Electra
Euripides
Euripides. Euripidis Fabulae, Vol. II. Murray, Gilbert, editor. Oxford: Clarendon Press, 1913. (Reprinted 1921-1962)
- ξένοι τινὲς παρʼ οἶκον οἵδʼ ἐφεστίους
- εὐνὰς ἔχοντες ἐξανίστανται λόχου·
- φυγῇ σὺ μὲν κατʼ οἶμον, ἐς δόμους δʼ ἐγὼ
- φῶτας κακούργους ἐξαλύξωμεν ποδί.
- μένʼ, ὦ τάλαινα· μὴ τρέσῃς ἐμὴν χέρα.
- ὦ Φοῖβʼ Ἄπολλον· προσπίτνω σε μὴ θανεῖν.
- ἄλλους κτάνοιμι μᾶλλον ἐχθίους σέθεν.
- ἄπελθε, μὴ ψαῦʼ ὧν σε μὴ ψαύειν χρεών.
- οὐκ ἔσθʼ ὅτου θίγοιμʼ ἂν ἐνδικώτερον.
- καὶ πῶς ξιφήρης πρὸς δόμοις λοχᾷς ἐμοῖς;
- μείνασʼ ἄκουσον, καὶ τάχʼ οὐκ ἄλλως ἐρεῖς.
- ἕστηκα· πάντως δʼ εἰμὶ σή· κρείσσων γὰρ εἶ.
- ἥκω φέρων σοι σοῦ κασιγνήτου λόγους.
- ὦ φίλτατʼ, ἆρα ζῶντος ἢ τεθνηκότος;
- ζῇ· πρῶτα γάρ σοι τἀγάθʼ ἀγγέλλειν θέλω.
- εὐδαιμονοίης, μισθὸν ἡδίστων λόγων.
- κοινῇ δίδωμι τοῦτο νῷν ἀμφοῖν ἔχειν.
- ποῦ γῆς ὁ τλήμων τλήμονας φυγὰς ἔχων;
- οὐχ ἕνα νομίζων φθείρεται πόλεως νόμον.
- οὔ που σπανίζων τοῦ καθʼ ἡμέραν βίου;