Odyssey
Homer
Homer. The Odyssey, Volume 1-2. Murray, A. T. (Augustus Taber), editor. London: William Heinmann; New York: G.P. Putnam's Sons, 1919.
- οὔ τι διατρίβω μητρὸς γάμον, ἀλλὰ κελεύω
- γήμασθʼ ᾧ κʼ ἐθέλῃ, ποτὶ δʼ ἄσπετα δῶρα δίδωμι.
- αἰδέομαι δʼ ἀέκουσαν ἀπὸ μεγάροιο δίεσθαι
- μύθῳ ἀναγκαίῳ· μὴ τοῦτο θεὸς τελέσειεν.
- ὣς φάτο Τηλέμαχος· μνηστῆρσι δὲ Παλλὰς Ἀθήνη
- ἄσβεστον γέλω ὦρσε, παρέπλαγξεν δὲ νόημα.
- οἱ δʼ ἤδη γναθμοῖσι γελοίων ἀλλοτρίοισιν,
- αἱμοφόρυκτα δὲ δὴ κρέα ἤσθιον· ὄσσε δʼ ἄρα σφέων
- δακρυόφιν πίμπλαντο, γόον δʼ ὠΐετο θυμός.
- τοῖσι δὲ καὶ μετέειπε Θεοκλύμενος θεοειδής·
- ἆ δειλοί, τί κακὸν τόδε πάσχετε; νυκτὶ μὲν ὑμέων
- εἰλύαται κεφαλαί τε πρόσωπά τε νέρθε τε γοῦνα.
- οἰμωγὴ δὲ δέδηε, δεδάκρυνται δὲ παρειαί,
- αἵματι δʼ ἐρράδαται τοῖχοι καλαί τε μεσόδμαι·
- εἰδώλων δὲ πλέον πρόθυρον, πλείη δὲ καὶ αὐλή,
- ἱεμένων Ἔρεβόσδε ὑπὸ ζόφον· ἠέλιος δὲ
- οὐρανοῦ ἐξαπόλωλε, κακὴ δʼ ἐπιδέδρομεν ἀχλύς.
- ὣς ἔφαθʼ, οἱ δʼ ἄρα πάντες ἐπʼ αὐτῷ ἡδὺ γέλασσαν.
- τοῖσιν δʼ Εὐρύμαχος, Πολύβου πάϊς, ἦρχʼ ἀγορεύειν·
- ἀφραίνει ξεῖνος νέον ἄλλοθεν εἰληλουθώς.