Odyssey
Homer
Homer. The Odyssey, Volume 1-2. Murray, A. T. (Augustus Taber), editor. London: William Heinmann; New York: G.P. Putnam's Sons, 1919.
- βῆ δʼ ἴμεν ἀγγελέων διὰ δώματα ποιμένι λαῶν,
- ἀγχοῦ δʼ ἱστάμενος ἔπεα πτερόεντα προσηύδα·
- ξείνω δή τινε τώδε, διοτρεφὲς ὦ Μενέλαε,
- ἄνδρε δύω, γενεῇ δὲ Διὸς μεγάλοιο ἔικτον.
- ἀλλʼ εἴπʼ, ἤ σφωιν καταλύσομεν ὠκέας ἵππους,
- ἦ ἄλλον πέμπωμεν ἱκανέμεν, ὅς κε φιλήσῃ.
- τὸν δὲ μέγʼ ὀχθήσας προσέφη ξανθὸς Μενέλαος·
- οὐ μὲν νήπιος ἦσθα, Βοηθοΐδη Ἐτεωνεῦ,
- τὸ πρίν· ἀτὰρ μὲν νῦν γε πάϊς ὣς νήπια βάζεις.
- ἦ μὲν δὴ νῶι ξεινήια πολλὰ φαγόντε
- ἄλλων ἀνθρώπων δεῦρʼ ἱκόμεθʼ, αἴ κέ ποθι Ζεὺς
- ἐξοπίσω περ παύσῃ ὀιζύος. ἀλλὰ λύʼ ἵππους
- ξείνων, ἐς δʼ αὐτοὺς προτέρω ἄγε θοινηθῆναι.
- ὣς φάθʼ, ὁ δὲ μεγάροιο διέσσυτο, κέκλετο δʼ ἄλλους
- ὀτρηροὺς θεράποντας ἅμα σπέσθαι ἑοῖ αὐτῷ.
- οἱ δʼ ἵππους μὲν λῦσαν ὑπὸ ζυγοῦ ἱδρώοντας,
- καὶ τοὺς μὲν κατέδησαν ἐφʼ ἱππείῃσι κάπῃσι,
- πὰρ δʼ ἔβαλον ζειάς, ἀνὰ δὲ κρῖ λευκὸν ἔμιξαν,
- ἅρματα δʼ ἔκλιναν πρὸς ἐνώπια παμφανόωντα,
- αὐτοὺς δʼ εἰσῆγον θεῖον δόμον. οἱ δὲ ἰδόντες