Halieutica
Oppian
Oppian. Halieutica. Mair, A. W., editor. London, William Heinemann, Ltd.; New York: G.P. Putnam's Sons. 1928.
- θήσασθαι γάλα λαρόν· ἐπεί ῥά οἱ ὤπασε δαίμων
- καὶ γάλα καὶ μαζῶν ἰκέλην φύσιν οἷα γυναικῶν.
- τόφρα μὲν οὖν τοίῃσι τιθηνείῃσι μέμηλεν·
- ἀλλʼ ὅτε κουρίζωσιν ἑὸν σθένος, αὐτίκα τοῖσι
- μήτηρ ἡγήτειρα κατέρχεται εἰς ὁδὸν ἄγρης
- ἱεμένοις θήρην τε διδάσκεται ἰχθυόεσσαν,
- οὐδὲ πάρος τεκέων ἑκὰς ἵσταται οὐδʼ ἀπολείπει,
- πρίν γʼ ὅταν ἡβήσωσι τελεσφόρα γυῖα καὶ ἀλκήν,
- ἀλλʼ αἰεὶ ῥυτῆρες ἐπίσκοποι ἐγγὺς ἕπονται.
- οἷον δὴ τότε θαῦμα μετὰ φρεσὶ θηήσαιο
- τερπωλήν τʼ ἐρόεσσαν, ὅτε πλώων ἐσίδηαι
- αὔρῃ ἐν εὐκραεῖ δεδοκημένος ἠὲ γαλήνῃ
- δελφίνων ἀγέλας εὐειδέας, ἵμερον ἅλμης·
- οἱ μὲν γὰρ προπάροιθεν ἀολλέες ἠΰτε κοῦροι
- ἠΐθεοι στείχουσι, νέον γένος, ὥστε χοροῖο
- κύκλον ἀμειβόμενοι πολυειδέα ποικιλοδίνην·
- τοὶ δʼ ὄπιθεν μεγάλοι τε καὶ ἔξοχοι οὐδʼ ἀπάτερθεν
- ἔρχονται τεκέων, φρουρὸς στρατός, ὥσθʼ ἁπαλοῖσι
- φερβομένοις ἕσπονται ἐν εἴαρι ποιμένες ἀμνοῖς.
- ὡς δʼ ὅτε μουσοπόλων ἔργων ἄπο παῖδες ἴωσιν