Persians

Aeschylus

Aeschylus, Volume 1. Smyth, Herbert Weir, editor. London; New York: William Heinemann; G.P. Putnam's Sons, 1922.

  1. βοᾷ δʼ ἐν ὠσὶ κέλαδος οὐ παιώνιος·
  2. τοία κακῶν ἔκπληξις ἐκφοβεῖ φρένας.
  3. τοιγὰρ κέλευθον τήνδʼ ἄνευ τʼ ὀχημάτων
  4. χλιδῆς τε τῆς πάροιθεν ἐκ δόμων πάλιν
  5. ἔστειλα, παιδὸς πατρὶ πρευμενεῖς χοὰς
  6. φέρουσʼ, ἅπερ νεκροῖσι μειλικτήρια,
  7. βοός τʼ ἀφʼ ἁγνῆς λευκὸν εὔποτον γάλα,
  8. τῆς τʼ ἀνθεμουργοῦ στάγμα, παμφαὲς μέλι,
  9. λιβάσιν ὑδρηλαῖς παρθένου πηγῆς μέτα,
  10. ἀκήρατόν τε μητρὸς ἀγρίας ἄπο
  11. ποτὸν παλαιᾶς ἀμπέλου γάνος τόδε·
  12. τῆς τʼ αἰὲν ἐν φύλλοισι θαλλούσης βίον
  13. ξανθῆς ἐλαίας καρπὸς εὐώδης πάρα,
  14. ἄνθη τε πλεκτά, παμφόρου γαίας τέκνα,
  15. ἀλλʼ, ὦ φίλοι, χοαῖσι ταῖσδε νερτέρων
  16. ὕμνους ἐπευφημεῖτε, τόν τε δαίμονα
  17. Δαρεῖον ἀνακαλεῖσθε, γαπότους δʼ ἐγὼ
  18. τιμὰς προπέμψω τάσδε νερτέροις θεοῖς.
Χορός
  1. βασίλεια γύναι, πρέσβος Πέρσαις,
  2. σύ τε πέμπε χοὰς θαλάμους ὑπὸ γῆς,
  3. ἡμεῖς θʼ ὕμνοις αἰτησόμεθα
  4. φθιμένων πομποὺς
  5. εὔφρονας εἶναι κατὰ γαίας.
  6. ἀλλά, χθόνιοι δαίμονες ἁγνοί,
  7. Γῆ τε καὶ Ἑρμῆ, βασιλεῦ τʼ ἐνέρων,
  8. πέμψατʼ ἔνερθεν ψυχὴν ἐς φῶς·
  9. εἰ γάρ τι κακῶν ἄκος οἶδε πλέον,
  10. μόνος ἂν θνητῶν πέρας εἴποι.
Χορός
  1. ἦ ῥʼ ἀίει μου μακαρίτας
  2. ἰσοδαίμων βασιλεὺς
  3. βάρβαρʼ ἀσαφηνῆ
  4. ἱέντος τὰ παναίολʼ αἰ-
  5. ανῆ δύσθροα βάγματʼ, ἢ
  6. παντάλανʼ ἄχη διαβοάσω;
  7. νέρθεν ἆρα κλύει μου;
Χορός
  1. ἀλλὰ σύ μοι Γᾶ τε καὶ ἄλλοι
  2. χθονίων ἁγεμόνες
  3. δαίμονα μεγαυχῆ
  4. ἰόντʼ αἰνέσατʼ ἐκ δόμων,
  5. Περσᾶν Σουσιγενῆ θεόν·
  6. πέμπετε δʼ ἄνω οἷον οὔπω
  7. Περσὶς αἶʼ ἐκάλυψεν.
Χορός
  1. ἦ φίλος ἁνήρ, φίλος ὄχθος·
  2. φίλα γὰρ κέκευθεν ἤθη.
  3. Ἀιδωνεὺς δʼ ἀναπομ-
  4. πὸς ἀνείης, Ἀιδωνεύς,
  5. θεῖον ἀνάκτορα Δαριᾶνα. ἠέ.
Χορός
  1. οὐδὲ γὰρ ἄνδρας ποτʼ ἀπώλλυ
  2. πολεμοφθόροισιν ἄταις,
  3. θεομήστωρ δʼ ἐκικλή-
  4. σκετο Πέρσαις, θεομήστωρ δʼ
  5. ἔσκεν,ἐπεὶ στρατὸν εὖ ποδούχει. ἠέ.
Χορός
  1. βαλήν, ἀρχαῖος βαλήν,
  2. ἴθι, ἱκοῦ·
  3. ἔλθʼ ἐπʼ ἄκρον κόρυμβον ὄχθου,
  4. κροκόβαπτον ποδὸς εὔμαριν ἀείρων,
  5. βασιλείου τιάρας
  6. φάλαρον πιφαύσκων.
  7. βάσκε πάτερ ἄκακε Δαριάν, οἶ.
Χορός
  1. ὅπως αἰανῆ κλύῃς
  2. νέα τʼ ἄχη,
  3. δέσποτα δεσπότου φάνηθι.
  4. Στυγία γάρ τις ἐπʼ ἀχλὺς πεπόταται·
  5. νεολαία γὰρ ἤδη
  6. κατὰ πᾶσʼ ὄλωλεν.
  7. βάσκε πάτερ ἄκακε Δαριάν, οἶ.
Χορός
  1. αἰαῖ αἰαῖ·
  2. ὦ πολύκλαυτε φίλοισι θανών,
  3. τί τάδε δυνάτα δυνάτα
  4. περὶ τᾷ σᾷ δίδυμα διαγόεν ἁμάρτια;
  5. πᾶσαι γᾷ τᾷδʼ
  6. ἐξέφθινται τρίσκαλμοι
  7. νᾶες ἄναες ἄναες.
Εἴδωλον Δαρείου
  1. ὦ πιστὰ πιστῶν ἥλικές θʼ ἥβης ἐμῆς
  2. Πέρσαι γεραιοί, τίνα πόλις πονεῖ πόνον;
  3. στένει, κέκοπται, καὶ χαράσσεται πέδον.
  4. λεύσσων δʼ ἄκοιτιν τὴν ἐμὴν τάφου πέλας
  5. ταρβῶ, χοὰς δὲ πρευμενὴς ἐδεξάμην.
  6. ὑμεῖς δὲ θρηνεῖτʼ ἐγγὺς ἑστῶτες τάφου
  7. καὶ ψυχαγωγοῖς ὀρθιάζοντες γόοις
  8. οἰκτρῶς καλεῖσθέ μʼ· ἐστὶ δʼ οὐκ εὐέξοδον,
  9. ἄλλως τε πάντως χοἰ κατὰ χθονὸς θεοὶ
  10. λαβεῖν ἀμείνους εἰσὶν ἢ μεθιέναι.
  11. ὅμως δʼ ἐκείνοις ἐνδυναστεύσας ἐγὼ
  12. ἥκω. τάχυνε δʼ ὡς ἄμεμπτος ὦ χρόνου.
  13. τί ἐστι Πέρσαις νεοχμὸν ἐμβριθὲς κακόν·
Χορός
  1. σέβομαι μὲν προσιδέσθαι,
  2. σέβομαι δʼ ἀντία λέξαι
  3. σέθεν ἀρχαίῳ περὶ τάρβει.
Δαρεῖος
  1. ἀλλʼ ἐπεὶ κάτωθεν ἦλθον σοῖς γόοις πεπεισμένος,
  2. μή τι μακιστῆρα μῦθον, ἀλλὰ σύντομον λέγων
  3. εἰπὲ καὶ πέραινε πάντα, τὴν ἐμὴν αἰδῶ μεθείς.
Χορός
  1. δίεμαι μὲν χαρίσασθαι,