Halieutica
Oppian
Oppian. Halieutica. Mair, A. W., editor. London, William Heinemann, Ltd.; New York: G.P. Putnam's Sons. 1928.
- τῷ δʼ ἴσα τεχνάζουσι καὶ ἀστέρες ἑρπυστῆρες
- εἰνάλιοι· καὶ τοῖς γὰρ ἐπʼ ὄστρεα μῆτις ὀπηδεῖ·
- ἀλλʼ οὐ λᾶαν ἄγουσι συνέμπορον οὐδʼ ἐπίκουρον
- κεῖνοι, τρηχὺ δὲ κῶλον ἐνηρείσαντο μέσοισι
- πεπταμένοις· τὰ μὲν ὧδε πιέζεται, οἱ δὲ νέμονται.
- ὄστρακον αὖ βυθίας μὲν ἔχει πλάκας, ἐν δέ οἱ ἰχθὺς
- πίννη ναιετάει κεκλημένος· ἡ μὲν ἄναλκις
- οὔτε τι μητίσασθαι ἐπίσταται οὔτε τι ῥέξαι,
- ἀλλʼ ἄρα οἱ ξυνόν τε δόμον ξυνήν τε καλύπτρην
- καρκίνος ἐνναίει, φέρβει δέ μιν ἠδὲ φυλάσσει·
- τῷ καὶ πιννοφύλαξ κικλήσκεται· ἀλλʼ ὅτε κόχλου
- ἰχθὺς ἔνδον ἵκηται, ὁ δʼ οὐ φρονέουσαν ἀμύξας
- δήγματι κερδαλέῳ πίννην ἕλεν· ἡ δʼ ὀδύνῃσιν
- ὄστρακα συμπλατάγησε καὶ ἔνδον ἐφράσσατο ἄγρην
- αὑτῇ τʼ ἠδʼ ἑτάρῳ, ξυνόν θʼ ἅμα δεῖπνον ἕλοντο.
- ὣς ἄρα καὶ πλωτῆρσιν ἐν ὑγροπόροισιν ἔασι
- τοὶ μὲν κερδαλέοι, τοὶ δʼ ἄφρονες, οἷα καὶ ἡμῖν
- ἀνδράσιν, οὐδέ τι πᾶσιν ἐναίσιμόν ἐστι νόημα.
- φράζεο δʼ ἀφραδίῃ προφερέστατον ἡμεροκοίτην
- ἰχθύν, ὃν παρὰ πάντας ἀεργότατον τέκεν ἅλμη.