Dionysiaca
Nonnus of Panopolis
Nonnus of Panopolis. Dionysiaca, Vol. 1-3. Rouse, W.H.D., editor. London: W. Heinemann Ltd.; Cambridge, MA, 1940-1942.
- πηκτίδος οὐ πόθον ἔσχεν, ὅσον μυκηθμὸν ἀκούειν.
- οὐ μὲν ἐγὼ ψαύσαιμι καλαύροπος, οὐ παρὰ φάτνῃ
- στήσομαι· ἡμετέρης δὲ παρέσσομαι ἐγγὺς ἀνάσσης
- φθεγγομένῳ Θησῆι, καὶ οὐ μυκηθμὸν ἀκούσω·
- καὶ τεὸν ἱμερόεντα γάμων ὑμέναιον ἀείσω
- ζῆλον ὑποκλέπτουσα νεοζυγέος σέο νύμφης.
- στῆσον Ναξιάδεσσι παρʼ ᾐόσι ποντοπορεύων,
- στῆσον ἐμοὶ σέο νῆα· τί, ναυτίλε, καὶ σὺ χαλέπτεις;
- ὣς ἄρα καὶ σὺ πέλεις Μαραθώνιος· εἰ μὲν ἱκάνεις
- εἰς ἐρατήν σέο γαῖαν, ὅπῃ δόμος ἐστὶν Ἐρώτων,
- δέξό με δειλαίην, ἵνα Κέκροπος ἄστυ νοήσω·
- εἰ δέ με καλλείψεις καί, ἀμείλιχε, ποντοπορεύεις,
- εἰπὲ τεῷ Θησῆι κινυρομένην Ἀριάδνην,
- μεμφομένην ἀτέλεστον ἐπίκλοπον ὅρκον Ἐρώτων.
- οἶδα, πόθεν Θησῆος ὑπόσχεσιν ἠπεροπῆος
- θῆκεν Ἔρως βαρύμηνις ἀνήνυτον· ἀντὶ γάρ Ἥρης,
- ἣν Ζυγίην καλέουσιν, ἀπειρογάμοιο θεαίνης
- ὤμοσεν ἀχράντοιο γαμήλιον ὅρκον Ἀθήνης·
- Παλλάδος ὅρκον ὄμοσσε· τί Παλλάδι καὶ Κυθερείῃ;
- τοῖα κινυρομένης ἐπετέρπετο Βάκχος ἀκούων·