Antigone
Sophocles
Sophocles, Volume 1. Storr, Francis, editor. London; New York: William Heinemann Ltd.; The Macmillan Company, 1912.
- φήσεις μετασχεῖν, ἢ ʼξομεῖ τὸ μὴ εἰδέναι;
- δέδρακα τοὔργον, εἴπερ ἥδʼ ὁμορροθεῖ
- καὶ ξυμμετίσχω καὶ φέρω τῆς αἰτίας.
- ἀλλʼ οὐκ ἐάσει τοῦτό γʼ ἡ δίκη σʼ, ἐπεὶ
- οὔτʼ ἠθέλησας οὔτʼ ἐγὼ ʼκοινωσάμην.
- ἀλλʼ ἐν κακοῖς τοῖς σοῖσιν οὐκ αἰσχύνομαι
- ξύμπλουν ἐμαυτὴν τοῦ πάθους ποιουμένη.
- ὧν τοὔργον, Ἅιδης χοἰ κάτω ξυνίστορες·
- λόγοις δʼ ἐγὼ φιλοῦσαν οὐ στέργω φίλην.
- μήτοι, κασιγνήτη, μʼ ἀτιμάσῃς τὸ μὴ οὐ
- θανεῖν τε σὺν σοὶ τὸν θανόντα θʼ ἁγνίσαι.
- μή μοι θάνῃς σὺ κοινὰ μηδʼ ἃ μὴ ʼθιγες
- ποιοῦ σεαυτῆς. ἀρκέσω θνῄσκουσʼ ἐγώ.
- καὶ τίς βίος μοι σοῦ λελειμμένῃ φίλος;
- Κρέοντʼ ἐρώτα· τοῦδε γὰρ σὺ κηδεμών.
- τί ταῦτʼ ἀνιᾷς μʼ, οὐδὲν ὠφελουμένη;