Dionysiaca
Nonnus of Panopolis
Nonnus of Panopolis. Dionysiaca, Vol. 1-3. Rouse, W.H.D., editor. London: W. Heinemann Ltd.; Cambridge, MA, 1940-1942.
- χάζεό μοι, Διόνυσε, φυγὼν δόρυ Δηριαδῆος·
- ἔστι καὶ ἐνθάδε πόντος ἀπείριτος· ἀλλὰ θαλάσσης
- Ἀρραβίης μετὰ κῦμα καὶ ἡμετέρη σε δεχέσθω·
- εὐρύτερος βυθὸς οὗτος ἐρεύγεται ἄγριον [*](So MSS.: ἀγκύλον Ludwich.) ὕδωρ,
- καὶ Σατύρους καὶ Βάκχον ἐπάρκιός ἐστι καλύψαι
- καὶ στίχα Βασσαρίδων· οὐ μείλιχος ἐνθάδε Νηρεύς,
- οὐ Θέτις Ἰνδῴη σε δεδέξεται, οὐδέ σε κόλπῳ
- ξεινοδόκον μετὰ κῦμα πάλιν φεύγοντα σαώσει,
- αἰδομένη βαρύδουπον ἐμὸν πατρῷον Ὑδάσπην.
- ἀλλʼ ἐρέεις· Κρονίωνος Ὀλύμπιον αἷμα κομίζω.
- αἰθέρα Γαῖα λόχευσε χορῷ κεχαραγμένον ἄστρων·
- οὐρανόθεν γένος ἔσχες· ἐμὴ δέ σε Γαῖα καλύψει·
- καὶ Κρόνον ὠμηστῆρα νέων θοινήτορα παίδων
- οὐρανόθεν γεγαῶτα κατέρυφε κόλπος ἀρούρης.
- εἰμὶ δοριθρασέος στρατιῆς πρόμος· εἰμὶ Λυκούργου
- φέρτερος, ὅς σε δίωκε καὶ ἀπτολέμους σέο Βάκχας·
- σὸν γένος οὐ κλονέει με Διιπετές· αἰνομόρου γὰρ
- σῆς Σεμέλης ἤκουσα πυριβλήτους ὑμεναίους·
- μὴ στεροπὴν ἀγόρευε Διὸς νυμφοστόλον εὐνῆς,
- μὴ κεφαλὴν Κρονίωνος ἤ ἄρσενα μηρὸν ἐνίψῃς·