Cynegetica
Oppian of Apamea
Oppian of Apamea. Cynegetica. Mair, A. W., editor. London, William Heinemann, Ltd.; New York: G.P. Putnam's Sons. 1928.
- πειθόμενοι τανύσαντο λινοπτερύγων ὅπλα νηῶν·
- ὧδε καὶ ἐν τραφερῇ κέλομαι θηρήτορας ἄνδρας
- παπταίνειν ἑκάτερθεν ἐπιπνείοντας ἀήτας,
- ὄφρα λινοστατέωσι βοηλατέωσί[*](v. l. βροχηλατέωσι.) τε πάντῃ
- αὔραις ἀντιάσαντες· ἐπεὶ μάλα θήρεσι πᾶσιν
- ὀξύταται ῥινῶν ὀσφρήσιες· εἰ δὲ φράσαιντο
- ἢ σταλίκων ὀδμὴν ἢ πεπταμένοιο λίνοιο,
- ἔμπαλιν ἰθύνουσιν, ἐπιστροφάδην δὲ φέβονται
- αὐτοῖς ἄντα βροτοῖσι, πόνον δʼ ἅλιον θέσαν ἄγρης.
- τῷ μοι παπταίνοιεν ἐπαιγίζοντας ἀήτας
- θηροφόνοι, στάλικάς τε λινοστασίην τʼ ἐφέποιεν
- ἀντιπέρην ἀνέμοιο βολῆς· ὄπιθεν δʼ ἐλάοιεν
- ἐς Νότον αἰθρήεντος ἐγειρομένου Βορέαο·
- ἐς δὲ Βορῆν σαλαγεῦντος ἐπὶ δροσεροῖο Νότοιο·
- Εὔρου δʼ ἱσταμένοιο θέειν Ζεφυρίτισιν αὔραις·
- κινυμένου Ζεφύρου δὲ θοῶς εἰς Εὖρον ἐλαύνειν.
- ἀλλὰ σύ μοι πρώτιστα λεόντων ἔξοχον ἄγρην
- ἐν θυμῷ βάλλοιο καὶ ἀνδρῶν ἄλκιμον ἦτορ.
- χῶρον μὲν πρώτιστον ἐπεφράσσαντο κιόντες,
- ἔνθα περὶ σπήλυγγας ἐρίβρομος ἠΰκομος λῖς