Odyssey

Homer

Homer. The Odyssey, Volume 1-2. Murray, A. T. (Augustus Taber), editor. London: William Heinmann; New York: G.P. Putnam's Sons, 1919.

  1. Φόρκυνος δέ τίς ἐστι λιμήν, ἁλίοιο γέροντος,
  2. ἐν δήμῳ Ἰθάκης· δύο δὲ προβλῆτες ἐν αὐτῷ
  3. ἀκταὶ ἀπορρῶγες, λιμένος ποτιπεπτηυῖαι,
  4. αἵ τʼ ἀνέμων σκεπόωσι δυσαήων μέγα κῦμα
  5. ἔκτοθεν· ἔντοσθεν δέ τʼ ἄνευ δεσμοῖο μένουσι
  6. νῆες ἐΰσσελμοι, ὅτʼ ἂν ὅρμου μέτρον ἵκωνται.
  7. αὐτὰρ ἐπὶ κρατὸς λιμένος τανύφυλλος ἐλαίη,
  8. ἀγχόθι δʼ αὐτῆς ἄντρον ἐπήρατον ἠεροειδές,
  9. ἱρὸν νυμφάων αἱ νηϊάδες καλέονται.
  10. ἐν δὲ κρητῆρές τε καὶ ἀμφιφορῆες ἔασιν
  11. λάϊνοι· ἔνθα δʼ ἔπειτα τιθαιβώσσουσι μέλισσαι.