Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. tunc ipsam solo reclinem adfata cubili:
  2. ‘Quonam hic usque sopor vacuique modestia lecti,
  3. o mihi Laurentes inter dilecta puellas?
  4. quis morum fideique modus? numquamne virili
  5. summittere iugo? veniet iam tristior aetas.
  6. exerce formam et fugientibus utere donis,
  7. non ideo tibi tale decus vultusque superbos
  8. meque dedi, viduos ut transmittare per annos
  9. ceu non cara mihi. satis o nimiumque priores
  10. despexisse procos, etenim hic tibi sanguine toto
  11. deditus unam omnes inter miratur amatque
  12. nec formae nec stirpis egens, nam docta per urbem
  13. carmina qui iuvenes, quae non didicere puellae?
  14. hunc et bissenos—sic indulgentia pergat
  15. praesidis Ausonii—cernes attollere fasces
  16. ante diem; certe iam nunc Cybeleia movit
  17. limina et Euboicae carmen legit ille Sibyllae,
  18. iamque parens Latius, cuius praenoscere mentem
  19. fas mihi, purpureos habitus iuvenique curule
  20. indulgebit ebur Dacasque—haec [*]() gloria maior—