρξʼ, ὅτε οἱ μέσσαυλον ἵκοντο
  • ἡμέτεροι ἕταροι, σὺν δʼ ὁ θρασὺς εἵπετʼ Ὀδυσσεύς·
  • τούτου γὰρ καὶ κεῖνοι ἀτασθαλίῃσιν ὄλοντο.
  • ὣς ἔφατʼ, αὐτὰρ ἐγώ γε μετὰ φρεσὶ μερμήριξα,
  • σπασσάμενος τανύηκες ἄορ παχέος παρὰ μηροῦ,
  • τῷ οἱ ἀποπλήξας κεφαλὴν οὖδάσδε πελάσσαι,
  • καὶ πηῷ περ ἐόντι μάλα σχεδόν· ἀλλά μʼ ἑταῖροι
  • μειλιχίοις ἐπέεσσιν ἐρήτυον ἄλλοθεν ἄλλος·
  • διογενές, τοῦτον μὲν ἐάσομεν, εἰ σὺ κελεύεις,
  • αὐτοῦ πὰρ νηί τε μένειν καὶ νῆα ἔρυσθαι·
  • ἡμῖν δʼ ἡγεμόνευʼ ἱερὰ πρὸς δώματα Κίρκης.
  • ὣς φάμενοι παρὰ νηὸς ἀνήιον ἠδὲ θαλάσσης.
  • οὐδὲ μὲν Εὐρύλοχος κοίλῃ παρὰ νηὶ λέλειπτο,
  • ἀλλʼ ἕπετʼ· ἔδεισεν γὰρ ἐμὴν ἔκπαγλον ἐνιπήν.
  • τόφρα δὲ τοὺς ἄλλους ἑτάρους ἐν δώμασι Κίρκη
  • ἐνδυκέως λοῦσέν τε καὶ ἔχρισεν λίπʼ ἐλαίῳ,
  • ἀμφὶ δʼ ἄρα χλαίνας οὔλας βάλεν ἠδὲ χιτῶνας·
  • δαινυμένους δʼ ἐὺ πάντας ἐφεύρομεν ἐν μεγάροισιν.
  • οἱ δʼ ἐπεὶ ἀλλήλους εἶδον φράσσαντό τʼ ἐσάντα,
  • κλαῖον ὀδυρόμενοι, περὶ δὲ στεναχίζετο δῶμα.
  • ἡ δέ μευ ἄγχι στᾶσα προσηύδα δῖα θεάων·
  • μηκέτι νῦν θαλερὸν γόον ὄρνυτε· οἶδα καὶ αὐτὴ
  • ἠμὲν ὅσʼ ἐν πόντῳ πάθετʼ ἄλγεα ἰχθυόεντι,
  • ἠδʼ ὅσʼ ἀνάρσιοι ἄνδρες ἐδηλήσαντʼ ἐπὶ χέρσου.
  • ἀλλʼ ἄγετʼ ἐσθίετε βρώμην καὶ πίνετε οἶνον,
  • εἰς ὅ κεν αὖτις θυμὸν ἐνὶ στήθεσσι λάβητε,
  • οἷον ὅτε πρώτιστον ἐλείπετε πατρίδα γαῖαν
  • τρηχείης Ἰθάκης. νῦν δʼ ἀσκελέες καὶ ἄθυμοι,
  • αἰὲν ἄλης χαλεπῆς μεμνημένοι, οὐδέ ποθʼ ὕμιν
  • θυμὸς ἐν εὐφροσύνῃ, ἐπεὶ ἦ μάλα πολλὰ πέποσθε.
  • ὣς ἔφαθʼ, ἡμῖν δʼ αὖτʼ ἐπεπείθετο θυμὸς ἀγήνωρ.
  • ἔνθα μὲν ἤματα πάντα τελεσφόρον εἰς ἐνιαυτὸν
  • ἥμεθα δαινύμενοι κρέα τʼ ἄσπετα καὶ μέθυ ἡδύ·
  • ἀλλʼ ὅτε δή ῥʼ ἐνιαυτὸς ἔην, περὶ δʼ ἔτραπον ὧραι
  • μηνῶν φθινόντων, περὶ δʼ ἤματα μακρὰ τελέσθη,
  • καὶ τότε μʼ ἐκκαλέσαντες ἔφαν ἐρίηρες ἑταῖροι·
  • δαιμόνιʼ, ἤδη νῦν μιμνήσκεο πατρίδος αἴης,
  • εἴ τοι θέσφατόν ἐστι σαωθῆναι καὶ ἱκέσθαι
  • οἶκον ἐς ὑψόροφον καὶ σὴν ἐς πατρίδα γαῖαν.
  • ὣς ἔφαν, αὐτὰρ ἐμοί γʼ ἐπεπείθετο θυμὸς ἀγήνωρ.
  • ὣς τότε μὲν πρόπαν ἦμαρ ἐς ἠέλιον καταδύντα
  • ἥμεθα, δαινύμενοι κρέα τʼ ἄσπετα καὶ μέθυ ἡδύ·
  • ἦμος δʼ ἠέλιος κατέδυ καὶ ἐπὶ κνέφας ἦλθεν,
  • οἱ μὲν κοιμήσαντο κατὰ μέγαρα σκιόεντα.
  • αὐτὰρ ἐγὼ Κίρκης ἐπιβὰς περικαλλέος εὐνῆς
  • γούνων ἐλλιτάνευσα, θεὰ δέ μευ ἔκλυεν αὐδῆς·
  • καί μιν φωνήσας ἔπεα πτερόεντα προσηύδων·
  • ὢ Κίρκη, τέλεσόν μοι ὑπόσχεσιν ἥν περ ὑπέστης,
  • οἴκαδε πεμψέμεναι· θυμὸς δέ μοι ἔσσυται ἤδη,
  • ἠδʼ ἄλλων ἑτάρων, οἵ μευ φθινύθουσι φίλον κῆρ
  • ἀμφʼ ἔμʼ ὀδυρόμενοι, ὅτε που σύ γε νόσφι γένηαι.
  • ὣς ἐφάμην, ἡ δʼ αὐτίκʼ ἀμείβετο δῖα θεάων·
  • διογενὲς Λαερτιάδη, πολυμήχανʼ Ὀδυσσεῦ,
  • μηκέτι νῦν ἀέκοντες ἐμῷ ἐνὶ μίμνετε οἴκῳ.
  • ἀλλʼ ἄλλην χρὴ πρῶτον ὁδὸν τελέσαι καὶ ἱκέσθαι
  • εἰς Ἀίδαο δόμους καὶ ἐπαινῆς Περσεφονείης,
  • ψυχῇ χρησομένους Θηβαίου Τειρεσίαο,
  • μάντηος ἀλαοῦ, τοῦ τε φρένες ἔμπεδοί εἰσι·
  • τῷ καὶ τεθνηῶτι νόον πόρε Περσεφόνεια,
  • οἴῳ πεπνῦσθαι, τοὶ δὲ σκιαὶ ἀίσσουσιν.
  • ὣς ἔφατʼ, αὐτὰρ ἐμοί γε κατεκλάσθη φίλον ἦτορ·
  • κλαῖον δʼ ἐν λεχέεσσι καθήμενος, οὐδέ νύ μοι κῆρ
  • ἤθελʼ ἔτι ζώειν καὶ ὁρᾶν φάος ἠελίοιο.
  • αὐτὰρ ἐπεὶ κλαίων τε κυλινδόμενος τʼ ἐκορέσθην,
  • καὶ τότε δή μιν ἔπεσσιν ἀμειβόμενος προσέειπον·
  • ὢ Κίρκη, τίς γὰρ ταύτην ὁδὸν ἡγεμονεύσει;
  • εἰς Ἄϊδος δʼ οὔ πώ τις ἀφίκετο νηὶ μελαίνῃ.
  • ὣς ἐφάμην, ἡ δʼ αὐτίκʼ ἀμείβετο δῖα θεάων·
  • διογενὲς Λαερτιάδη, πολυμήχανʼ Ὀδυσσεῦ,
  • μή τί τοι ἡγεμόνος γε ποθὴ παρὰ νηὶ μελέσθω,
  • ἱστὸν δὲ στήσας, ἀνά θʼ ἱστία λευκὰ πετάσσας
  • ἧσθαι· τὴν δέ κέ τοι πνοιὴ Βορέαο φέρῃσιν.
  • ἀλλʼ ὁπότʼ ἂν δὴ νηὶ διʼ Ὠκεανοῖο περήσῃς,
  • ἔνθʼ ἀκτή τε λάχεια καὶ ἄλσεα Περσεφονείης,
  • μακραί τʼ αἴγειροι καὶ ἰτέαι ὠλεσίκαρποι,
  • νῆα μὲν αὐτοῦ κέλσαι ἐπʼ Ὠκεανῷ βαθυδίνῃ,
  • αὐτὸς δʼ εἰς Ἀίδεω ἰέναι δόμον εὐρώεντα.
  • ἔνθα μὲν εἰς Ἀχέροντα Πυριφλεγέθων τε ῥέουσιν
  • Κώκυτός θʼ, ὃς δὴ Στυγὸς ὕδατός ἐστιν ἀπορρώξ,
  • πέτρη τε ξύνεσίς τε δύω ποταμῶν ἐριδούπων·
  • ἔνθα δʼ ἔπειθʼ, ἥρως, χριμφθεὶς πέλας, ὥς σε κελεύω,
  • βόθρον ὀρύξαι, ὅσον τε πυγούσιον ἔνθα καὶ ἔνθα,
  • ἀμφʼ αὐτῷ δὲ χοὴν χεῖσθαι πᾶσιν νεκύεσσιν,
  • πρῶτα μελικρήτῳ, μετέπειτα δὲ ἡδέι οἴνῳ,
  • τὸ τρίτον αὖθʼ ὕδατι· ἐπὶ δʼ ἄλφιτα λευκὰ παλύνειν.
  • πολλὰ δὲ γουνοῦσθαι νεκύων ἀμενηνὰ κάρηνα,
  • ἐλθὼν εἰς Ἰθάκην στεῖραν βοῦν, ἥ τις ἀρίστη,
  • ῥέξειν ἐν μεγάροισι πυρήν τʼ ἐμπλησέμεν ἐσθλῶν,
  • Τειρεσίῃ δʼ ἀπάνευθεν ὄιν ἱερευσέμεν οἴῳ
  • παμμέλανʼ, ὃς μήλοισι μεταπρέπει ὑμετέροισιν.
  • αὐτὰρ ἐπὴν εὐχῇσι λίσῃ κλυτὰ ἔθνεα νεκρῶν,
  • ἔνθʼ ὄιν ἀρνειὸν ῥέζειν θῆλύν τε μέλαιναν
  • εἰς Ἔρεβος στρέψας, αὐτὸς δʼ ἀπονόσφι τραπέσθαι
  • ἱέμενος ποταμοῖο ῥοάων· ἔνθα δὲ πολλαὶ
  • ψυχαὶ ἐλεύσονται νεκύων κατατεθνηώτων.
  • δὴ τότʼ ἔπειθʼ ἑτάροισιν ἐποτρῦναι καὶ ἀνῶξαι
  • μῆλα, τὰ δὴ κατάκειτʼ ἐσφαγμένα νηλέι χαλκῷ,
  • δείραντας κατακῆαι, ἐπεύξασθαι δὲ θεοῖσιν,
  • ἰφθίμῳ τʼ Ἀίδῃ καὶ ἐπαινῇ Περσεφονείῃ·
  • αὐτὸς δὲ ξίφος ὀξὺ ἐρυσσάμενος παρὰ μηροῦ
  • ἧσθαι, μηδὲ ἐᾶν νεκύων ἀμενηνὰ κάρηνα
  • αἵματος ἆσσον ἴμεν, πρὶν Τειρεσίαο πυθέσθαι.
  • ἔνθα τοι αὐτίκα μάντις ἐλεύσεται, ὄρχαμε λαῶν,
  • ὅς κέν τοι εἴπῃσιν ὁδὸν καὶ μέτρα κελεύθου
  • νόστον θʼ, ὡς ἐπὶ πόντον ἐλεύσεαι ἰχθυόεντα.
  • ὣς ἔφατʼ, αὐτίκα δὲ χρυσόθρονος ἤλυθεν Ἠώς.
  • ἀμφὶ δέ με χλαῖνάν τε χιτῶνά τε εἵματα ἕσσεν·
  • αὐτὴ δʼ ἀργύφεον φᾶρος μέγα ἕννυτο νύμφη,
  • λεπτὸν καὶ χαρίεν, περὶ δὲ ζώνην βάλετʼ ἰξυῖ
  • καλὴν χρυσείην, κεφαλῇ δʼ ἐπέθηκε καλύπτρην.
  • αὐτὰρ ἐγὼ διὰ δώματʼ ἰὼν ὤτρυνον ἑταίρους
  • μειλιχίοις ἐπέεσσι παρασταδὸν ἄνδρα ἕκαστον·
  • μηκέτι νῦν εὕδοντες ἀωτεῖτε γλυκὺν ὕπνον,
  • ἀλλʼ ἴομεν· δὴ γάρ μοι ἐπέφραδε πότνια Κίρκη.
  • ὣς ἐφάμην, τοῖσιν δʼ ἐπεπείθετο θυμὸς ἀγήνωρ.
  • οὐδὲ μὲν οὐδʼ ἔνθεν περ ἀπήμονας ἦγον ἑταίρους.
  • Ἐλπήνωρ δέ τις ἔσκε νεώτατος, οὔτε τι λίην
  • ἄλκιμος ἐν πολέμῳ οὔτε φρεσὶν ᾗσιν ἀρηρώς·
  • ὅς μοι ἄνευθʼ ἑτάρων ἱεροῖς ἐν δώμασι Κίρκης,
  • ψύχεος ἱμείρων, κατελέξατο οἰνοβαρείων.
  • κινυμένων δʼ ἑτάρων ὅμαδον καὶ δοῦπον ἀκούσας
  • ἐξαπίνης ἀνόρουσε καὶ ἐκλάθετο φρεσὶν ᾗσιν
  • ἄψορρον καταβῆναι ἰὼν ἐς κλίμακα μακρήν,
  • ἀλλὰ καταντικρὺ τέγεος πέσεν· ἐκ δέ οἱ αὐχὴν
  • ἀστραγάλων ἐάγη, ψυχὴ δʼ Ἄϊδόσδε κατῆλθεν.
  • ἐρχομένοισι δὲ τοῖσιν ἐγὼ μετὰ μῦθον ἔειπον·
  • φάσθε νύ που οἶκόνδε φίλην ἐς πατρίδα γαῖαν
  • ἔρχεσθʼ· ἄλλην δʼ ἧμιν ὁδὸν τεκμήρατο Κίρκη,
  • εἰς Ἀίδαο δόμους καὶ ἐπαινῆς Περσεφονείης
  • ψυχῇ χρησομένους Θηβαίου Τειρεσίαο.
  • ὣς ἐφάμην, τοῖσιν δὲ κατεκλάσθη φίλον ἦτορ,
  • ἑζόμενοι δὲ κατʼ αὖθι γόων τίλλοντό τε χαίτας·
  • ἀλλʼ οὐ γάρ τις πρῆξις ἐγίγνετο μυρομένοισιν.
  • ἀλλʼ ὅτε δή ῥʼ ἐπὶ νῆα θοὴν καὶ θῖνα θαλάσσης
  • ᾔομεν ἀχνύμενοι θαλερὸν κατὰ δάκρυ χέοντες,
  • τόφρα δʼ ἄρʼ οἰχομένη Κίρκη παρὰ νηὶ μελαίνῃ
  • ἀρνειὸν κατέδησεν ὄιν θῆλύν τε μέλαιναν,
  • ῥεῖα παρεξελθοῦσα· τίς ἂν θεὸν οὐκ ἐθέλοντα
  • ὀφθαλμοῖσιν ἴδοιτʼ ἢ ἔνθʼ ἢ ἔνθα κιόντα;
    1. αὐτὰρ ἐπεί ῥʼ ἐπὶ νῆα κατήλθομεν ἠδὲ θάλασσαν,
    2. νῆα μὲν ἂρ πάμπρωτον ἐρύσσαμεν εἰς ἅλα δῖαν,
    3. ἐν δʼ ἱστὸν τιθέμεσθα καὶ ἱστία νηὶ μελαίνῃ,
    4. ἐν δὲ τὰ μῆλα λαβόντες ἐβήσαμεν, ἂν δὲ καὶ αὐτοὶ
    5. βαίνομεν ἀχνύμενοι θαλερὸν κατὰ δάκρυ χέοντες.
    6. ἡμῖν δʼ αὖ κατόπισθε νεὸς κυανοπρῴροιο
    7. ἴκμενον οὖρον ἵει πλησίστιον, ἐσθλὸν ἑταῖρον,
    8. Κίρκη εὐπλόκαμος, δεινὴ θεὸς αὐδήεσσα.
    9. ἡμεῖς δʼ ὅπλα ἕκαστα πονησάμενοι κατὰ νῆα
    10. ἥμεθα· τὴν δʼ ἄνεμός τε κυβερνήτης τʼ ἴθυνε.
    11. τῆς δὲ πανημερίης τέταθʼ ἱστία ποντοπορούσης·
    12. δύσετό τʼ ἠέλιος σκιόωντό τε πᾶσαι ἀγυιαί.
    13. ἡ δʼ ἐς πείραθʼ ἵκανε βαθυρρόου Ὠκεανοῖο.
    14. ἔνθα δὲ Κιμμερίων ἀνδρῶν δῆμός τε πόλις τε,
    15. ἠέρι καὶ νεφέλῃ κεκαλυμμένοι· οὐδέ ποτʼ αὐτοὺς
    16. ἠέλιος φαέθων καταδέρκεται ἀκτίνεσσιν,
    17. οὔθʼ ὁπότʼ ἂν στείχῃσι πρὸς οὐρανὸν ἀστερόεντα,
    18. οὔθʼ ὅτʼ ἂν ἂψ ἐπὶ γαῖαν ἀπʼ οὐρανόθεν προτράπηται,
    19. ἀλλʼ ἐπὶ νὺξ ὀλοὴ τέταται δειλοῖσι βροτοῖσι.
    20. νῆα μὲν ἔνθʼ ἐλθόντες ἐκέλσαμεν, ἐκ δὲ τὰ μῆλα
    21. εἱλόμεθʼ· αὐτοὶ δʼ αὖτε παρὰ ῥόον Ὠκεανοῖο
    22. ᾔομεν, ὄφρʼ ἐς χῶρον ἀφικόμεθʼ, ὃν φράσε Κίρκη.
    23. ἔνθʼ ἱερήια μὲν Περιμήδης Εὐρύλοχός τε
    24. ἔσχον· ἐγὼ δʼ ἄορ ὀξὺ ἐρυσσάμενος παρὰ μηροῦ
    25. βόθρον ὄρυξʼ ὅσσον τε πυγούσιον ἔνθα καὶ ἔνθα,
    26. ἀμφʼ αὐτῷ δὲ χοὴν χεόμην πᾶσιν νεκύεσσι,
    27. πρῶτα μελικρήτῳ, μετέπειτα δὲ ἡδέι οἴνῳ,
    28. τὸ τρίτον αὖθʼ ὕδατι· ἐπὶ δʼ ἄλφιτα λευκὰ πάλυνον.
    29. πολλὰ δὲ γουνούμην νεκύων ἀμενηνὰ κάρηνα,
    30. ἐλθὼν εἰς Ἰθάκην στεῖραν βοῦν, ἥ τις ἀρίστη,
    31. ῥέξειν ἐν μεγάροισι πυρήν τʼ ἐμπλησέμεν ἐσθλῶν,
    32. Τειρεσίῃ δʼ ἀπάνευθεν ὄιν ἱερευσέμεν οἴῳ
    33. παμμέλανʼ, ὃς μήλοισι μεταπρέπει ἡμετέροισι.
    34. τοὺς δʼ ἐπεὶ εὐχωλῇσι λιτῇσί τε, ἔθνεα νεκρῶν,
    35. ἐλλισάμην, τὰ δὲ μῆλα λαβὼν ἀπεδειροτόμησα
    36. ἐς βόθρον, ῥέε δʼ αἷμα κελαινεφές· αἱ δʼ ἀγέροντο
    37. ψυχαὶ ὑπὲξ Ἐρέβευς νεκύων κατατεθνηώτων.
    38. νύμφαι τʼ ἠίθεοί τε πολύτλητοί τε γέροντες
    39. παρθενικαί τʼ ἀταλαὶ νεοπενθέα θυμὸν ἔχουσαι,
    40. πολλοὶ δʼ οὐτάμενοι χαλκήρεσιν ἐγχείῃσιν,
    41. ἄνδρες ἀρηίφατοι βεβροτωμένα τεύχεʼ ἔχοντες·
    42. οἳ πολλοὶ περὶ βόθρον ἐφοίτων ἄλλοθεν ἄλλος
    43. θεσπεσίῃ ἰαχῇ· ἐμὲ δὲ χλωρὸν δέος ᾕρει.
    44. δὴ τότʼ ἔπειθʼ ἑτάροισιν ἐποτρύνας ἐκέλευσα
    45. μῆλα, τὰ δὴ κατέκειτʼ ἐσφαγμένα νηλέι χαλκῷ,
    46. δείραντας κατακῆαι, ἐπεύξασθαι δὲ θεοῖσιν,
    47. ἰφθίμῳ τʼ Ἀΐδῃ καὶ ἐπαινῇ Περσεφονείῃ·
    48. αὐτὸς δὲ ξίφος ὀξὺ ἐρυσσάμενος παρὰ μηροῦ
    49. ἥμην, οὐδʼ εἴων νεκύων ἀμενηνὰ κάρηνα
    50. αἵματος ἆσσον ἴμεν, πρὶν Τειρεσίαο πυθέσθαι.
    51. πρώτη δὲ ψυχὴ Ἐλπήνορος ἦλθεν ἑταίρου·
    52. οὐ γάρ πω ἐτέθαπτο ὑπὸ χθονὸς εὐρυοδείης·
    53. σῶμα γὰρ ἐν Κίρκης μεγάρῳ κατελείπομεν ἡμεῖς
    54. ἄκλαυτον καὶ ἄθαπτον, ἐπεὶ πόνος ἄλλος ἔπειγε.
    55. τὸν μὲν ἐγὼ δάκρυσα ἰδὼν ἐλέησά τε θυμῷ,
    56. καί μιν φωνήσας ἔπεα πτερόεντα προσηύδων·
    57. Ἐλπῆνορ, πῶς ἦλθες ὑπὸ ζόφον ἠερόεντα;
    58. ἔφθης πεζὸς ἰὼν ἢ ἐγὼ σὺν νηὶ μελαίνῃ.
    59. ὣς ἐφάμην, ὁ δέ μʼ οἰμώξας ἠμείβετο μύθῳ·
    60. διογενὲς Λαερτιάδη, πολυμήχανʼ Ὀδυσσεῦ,
    61. ἆσέ με δαίμονος αἶσα κακὴ καὶ ἀθέσφατος οἶνος.
    62. Κίρκης δʼ ἐν μεγάρῳ καταλέγμενος οὐκ ἐνόησα
    63. ἄψορρον καταβῆναι ἰὼν ἐς κλίμακα μακρήν,
    64. ἀλλὰ καταντικρὺ τέγεος πέσον· ἐκ δέ μοι αὐχὴν
    65. ἀστραγάλων ἐάγη, ψυχὴ δʼ Ἄϊδόσδε κατῆλθε.
    66. νῦν δέ σε τῶν ὄπιθεν γουνάζομαι, οὐ παρεόντων,
    67. πρός τʼ ἀλόχου καὶ πατρός, ὅ σʼ ἔτρεφε τυτθὸν ἐόντα,
    68. Τηλεμάχου θʼ, ὃν μοῦνον ἐνὶ μεγάροισιν ἔλειπες·
    69. οἶδα γὰρ ὡς ἐνθένδε κιὼν δόμου ἐξ Ἀίδαο
    70. νῆσον ἐς Αἰαίην σχήσεις ἐυεργέα νῆα·
    71. ἔνθα σʼ ἔπειτα, ἄναξ, κέλομαι μνήσασθαι ἐμεῖο.
    72. μή μʼ ἄκλαυτον ἄθαπτον ἰὼν ὄπιθεν καταλείπειν
    73. νοσφισθείς, μή τοί τι θεῶν μήνιμα γένωμαι,
    74. ἀλλά με κακκῆαι σὺν τεύχεσιν, ἅσσα μοι ἔστιν,
    75. σῆμά τέ μοι χεῦαι πολιῆς ἐπὶ θινὶ θαλάσσης,
    76. ἀνδρὸς δυστήνοιο καὶ ἐσσομένοισι πυθέσθαι.
    77. ταῦτά τέ μοι τελέσαι πῆξαί τʼ ἐπὶ τύμβῳ ἐρετμόν,
    78. τῷ καὶ ζωὸς ἔρεσσον ἐὼν μετʼ ἐμοῖς ἑτάροισιν.
    79. ὣς ἔφατʼ, αὐτὰρ ἐγώ μιν ἀμειβόμενος προσέειπον·
    80. ταῦτά τοι, ὦ δύστηνε, τελευτήσω τε καὶ ἔρξω.
    81. νῶι μὲν ὣς ἐπέεσσιν ἀμειβομένω στυγεροῖσιν
    82. ἥμεθʼ, ἐγὼ μὲν ἄνευθεν ἐφʼ αἵματι φάσγανον ἴσχων,
    83. εἴδωλον δʼ ἑτέρωθεν ἑταίρου πόλλʼ ἀγόρευεν·
    84. ἦλθε δʼ ἐπὶ ψυχὴ μητρὸς κατατεθνηυίης,
    85. Αὐτολύκου θυγάτηρ μεγαλήτορος Ἀντίκλεια,
    86. τὴν ζωὴν κατέλειπον ἰὼν εἰς Ἴλιον ἱρήν.
    87. τὴν μὲν ἐγὼ δάκρυσα ἰδὼν ἐλέησά τε θυμῷ·
    88. ἀλλʼ οὐδʼ ὣς εἴων προτέρην, πυκινόν περ ἀχεύων,
    89. αἵματος ἆσσον ἴμεν, πρὶν Τειρεσίαο πυθέσθαι.
    90. ἦλθε δʼ ἐπὶ ψυχὴ Θηβαίου Τειρεσίαο
    91. χρύσεον σκῆπτρον ἔχων, ἐμὲ δʼ ἔγνω καὶ προσέειπεν·
    92. διογενὲς Λαερτιάδη, πολυμήχανʼ Ὀδυσσεῦ,
    93. τίπτʼ αὖτʼ, ὦ δύστηνε, λιπὼν φάος ἠελίοιο
    94. ἤλυθες, ὄφρα ἴδῃ νέκυας καὶ ἀτερπέα χῶρον;
    95. ἀλλʼ ἀποχάζεο βόθρου, ἄπισχε δὲ φάσγανον ὀξύ,
    96. αἵματος ὄφρα πίω καί τοι νημερτέα εἴπω.
    97. ὣς φάτʼ, ἐγὼ δʼ ἀναχασσάμενος ξίφος ἀργυρόηλον
    98. κουλεῷ ἐγκατέπηξʼ. ὁ δʼ ἐπεὶ πίεν αἷμα κελαινόν,
    99. καὶ τότε δή μʼ ἐπέεσσι προσηύδα μάντις ἀμύμων·
    100. νόστον δίζηαι μελιηδέα, φαίδιμʼ Ὀδυσσεῦ·
    101. τὸν δέ τοι ἀργαλέον θήσει θεός· οὐ γὰρ ὀίω
    102. λήσειν ἐννοσίγαιον, ὅ τοι κότον ἔνθετο θυμῷ
    103. χωόμενος ὅτι οἱ υἱὸν φίλον ἐξαλάωσας.
    104. ἀλλʼ ἔτι μέν κε καὶ ὣς κακά περ πάσχοντες ἵκοισθε,
    105. αἴ κʼ ἐθέλῃς σὸν θυμὸν ἐρυκακέειν καὶ ἑταίρων,
    106. ὁππότε κε πρῶτον πελάσῃς ἐυεργέα νῆα
    107. Θρινακίῃ νήσῳ, προφυγὼν ἰοειδέα πόντον,
    108. βοσκομένας δʼ εὕρητε βόας καὶ ἴφια μῆλα
    109. Ἠελίου, ὃς πάντʼ ἐφορᾷ καὶ πάντʼ ἐπακούει.
    110. τὰς εἰ μέν κʼ ἀσινέας ἐάᾳς νόστου τε μέδηαι,
    111. καί κεν ἔτʼ εἰς Ἰθάκην κακά περ πάσχοντες ἵκοισθε·
    112. εἰ δέ κε σίνηαι, τότε τοι τεκμαίρομʼ ὄλεθρον,
    113. νηί τε καὶ ἑτάροις. αὐτὸς δʼ εἴ πέρ κεν ἀλύξῃς,
    114. ὀψὲ κακῶς νεῖαι, ὀλέσας ἄπο πάντας ἑταίρους,
    115. νηὸς ἐπʼ ἀλλοτρίης· δήεις δʼ ἐν πήματα οἴκῳ,
    116. ἄνδρας ὑπερφιάλους, οἵ τοι βίοτον κατέδουσι
    117. μνώμενοι ἀντιθέην ἄλοχον καὶ ἕδνα διδόντες.
    118. ἀλλʼ ἦ τοι κείνων γε βίας ἀποτίσεαι ἐλθών·
    119. αὐτὰρ ἐπὴν μνηστῆρας ἐνὶ μεγάροισι τεοῖσι
    120. κτείνῃς ἠὲ δόλῳ ἢ ἀμφαδὸν ὀξέι χαλκῷ,
    121. ἔρχεσθαι δὴ ἔπειτα λαβὼν ἐυῆρες ἐρετμόν,
    122. εἰς ὅ κε τοὺς ἀφίκηαι οἳ οὐκ ἴσασι θάλασσαν
    123. ἀνέρες, οὐδέ θʼ ἅλεσσι μεμιγμένον εἶδαρ ἔδουσιν·
    124. οὐδʼ ἄρα τοί γʼ ἴσασι νέας φοινικοπαρῄους
    125. οὐδʼ ἐυήρεʼ ἐρετμά, τά τε πτερὰ νηυσὶ πέλονται.
    126. σῆμα δέ τοι ἐρέω μάλʼ ἀριφραδές, οὐδέ σε λήσει·
    127. ὁππότε κεν δή τοι συμβλήμενος ἄλλος ὁδίτης
    128. φήῃ ἀθηρηλοιγὸν ἔχειν ἀνὰ φαιδίμῳ ὤμῳ,
    129. καὶ τότε δὴ γαίῃ πήξας ἐυῆρες ἐρετμόν,
    130. ῥέξας ἱερὰ καλὰ Ποσειδάωνι ἄνακτι,
    131. ἀρνειὸν ταῦρόν τε συῶν τʼ ἐπιβήτορα κάπρον,
    132. οἴκαδʼ ἀποστείχειν ἔρδειν θʼ ἱερᾶς ἑκατόμβας
    133. ἀθανάτοισι θεοῖσι, τοὶ οὐρανὸν εὐρὺν ἔχουσι,
    134. πᾶσι μάλʼ ἑξείης. θάνατος δέ τοι ἐξ ἁλὸς αὐτῷ
    135. ἀβληχρὸς μάλα τοῖος ἐλεύσεται, ὅς κέ σε πέφνῃ
    136. γήραι ὕπο λιπαρῷ ἀρημένον· ἀμφὶ δὲ λαοὶ
    137. ὄλβιοι ἔσσονται. τὰ δέ τοι νημερτέα εἴρω.
    138. ὣς ἔφατʼ, αὐτὰρ ἐγώ μιν ἀμειβόμενος προσέειπον·
    139. Τειρεσίη, τὰ μὲν ἄρ που ἐπέκλωσαν θεοὶ αὐτοί.
    140. ἀλλʼ ἄγε μοι τόδε εἰπὲ καὶ ἀτρεκέως κατάλεξον·
    141. μητρὸς τήνδʼ ὁρόω ψυχὴν κατατεθνηυίης·
    142. ἡ δʼ ἀκέουσʼ ἧσται σχεδὸν αἵματος, οὐδʼ ἑὸν υἱὸν
    143. ἔτλη ἐσάντα ἰδεῖν οὐδὲ προτιμυθήσασθαι.
    144. εἰπέ, ἄναξ, πῶς κέν με ἀναγνοίη τὸν ἐόντα;
    145. ὣς ἐφάμην, ὁ δέ μʼ αὐτίκʼ ἀμειβόμενος προσέειπεν·
    146. ῥηΐδιόν τοι ἔπος ἐρέω καὶ ἐπὶ φρεσὶ θήσω.
    147. ὅν τινα μέν κεν ἐᾷς νεκύων κατατεθνηώτων
    148. αἵματος ἆσσον ἴμεν, ὁ δέ τοι νημερτὲς ἐνίψει·
    149. ᾧ δέ κʼ ἐπιφθονέῃς, ὁ δέ τοι πάλιν εἶσιν ὀπίσσω.
    150. ὣς φαμένη ψυχὴ μὲν ἔβη δόμον Ἄϊδος εἴσω
    151. Τειρεσίαο ἄνακτος, ἐπεὶ κατὰ θέσφατʼ ἔλεξεν·
    152. αὐτὰρ ἐγὼν αὐτοῦ μένον ἔμπεδον, ὄφρʼ ἐπὶ μήτηρ
    153. ἤλυθε καὶ πίεν αἷμα κελαινεφές· αὐτίκα δʼ ἔγνω,
    154. καί μʼ ὀλοφυρομένη ἔπεα πτερόεντα προσηύδα·
    155. τέκνον ἐμόν, πῶς ἦλθες ὑπὸ ζόφον ἠερόεντα
    156. ζωὸς ἐών; χαλεπὸν δὲ τάδε ζωοῖσιν ὁρᾶσθαι.
    157. μέσσῳ γὰρ μεγάλοι ποταμοὶ καὶ δεινὰ ῥέεθρα,
    158. Ὠκεανὸς μὲν πρῶτα, τὸν οὔ πως ἔστι περῆσαι
    159. πεζὸν ἐόντʼ, ἢν μή τις ἔχῃ ἐυεργέα νῆα.
    160. ἦ νῦν δὴ Τροίηθεν ἀλώμενος ἐνθάδʼ ἱκάνεις
    161. νηί τε καὶ ἑτάροισι πολὺν χρόνον; οὐδέ πω ἦλθες
    162. εἰς Ἰθάκην, οὐδʼ εἶδες ἐνὶ μεγάροισι γυναῖκα;
    163. ὣς ἔφατʼ, αὐτὰρ ἐγώ μιν ἀμειβόμενος προσέειπον·
    164. μῆτερ ἐμή, χρειώ με κατήγαγεν εἰς Ἀίδαο
    165. ψυχῇ χρησόμενον Θηβαίου Τειρεσίαο·
    166. οὐ γάρ πω σχεδὸν ἦλθον Ἀχαιΐδος, οὐδέ πω ἁμῆς
    167. γῆς ἐπέβην, ἀλλʼ αἰὲν ἔχων ἀλάλημαι ὀιζύν,
    168. ἐξ οὗ τὰ πρώτισθʼ ἑπόμην Ἀγαμέμνονι δίῳ
    169. Ἴλιον εἰς ἐύπωλον, ἵνα Τρώεσσι μαχοίμην.
    170. ἀλλʼ ἄγε μοι τόδε εἰπὲ καὶ ἀτρεκέως κατάλεξον·
    171. τίς νύ σε κὴρ ἐδάμασσε τανηλεγέος θανάτοιο;
    172. ἦ δολιχὴ νοῦσος, ἦ Ἄρτεμις ἰοχέαιρα
    173. οἷς ἀγανοῖς βελέεσσιν ἐποιχομένη κατέπεφνεν;
    174. εἰπὲ δέ μοι πατρός τε καὶ υἱέος, ὃν κατέλειπον,
    175. ἢ ἔτι πὰρ κείνοισιν ἐμὸν γέρας, ἦέ τις ἤδη
    176. ἀνδρῶν ἄλλος ἔχει, ἐμὲ δʼ οὐκέτι φασὶ νέεσθαι.
    177. εἰπὲ δέ μοι μνηστῆς ἀλόχου βουλήν τε νόον τε,
    178. ἠὲ μένει παρὰ παιδὶ καὶ ἔμπεδα πάντα φυλάσσει
    179. ἦ ἤδη μιν ἔγημεν Ἀχαιῶν ὅς τις ἄριστος.
    180. ὣς ἐφάμην, ἡ δʼ αὐτίκʼ ἀμείβετο πότνια μήτηρ·
    181. καὶ λίην κείνη γε μένει τετληότι θυμῷ
    182. σοῖσιν ἐνὶ μεγάροισιν· ὀιζυραὶ δέ οἱ αἰεὶ
    183. φθίνουσιν νύκτες τε καὶ ἤματα δάκρυ χεούσῃ.
    184. σὸν δʼ οὔ πώ τις ἔχει καλὸν γέρας, ἀλλὰ ἕκηλος
    185. Τηλέμαχος τεμένεα νέμεται καὶ δαῖτας ἐίσας
    186. δαίνυται, ἃς ἐπέοικε δικασπόλον ἄνδρʼ ἀλεγύνειν·
    187. πάντες γὰρ καλέουσι. πατὴρ δὲ σὸς αὐτόθι μίμνει
    188. ἀγρῷ, οὐδὲ πόλινδε κατέρχεται. οὐδέ οἱ εὐναὶ
    189. δέμνια καὶ χλαῖναι καὶ ῥήγεα σιγαλόεντα,
    190. ἀλλʼ ὅ γε χεῖμα μὲν εὕδει ὅθι δμῶες ἐνὶ οἴκῳ,
    191. ἐν κόνι ἄγχι πυρός, κακὰ δὲ χροῒ εἵματα εἷται·
    192. αὐτὰρ ἐπὴν ἔλθῃσι θέρος τεθαλυῖά τʼ ὀπώρη,
    193. πάντῃ οἱ κατὰ γουνὸν ἀλωῆς οἰνοπέδοιο
    194. φύλλων κεκλιμένων χθαμαλαὶ βεβλήαται εὐναί.
    195. ἔνθʼ ὅ γε κεῖτʼ ἀχέων, μέγα δὲ φρεσὶ πένθος ἀέξει
    196. σὸν νόστον ποθέων, χαλεπὸν δʼ ἐπὶ γῆρας ἱκάνει.
    197. οὕτω γὰρ καὶ ἐγὼν ὀλόμην καὶ πότμον ἐπέσπον·
    198. οὔτʼ ἐμέ γʼ ἐν μεγάροισιν ἐύσκοπος ἰοχέαιρα
    199. οἷς ἀγανοῖς βελέεσσιν ἐποιχομένη κατέπεφνεν,
    200. οὔτε τις οὖν μοι νοῦσος ἐπήλυθεν, ἥ τε μάλιστα
    201. τηκεδόνι στυγερῇ μελέων ἐξείλετο θυμόν·
    202. ἀλλά με σός τε πόθος σά τε μήδεα, φαίδιμʼ Ὀδυσσεῦ,
    203. σή τʼ ἀγανοφροσύνη μελιηδέα θυμὸν ἀπηύρα.
    204. ὣς ἔφατʼ, αὐτὰρ ἐγώ γʼ ἔθελον φρεσὶ μερμηρίξας
    205. μητρὸς ἐμῆς ψυχὴν ἑλέειν κατατεθνηυίης.
    206. τρὶς μὲν ἐφωρμήθην, ἑλέειν τέ με θυμὸς ἀνώγει,
    207. τρὶς δέ μοι ἐκ χειρῶν σκιῇ εἴκελον ἢ καὶ ὀνείρῳ
    208. ἔπτατʼ. ἐμοὶ δʼ ἄχος ὀξὺ γενέσκετο κηρόθι μᾶλλον,
    209. καί μιν φωνήσας ἔπεα πτερόεντα προσηύδων·
    210. μῆτερ ἐμή, τί νύ μʼ οὐ μίμνεις ἑλέειν μεμαῶτα,
    211. ὄφρα καὶ εἰν Ἀίδαο φίλας περὶ χεῖρε βαλόντε
    212. ἀμφοτέρω κρυεροῖο τεταρπώμεσθα γόοιο;
    213. ἦ τί μοι εἴδωλον τόδʼ ἀγαυὴ Περσεφόνεια
    214. ὤτρυνʼ, ὄφρʼ ἔτι μᾶλλον ὀδυρόμενος στεναχίζω;
    215. ὣς ἐφάμην, ἡ δʼ αὐτίκʼ ἀμείβετο πότνια μήτηρ·
    216. ὤ μοι, τέκνον ἐμόν, περὶ πάντων κάμμορε φωτῶν,
    217. οὔ τί σε Περσεφόνεια Διὸς θυγάτηρ ἀπαφίσκει,
    218. ἀλλʼ αὕτη δίκη ἐστὶ βροτῶν, ὅτε τίς κε θάνῃσιν·
    219. οὐ γὰρ ἔτι σάρκας τε καὶ ὀστέα ἶνες ἔχουσιν,
    220. ἀλλὰ τὰ μέν τε πυρὸς κρατερὸν μένος αἰθομένοιο
    221. δαμνᾷ, ἐπεί κε πρῶτα λίπῃ λεύκʼ ὀστέα θυμός,
    222. ψυχὴ δʼ ἠύτʼ ὄνειρος ἀποπταμένη πεπότηται.
    223. ἀλλὰ φόωσδε τάχιστα λιλαίεο· ταῦτα δὲ πάντα
    224. ἴσθʼ, ἵνα καὶ μετόπισθε τεῇ εἴπῃσθα γυναικί.
    225. νῶι μὲν ὣς ἐπέεσσιν ἀμειβόμεθʼ, αἱ δὲ γυναῖκες
    226. ἤλυθον, ὤτρυνεν γὰρ ἀγαυὴ Περσεφόνεια,
    227. ὅσσαι ἀριστήων ἄλοχοι ἔσαν ἠδὲ θύγατρες.
    228. αἱ δʼ ἀμφʼ αἷμα κελαινὸν ἀολλέες ἠγερέθοντο,
    229. αὐτὰρ ἐγὼ βούλευον ὅπως ἐρέοιμι ἑκάστην.
    230. ἥδε δέ μοι κατὰ θυμὸν ἀρίστη φαίνετο βουλή·
    231. σπασσάμενος τανύηκες ἄορ παχέος παρὰ μηροῦ
    232. οὐκ εἴων πίνειν ἅμα πάσας αἷμα κελαινόν.
    233. αἱ δὲ προμνηστῖναι ἐπήισαν, ἠδὲ ἑκάστη
    234. ὃν γόνον ἐξαγόρευεν· ἐγὼ δʼ ἐρέεινον ἁπάσας.
    235. ἔνθʼ ἦ τοι πρώτην Τυρὼ ἴδον εὐπατέρειαν,
    236. ἣ φάτο Σαλμωνῆος ἀμύμονος ἔκγονος εἶναι,
    237. φῆ δὲ Κρηθῆος γυνὴ ἔμμεναι Αἰολίδαο·
    238. ἣ ποταμοῦ ἠράσσατʼ Ἐνιπῆος θείοιο,
    239. ὃς πολὺ κάλλιστος ποταμῶν ἐπὶ γαῖαν ἵησι,
    240. καί ῥʼ ἐπʼ Ἐνιπῆος πωλέσκετο καλὰ ῥέεθρα.
    241. τῷ δʼ ἄρα εἰσάμενος γαιήοχος ἐννοσίγαιος
    242. ἐν προχοῇς ποταμοῦ παρελέξατο δινήεντος·
    243. πορφύρεον δʼ ἄρα κῦμα περιστάθη, οὔρεϊ ἶσον,
    244. κυρτωθέν, κρύψεν δὲ θεὸν θνητήν τε γυναῖκα.
    245. λῦσε δὲ παρθενίην ζώνην, κατὰ δʼ ὕπνον ἔχευεν.
    246. αὐτὰρ ἐπεί ῥʼ ἐτέλεσσε θεὸς φιλοτήσια ἔργα,
    247. ἔν τʼ ἄρα οἱ φῦ χειρί, ἔπος τʼ ἔφατʼ ἔκ τʼ ὀνόμαζε·
    248. χαῖρε, γύναι, φιλότητι· περιπλομένου δʼ ἐνιαυτοῦ
    249. τέξεις ἀγλαὰ τέκνα, ἐπεὶ οὐκ ἀποφώλιοι εὐναὶ
    250. ἀθανάτων· σὺ δὲ τοὺς κομέειν ἀτιταλλέμεναί τε.
    251. νῦν δʼ ἔρχευ πρὸς δῶμα, καὶ ἴσχεο μηδʼ ὀνομήνῃς·
    252. αὐτὰρ ἐγώ τοί εἰμι Ποσειδάων ἐνοσίχθων.
    253. ὣς εἰπὼν ὑπὸ πόντον ἐδύσετο κυμαίνοντα.
    254. ἡ δʼ ὑποκυσαμένη Πελίην τέκε καὶ Νηλῆα,
    255. τὼ κρατερὼ θεράποντε Διὸς μεγάλοιο γενέσθην
    256. ἀμφοτέρω· Πελίης μὲν ἐν εὐρυχόρῳ Ἰαωλκῷ
    257. ναῖε πολύρρηνος, ὁ δʼ ἄρʼ ἐν Πύλῳ ἠμαθόεντι.
    258. τοὺς δʼ ἑτέρους Κρηθῆι τέκεν βασίλεια γυναικῶν,
    259. Αἴσονά τʼ ἠδὲ Φέρητʼ Ἀμυθάονά θʼ ἱππιοχάρμην.
    260. τὴν δὲ μετʼ Ἀντιόπην ἴδον, Ἀσωποῖο θύγατρα,
    261. ἣ δὴ καὶ Διὸς εὔχετʼ ἐν ἀγκοίνῃσιν ἰαῦσαι,
    262. καί ῥʼ ἔτεκεν δύο παῖδʼ, Ἀμφίονά τε Ζῆθόν τε,
    263. οἳ πρῶτοι Θήβης ἕδος ἔκτισαν ἑπταπύλοιο,
    264. πύργωσάν τʼ, ἐπεὶ οὐ μὲν ἀπύργωτόν γʼ ἐδύναντο
    265. ναιέμεν εὐρύχορον Θήβην, κρατερώ περ ἐόντε.
    266. τὴν δὲ μετʼ Ἀλκμήνην ἴδον, Ἀμφιτρύωνος ἄκοιτιν,
    267. ἥ ῥʼ Ἡρακλῆα θρασυμέμνονα θυμολέοντα
    268. γείνατʼ ἐν ἀγκοίνῃσι Διὸς μεγάλοιο μιγεῖσα·
    269. καὶ Μεγάρην, Κρείοντος ὑπερθύμοιο θύγατρα,
    270. τὴν ἔχεν Ἀμφιτρύωνος υἱὸς μένος αἰὲν ἀτειρής.
    271. μητέρα τʼ Οἰδιπόδαο ἴδον, καλὴν Ἐπικάστην,
    272. ἣ μέγα ἔργον ἔρεξεν ἀιδρείῃσι νόοιο
    273. γημαμένη ᾧ υἷι· ὁ δʼ ὃν πατέρʼ ἐξεναρίξας
    274. γῆμεν· ἄφαρ δʼ ἀνάπυστα θεοὶ θέσαν ἀνθρώποισιν.
    275. ἀλλʼ ὁ μὲν ἐν Θήβῃ πολυηράτῳ ἄλγεα πάσχων
    276. Καδμείων ἤνασσε θεῶν ὀλοὰς διὰ βουλάς·
    277. ἡ δʼ ἔβη εἰς Ἀίδαο πυλάρταο κρατεροῖο,
    278. ἁψαμένη βρόχον αἰπὺν ἀφʼ ὑψηλοῖο μελάθρου,
    279. ᾧ ἄχεϊ σχομένη· τῷ δʼ ἄλγεα κάλλιπʼ ὀπίσσω
    280. πολλὰ μάλʼ, ὅσσα τε μητρὸς Ἐρινύες ἐκτελέουσιν.
    281. καὶ Χλῶριν εἶδον περικαλλέα, τήν ποτε Νηλεὺς
    282. γῆμεν ἑὸν διὰ κάλλος, ἐπεὶ πόρε μυρία ἕδνα,
    283. ὁπλοτάτην κούρην Ἀμφίονος Ἰασίδαο,
    284. ὅς ποτʼ ἐν Ὀρχομενῷ Μινυείῳ ἶφι ἄνασσεν·
    285. ἡ δὲ Πύλου βασίλευε, τέκεν δέ οἱ ἀγλαὰ τέκνα,
    286. Νέστορά τε Χρόνιον τε Περικλύμενόν τʼ ἀγέρωχον.
    287. τοῖσι δʼ ἐπʼ ἰφθίμην Πηρὼ τέκε, θαῦμα βροτοῖσι,
    288. τὴν πάντες μνώοντο περικτίται· οὐδʼ ἄρα Νηλεὺς
    289. τῷ ἐδίδου ὃς μὴ ἕλικας βόας εὐρυμετώπους
    290. ἐκ Φυλάκης ἐλάσειε βίης Ἰφικληείης
    291. ἀργαλέας· τὰς δʼ οἶος ὑπέσχετο μάντις ἀμύμων
    292. ἐξελάαν· χαλεπὴ δὲ θεοῦ κατὰ μοῖρα πέδησε,
    293. δεσμοί τʼ ἀργαλέοι καὶ βουκόλοι ἀγροιῶται.
    294. ἀλλʼ ὅτε δὴ μῆνές τε καὶ ἡμέραι ἐξετελεῦντο
    295. ἂψ περιτελλομένου ἔτεος καὶ ἐπήλυθον ὧραι,
    296. καὶ τότε δή μιν ἔλυσε βίη Ἰφικληείη,
    297. θέσφατα πάντʼ εἰπόντα· Διὸς δʼ ἐτελείετο βουλή.
    298. καὶ Λήδην εἶδον, τὴν Τυνδαρέου παράκοιτιν,
    299. ἥ ῥʼ ὑπὸ Τυνδαρέῳ κρατερόφρονε γείνατο παῖδε,
    300. Κάστορά θʼ ἱππόδαμον καὶ πὺξ ἀγαθὸν Πολυδεύκεα,
    301. τοὺς ἄμφω ζωοὺς κατέχει φυσίζοος αἶα·
    302. οἳ καὶ νέρθεν γῆς τιμὴν πρὸς Ζηνὸς ἔχοντες
    303. ἄλλοτε μὲν ζώουσʼ ἑτερήμεροι, ἄλλοτε δʼ αὖτε
    304. τεθνᾶσιν· τιμὴν δὲ λελόγχασιν ἶσα θεοῖσι.
    305. τὴν δὲ μετʼ Ἰφιμέδειαν, Ἀλωῆος παράκοιτιν
    306. εἴσιδον, ἣ δὴ φάσκε Ποσειδάωνι μιγῆναι,
    307. καί ῥʼ ἔτεκεν δύο παῖδε, μινυνθαδίω δʼ ἐγενέσθην,
    308. Ὦτόν τʼ ἀντίθεον τηλεκλειτόν τʼ Ἐφιάλτην,
    309. οὓς δὴ μηκίστους θρέψε ζείδωρος ἄρουρα
    310. καὶ πολὺ καλλίστους μετά γε κλυτὸν Ὠρίωνα·
    311. ἐννέωροι γὰρ τοί γε καὶ ἐννεαπήχεες ἦσαν
    312. εὖρος, ἀτὰρ μῆκός γε γενέσθην ἐννεόργυιοι.
    313. οἵ ῥα καὶ ἀθανάτοισιν ἀπειλήτην ἐν Ὀλύμπῳ
    314. φυλόπιδα στήσειν πολυάικος πολέμοιο.
    315. Ὄσσαν ἐπʼ Οὐλύμπῳ μέμασαν θέμεν, αὐτὰρ ἐπʼ Ὄσσῃ
    316. Πήλιον εἰνοσίφυλλον, ἵνʼ οὐρανὸς ἀμβατὸς εἴη.
    317. καί νύ κεν ἐξετέλεσσαν, εἰ ἥβης μέτρον ἵκοντο·
    318. ἀλλʼ ὄλεσεν Διὸς υἱός, ὃν ἠύκομος τέκε Λητώ,
    319. ἀμφοτέρω, πρίν σφωιν ὑπὸ κροτάφοισιν ἰούλους
    320. ἀνθῆσαι πυκάσαι τε γένυς ἐυανθέι λάχνῃ.
    321. Φαίδρην τε Πρόκριν τε ἴδον καλήν τʼ Ἀριάδνην,
    322. κούρην Μίνωος ὀλοόφρονος, ἥν ποτε Θησεὺς
    323. ἐκ Κρήτης ἐς γουνὸν Ἀθηνάων ἱεράων
    324. ἦγε μέν, οὐδʼ ἀπόνητο· πάρος δέ μιν Ἄρτεμις ἔκτα
    325. Δίῃ ἐν ἀμφιρύτῃ Διονύσου μαρτυρίῃσιν.
    326. Μαῖράν τε Κλυμένην τε ἴδον στυγερήν τʼ Ἐριφύλην,
    327. ἣ χρυσὸν φίλου ἀνδρὸς ἐδέξατο τιμήεντα.
    328. πάσας δʼ οὐκ ἂν ἐγὼ μυθήσομαι οὐδʼ ὀνομήνω,
    329. ὅσσας ἡρώων ἀλόχους ἴδον ἠδὲ θύγατρας·
    330. πρὶν γάρ κεν καὶ νὺξ φθῖτʼ ἄμβροτος. ἀλλὰ καὶ ὥρη
    331. εὕδειν, ἢ ἐπὶ νῆα θοὴν ἐλθόντʼ ἐς ἑταίρους
    332. ἢ αὐτοῦ· πομπὴ δὲ θεοῖς ὑμῖν τε μελήσει.
    333. ὣς ἔφαθʼ, οἱ δʼ ἄρα πάντες ἀκὴν ἐγένοντο σιωπῇ,
    334. κηληθμῷ δʼ ἔσχοντο κατὰ μέγαρα σκιόεντα.
    335. τοῖσιν δʼ Ἀρήτη λευκώλενος ἤρχετο μύθων.
    336. Φαίηκες, πῶς ὔμμιν ἀνὴρ ὅδε φαίνεται εἶναι
    337. εἶδός τε μέγεθός τε ἰδὲ φρένας ἔνδον ἐίσας;
    338. ξεῖνος δʼ αὖτʼ ἐμός ἐστιν, ἕκαστος δʼ ἔμμορε τιμῆς·
    339. τῷ μὴ ἐπειγόμενοι ἀποπέμπετε, μηδὲ τὰ δῶρα
    340. οὕτω χρηίζοντι κολούετε· πολλὰ γὰρ ὑμῖν
    341. κτήματʼ ἐνὶ μεγάροισι θεῶν ἰότητι κέονται.
    342. τοῖσι δὲ καὶ μετέειπε γέρων ἥρως Ἐχένηος,
    343. ὃς δὴ Φαιήκων ἀνδρῶν προγενέστερος ἦεν·
    344. ὦ φίλοι, οὐ μὰν ἧμιν ἀπὸ σκοποῦ οὐδʼ ἀπὸ δόξης
    345. μυθεῖται βασίλεια περίφρων· ἀλλὰ πίθεσθε.
    346. Ἀλκινόου δʼ ἐκ τοῦδʼ ἔχεται ἔργον τε ἔπος τε.
    347. τὸν δʼ αὖτʼ Ἀλκίνοος ἀπαμείβετο φώνησέν τε·
    348. τοῦτο μὲν οὕτω δὴ ἔσται ἔπος, αἴ κεν ἐγώ γε
    349. ζωὸς Φαιήκεσσι φιληρέτμοισιν ἀνάσσω·
    350. ξεῖνος δὲ τλήτω μάλα περ νόστοιο χατίζων
    351. ἔμπης οὖν ἐπιμεῖναι ἐς αὔριον, εἰς ὅ κε πᾶσαν
    352. δωτίνην τελέσω· πομπὴ δʼ ἄνδρεσσι μελήσει
    353. πᾶσι, μάλιστα δʼ ἐμοί· τοῦ γὰρ κράτος ἔστʼ ἐνὶ δήμῳ.
    354. τὸν δʼ ἀπαμειβόμενος προσέφη πολύμητις Ὀδυσσεύς·
    355. Ἀλκίνοε κρεῖον, πάντων ἀριδείκετε λαῶν,
    356. εἴ με καὶ εἰς ἐνιαυτὸν ἀνώγοιτʼ αὐτόθι μίμνειν,
    357. πομπὴν δʼ ὀτρύνοιτε καὶ ἀγλαὰ δῶρα διδοῖτε,
    358. καὶ κε τὸ βουλοίμην, καί κεν πολὺ κέρδιον εἴη,
    359. πλειοτέρῃ σὺν χειρὶ φίλην ἐς πατρίδʼ ἱκέσθαι·
    360. καί κʼ αἰδοιότερος καὶ φίλτερος ἀνδράσιν εἴην
    361. πᾶσιν, ὅσοι μʼ Ἰθάκηνδε ἰδοίατο νοστήσαντα.
    362. τὸν δʼ αὖτʼ Ἀλκίνοος ἀπαμείβετο φώνησέν τε·
    363. ὦ Ὀδυσεῦ, τὸ μὲν οὔ τί σʼ ἐίσκομεν εἰσορόωντες,
    364. ἠπεροπῆά τʼ ἔμεν καὶ ἐπίκλοπον, οἷά τε πολλοὺς
    365. βόσκει γαῖα μέλαινα πολυσπερέας ἀνθρώπους,
    366. ψεύδεά τʼ ἀρτύνοντας ὅθεν κέ τις οὐδὲ ἴδοιτο·
    367. σοὶ δʼ ἔπι μὲν μορφὴ ἐπέων, ἔνι δὲ φρένες ἐσθλαί.
    368. μῦθον δʼ ὡς ὅτʼ ἀοιδὸς ἐπισταμένως κατέλεξας,
    369. πάντων τʼ Ἀργείων σέο τʼ αὐτοῦ κήδεα λυγρά.
    370. ἀλλʼ ἄγε μοι τόδε εἰπὲ καὶ ἀτρεκέως κατάλεξον,
    371. εἴ τινας ἀντιθέων ἑτάρων ἴδες, οἵ τοι ἅμʼ αὐτῷ
    372. Ἴλιον εἰς ἅμʼ ἕποντο καὶ αὐτοῦ πότμον ἐπέσπον.
    373. νὺξ δʼ ἥδε μάλα μακρή, ἀθέσφατος· οὐδέ πω ὥρη
    374. εὕδειν ἐν μεγάρῳ, σὺ δέ μοι λέγε θέσκελα ἔργα.
    375. καί κεν ἐς ἠῶ δῖαν ἀνασχοίμην, ὅτε μοι σὺ
    376. τλαίης ἐν μεγάρῳ τὰ σὰ κήδεα μυθήσασθαι.
    377. τὸν δʼ ἀπαμειβόμενος προσέφη πολύμητις Ὀδυσσεύς·
    378. Ἀλκίνοε κρεῖον, πάντων ἀριδείκετε λαῶν,
    379. ὥρη μὲν πολέων μύθων, ὥρη δὲ καὶ ὕπνου·
    380. εἰ δʼ ἔτʼ ἀκουέμεναί γε λιλαίεαι, οὐκ ἂν ἐγώ γε
    381. τούτων σοι φθονέοιμι καὶ οἰκτρότερʼ ἄλλʼ ἀγορεύειν,
    382. κήδεʼ ἐμῶν ἑτάρων, οἳ δὴ μετόπισθεν ὄλοντο,
    383. οἳ Τρώων μὲν ὑπεξέφυγον στονόεσσαν ἀυτήν,
    384. ἐν νόστῳ δʼ ἀπόλοντο κακῆς ἰότητι γυναικός.
    385. αὐτὰρ ἐπεὶ ψυχὰς μὲν ἀπεσκέδασʼ ἄλλυδις ἄλλῃ
    386. ἁγνὴ Περσεφόνεια γυναικῶν θηλυτεράων,
    387. ἦλθε δʼ ἐπὶ ψυχὴ Ἀγαμέμνονος Ἀτρεΐδαο
    388. ἀχνυμένη· περὶ δʼ ἄλλαι ἀγηγέραθʼ, ὅσσοι ἅμʼ αὐτῷ
    389. οἴκῳ ἐν Αἰγίσθοιο θάνον καὶ πότμον ἐπέσπον.
    390. ἔγνω δʼ αἶψʼ ἔμʼ ἐκεῖνος, ἐπεὶ πίεν αἷμα κελαινόν·
    391. κλαῖε δʼ ὅ γε λιγέως, θαλερὸν κατὰ δάκρυον εἴβων,
    392. πιτνὰς εἰς ἐμὲ χεῖρας, ὀρέξασθαι μενεαίνων·
    393. ἀλλʼ οὐ γάρ οἱ ἔτʼ ἦν ἲς ἔμπεδος οὐδέ τι κῖκυς,
    394. οἵη περ πάρος ἔσκεν ἐνὶ γναμπτοῖσι μέλεσσι.
    395. τὸν μὲν ἐγὼ δάκρυσα ἰδὼν ἐλέησά τε θυμῷ,
    396. καί μιν φωνήσας ἔπεα πτερόεντα προσηύδων·
    397. Ἀτρεΐδη κύδιστε, ἄναξ ἀνδρῶν Ἀγάμεμνον,
    398. τίς νύ σε κὴρ ἐδάμασσε τανηλεγέος θανάτοιο;
    399. ἦε σέ γʼ ἐν νήεσσι Ποσειδάων ἐδάμασσεν
    400. ὄρσας ἀργαλέων ἀνέμων ἀμέγαρτον ἀυτμήν;
    401. ἦέ σʼ ἀνάρσιοι ἄνδρες ἐδηλήσαντʼ ἐπὶ χέρσου
    402. βοῦς περιταμνόμενον ἠδʼ οἰῶν πώεα καλά,
    403. ἠὲ περὶ πτόλιος μαχεούμενον ἠδὲ γυναικῶν;
    404. ὣς ἐφάμην, ὁ δέ μʼ αὐτίκʼ ἀμειβόμενος προσέειπε·
    405. διογενὲς Λαερτιάδη, πολυμήχανʼ Ὀδυσσεῦ,
    406. οὔτʼ ἐμέ γʼ ἐν νήεσσι Ποσειδάων ἐδάμασσεν
    407. ὄρσας ἀργαλέων ἀνέμων ἀμέγαρτον ἀυτμήν,
    408. οὔτε μʼ ἀνάρσιοι ἄνδρες ἐδηλήσαντʼ ἐπὶ χέρσου,
    409. ἀλλά μοι Αἴγισθος τεύξας θάνατόν τε μόρον τε
    410. ἔκτα σὺν οὐλομένῃ ἀλόχῳ, οἶκόνδε καλέσσας,
    411. δειπνίσσας, ὥς τίς τε κατέκτανε βοῦν ἐπὶ φάτνῃ.
    412. ὣς θάνον οἰκτίστῳ θανάτῳ· περὶ δʼ ἄλλοι ἑταῖροι
    413. νωλεμέως κτείνοντο σύες ὣς ἀργιόδοντες,
    414. οἵ ῥά τʼ ἐν ἀφνειοῦ ἀνδρὸς μέγα δυναμένοιο
    415. ἢ γάμῳ ἢ ἐράνῳ ἢ εἰλαπίνῃ τεθαλυίῃ.
    416. ἤδη μὲν πολέων φόνῳ ἀνδρῶν ἀντεβόλησας,