Odyssey

Homer

Homer. The Odyssey, Volume 1-2. Murray, A. T. (Augustus Taber), editor. London: William Heinmann; New York: G.P. Putnam's Sons, 1919.

  1. καὶ παῖδʼ ἐν μεγάροισι· κακῶς δʼ οἵ πέρ μιν ἔρεζον
  2. μνηστῆρες, τοὺς πάντας ἐτίσατο ᾧ ἐνὶ οἴκῳ.
  3. τὴν δʼ αὖτε προσέειπε περίφρων Πηνελόπεια·
  4. μαῖα φίλη, μή πω μέγʼ ἐπεύχεο καγχαλόωσα.
  5. οἶσθα γὰρ ὥς κʼ ἀσπαστὸς ἐνὶ μεγάροισι φανείη
  6. πᾶσι, μάλιστα δʼ ἐμοί τε καὶ υἱέϊ, τὸν τεκόμεσθα·
  7. ἀλλʼ οὐκ ἔσθʼ ὅδε μῦθος ἐτήτυμος, ὡς ἀγορεύεις,
  8. ἀλλά τις ἀθανάτων κτεῖνε μνηστῆρας ἀγαυούς,
  9. ὕβριν ἀγασσάμενος θυμαλγέα καὶ κακὰ ἔργα.