Odyssey

Homer

Homer. The Odyssey, Volume 1-2. Murray, A. T. (Augustus Taber), editor. London: William Heinmann; New York: G.P. Putnam's Sons, 1919.

  • δένδρεα δʼ ὑψιπέτηλα κατὰ κρῆθεν χέε καρπόν,
  • ὄγχναι καὶ ῥοιαὶ καὶ μηλέαι ἀγλαόκαρποι
  • συκέαι τε γλυκεραὶ καὶ ἐλαῖαι τηλεθόωσαι·
  • τῶν ὁπότʼ ἰθύσειʼ ὁ γέρων ἐπὶ χερσὶ μάσασθαι,
  • τὰς δʼ ἄνεμος ῥίπτασκε ποτὶ νέφεα σκιόεντα.
  • καὶ μὴν Σίσυφον εἰσεῖδον κρατέρʼ ἄλγεʼ ἔχοντα
  • λᾶαν βαστάζοντα πελώριον ἀμφοτέρῃσιν.
  • ἦ τοι ὁ μὲν σκηριπτόμενος χερσίν τε ποσίν τε
  • λᾶαν ἄνω ὤθεσκε ποτὶ λόφον· ἀλλʼ ὅτε μέλλοι
  • ἄκρον ὑπερβαλέειν, τότʼ ἀποστρέψασκε κραταιίς·
  • αὖτις ἔπειτα πέδονδε κυλίνδετο λᾶας ἀναιδής.
  • αὐτὰρ ὅ γʼ ἂψ ὤσασκε τιταινόμενος, κατὰ δʼ ἱδρὼς
  • ἔρρεεν ἐκ μελέων, κονίη δʼ ἐκ κρατὸς ὀρώρει.
  • τὸν δὲ μετʼ εἰσενόησα βίην Ἡρακληείην,
  • εἴδωλον· αὐτὸς δὲ μετʼ ἀθανάτοισι θεοῖσι
  • τέρπεται ἐν θαλίῃς καὶ ἔχει καλλίσφυρον Ἥβην,
  • παῖδα Διὸς μεγάλοιο καὶ Ἥρης χρυσοπεδίλου.
  • ἀμφὶ δέ μιν κλαγγὴ νεκύων ἦν οἰωνῶν ὥς,