Dionysiaca
Nonnus of Panopolis
Nonnus of Panopolis. Dionysiaca, Vol. 1-3. Rouse, W.H.D., editor. London: W. Heinemann Ltd.; Cambridge, MA, 1940-1942.
- τίς φθόνος ἠμάλδυνε τεὴν ἑλικώδεα χαίτην;
- οὐ πλόκαμοι προχυθέντες ἐπʼ ἀργυφέων σέθεν ὤμων
- ἀπλεκέες Τυρίοιο μύρου πέμπουσιν ἀυτμήν,
- οὐκέτι βακχευθέντος ἀφʼ ὑμετέροιο καρήνου
- μαρμαρυγὴν ῥοδόεσσαν ὀιστεύουσι παρειαί.
- πῶς φορέεις τάδε πέπλα χυτῇ ῥυπόωντα κονίῃ;
- πῇ μοι ἔβη Τυρίης βασιλήια πέπλα θαλάσσης;
- οὐκέτι γινώσκω σε μαραινομένοιο προσώπου.
- πῇ Στάφυλος σκηπτοῦχος ἀνήλυθεν, ὄφρα νοήσω;
- εἰπέ, τεὸν γενετῆρα τίς ἥρπασεν εἰς μίαν ὥρην;
- γινώσκω σέο πῆμα, καὶ εἰ κρύπτειν μενεαίνεις·
- φωνῆς ὑμετέρης οὐ δεύομαι· αὐτόματοι γὰρ
- σιγαλέον σέο πένθος ἀπαγγέλλουσιν ὀπωπαί·
- γινώσκω σέο πῆμα, καὶ εἰ κρύπτειν μενεαίνεις·
- δάκρυα σὰς ὀδύνας μαντεύεται, αὐσταλέοι δὲ
- πότμον ἐμοῦ Σταφύλοιο τεοὶ βοόωσι χιτῶνες.
- ἐλπίδα δʼ ἡμετέρην φθόνος ἥρπασεν· ὠισάμην γὰρ
- Ἰνδῴην μετὰ δῆριν ἅμα Σταφύλῳ βασιλῆι
- χερσὶν ἀερτάζειν θαλαμηπόλον ἑσπέριον πῦρ,
- βότρυος ἀγχιμάχοιο τελειομένων ὑμεναίων.