Odyssey

Homer

Homer. The Odyssey, Volume 1-2. Murray, A. T. (Augustus Taber), editor. London: William Heinmann; New York: G.P. Putnam's Sons, 1919.

  1. τῆς ἔχετο στενάχων, ἧος μέγα κῦμα παρῆλθε.
  2. καὶ τὸ μὲν ὣς ὑπάλυξε, παλιρρόθιον δέ μιν αὖτις
  3. πλῆξεν ἐπεσσύμενον, τηλοῦ δέ μιν ἔμβαλε πόντῳ.
  4. ὡς δʼ ὅτε πουλύποδος θαλάμης ἐξελκομένοιο
  5. πρὸς κοτυληδονόφιν πυκιναὶ λάιγγες ἔχονται,
  6. ὣς τοῦ πρὸς πέτρῃσι θρασειάων ἀπὸ χειρῶν
  7. ῥινοὶ ἀπέδρυφθεν· τὸν δὲ μέγα κῦμα κάλυψεν.
  8. ἔνθα κε δὴ δύστηνος ὑπὲρ μόρον ὤλετʼ Ὀδυσσεύς,
  9. εἰ μὴ ἐπιφροσύνην δῶκε γλαυκῶπις Ἀθήνη.
  10. κύματος ἐξαναδύς, τά τʼ ἐρεύγεται ἤπειρόνδε,
  11. νῆχε παρέξ, ἐς γαῖαν ὁρώμενος, εἴ που ἐφεύροι
  12. ἠιόνας τε παραπλῆγας λιμένας τε θαλάσσης.
  13. ἀλλʼ ὅτε δὴ ποταμοῖο κατὰ στόμα καλλιρόοιο
  14. ἷξε νέων, τῇ δή οἱ ἐείσατο χῶρος ἄριστος,
  15. λεῖος πετράων, καὶ ἐπὶ σκέπας ἦν ἀνέμοιο,
  16. ἔγνω δὲ προρέοντα καὶ εὔξατο ὃν κατὰ θυμόν·
  17. κλῦθι, ἄναξ, ὅτις ἐσσί· πολύλλιστον δέ σʼ ἱκάνω,
  18. φεύγων ἐκ πόντοιο Ποσειδάωνος ἐνιπάς.
  19. αἰδοῖος μέν τʼ ἐστὶ καὶ ἀθανάτοισι θεοῖσιν
  20. ἀνδρῶν ὅς τις ἵκηται ἀλώμενος, ὡς καὶ ἐγὼ νῦν
  21. σόν τε ῥόον σά τε γούναθʼ ἱκάνω πολλὰ μογήσας.