Dionysiaca
Nonnus of Panopolis
Nonnus of Panopolis. Dionysiaca, Vol. 1-3. Rouse, W.H.D., editor. London: W. Heinemann Ltd.; Cambridge, MA, 1940-1942.
- καὶ Διὸς εἰς δόμον ἦλθεν. ἀπʼ Ἀσσυρίοιο δὲ κόλπου
- ἁβροχίτων Διόνυσος ἀνήιεν εἰς χθόνα Λυδῶν
- Πακτωλοῦ παρὰ πέζαν, ὅπῃ χρυσαυγέι πηλῷ
- ἀφνειῆς τιτάνοιο μέλαν φοινίσσεται ὕδωρ·
- Μαιονίης δʼ ἐπέβαινε, καὶ ἵστατο μητέρι Ῥείῃ
- Ἰνδῴης ὀρέγων βασιλήια δῶρα θαλάσσης.
- καλλείψας δὲ ῥέεθρα βαθυπλούτου ποταμοῖο
- καὶ Φρύγιον κενεῶνα καὶ ἁβροβίων γένος ἀνδρῶν
- Ἀρκτῴην παρὰ πέζαν ἑὴν ἐφύτευσεν ὀπώρην,
- Εὐρώπης πτολίεθρα μετʼ Ἀσίδος ἄστεα βαίνων.
- τεσσαρακοστὸν ὕφηνα τὸ τέτρατον, ἧχι γυναῖκας δέρκεο μαινομένας καὶ Πενθέος ὄγκον ἀπειλῆς.
- ἤδη δʼ Ἰλλυρίης Δαυλάντιον ἔθνος ἀρούρης
- καὶ πέδον Αἱμονίης καὶ Πήλιον ἄκρον ἐάσας
- Ἑλλάδος ἐγγὺς ἵκανε, καὶ Ἀονίῃ παρὰ πέζῃ
- στῆσε χορούς. ἀίων δὲ μέλος μυκήτορος αὐλοῦ
- Πανὶ Ταναγραίῳ θιάσους ἐστήσατο ποιμήν·
- καὶ κρήνη κελάδησεν, ὅπῃ χθονὸς ἄκρον ἀράξας
- ὑγρὸς ὄνυξ ἵππειος ἐπώνυμον ἔγλυφεν ὕδωρ·
- Ἀσωπὸς δʼ ἐχόρευε πυρίπνοα χεύματα σύρων
- καὶ προχοὰς ἐλέλιξε· σὺν Ἰσμηνῷ δὲ τοκῆι