Odyssey

Homer

Homer. The Odyssey, Volume 1-2. Murray, A. T. (Augustus Taber), editor. London: William Heinmann; New York: G.P. Putnam's Sons, 1919.

  1. τοῖς ἄρα μύθων ἦρχε Γερήνιος ἱππότα Νέστωρ·
  2. νῦν δὴ κάλλιόν ἐστι μεταλλῆσαι καὶ ἐρέσθαι
  3. ξείνους, οἱ τινές εἰσιν, ἐπεὶ τάρπησαν ἐδωδῆς.
  4. ὦ ξεῖνοι, τίνες ἐστέ; πόθεν πλεῖθʼ ὑγρὰ κέλευθα;
  5. ἤ τι κατὰ πρῆξιν ἦ μαψιδίως ἀλάλησθε
  6. οἷά τε ληιστῆρες ὑπεὶρ ἅλα, τοί τʼ ἀλόωνται
  7. ψυχὰς παρθέμενοι κακὸν ἀλλοδαποῖσι φέροντες;
  8. τὸν δʼ αὖ Τηλέμαχος πεπνυμένος ἀντίον ηὔδα
  9. θαρσήσας· αὐτὴ γὰρ ἐνὶ φρεσὶ θάρσος Ἀθήνη
  10. θῆχʼ, ἵνα μιν περὶ πατρὸς ἀποιχομένοιο ἔροιτο
  11. ἠδʼ ἵνα μιν κλέος ἐσθλὸν ἐν ἀνθρώποισιν ἔχῃσιν·
  12. ὦ Νέστορ Νηληϊάδη, μέγα κῦδος Ἀχαιῶν,
  13. εἴρεαι ὁππόθεν εἰμέν· ἐγὼ δέ κέ τοι καταλέξω.
  14. ἡμεῖς ἐξ Ἰθάκης ὑπονηίου εἰλήλουθμεν·
  15. πρῆξις δʼ ἥδʼ ἰδίη, οὐ δήμιος, ἣν ἀγορεύω.
  16. πατρὸς ἐμοῦ κλέος εὐρὺ μετέρχομαι, ἤν που ἀκούσω,
  17. δίου Ὀδυσσῆος ταλασίφρονος, ὅν ποτέ φασι
  18. σὺν σοὶ μαρνάμενον Τρώων πόλιν ἐξαλαπάξαι.