Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. sidereos artus thalamique egressa superbum
  2. limen Amyclaeos ad frena citavit olores.
  3. iungit Amor laetamque vehens per nubila matrem
  4. geminato temone sedet, iam Thybridis arces
  5. Iliaeae: pandit nitidos domus alta penates
  6. claraque gaudentes plauserunt limina cygni.
  7. digna deae sedes, nitidis nec sordet ab astris.
  8. hic Libycus Phrygiusque silex, hic dura Laconum
  9. saxa virent. hic flexus onyx et concolor alto
  10. vena mari rupesque nitent. quis purpura saepe
  11. Oebalis et Tyrii moderator livet aeni.
  12. pendent innumeris fastigia nixa columnis,
  13. robora Dalmatico lucent satiata metallo.
  14. excludunt radios silvis demissa vetustis
  15. frigora, perspicui vivunt in marmore fontes.
  16. nec servat natura vices: hic Sirius alget,
  17. bruma tepet versumque domus sibi temperat annum.
  18. Exsultat visu tectisque potentis alumnae
  19. non secus alma Venus, quam si Paphon aequore ab alto
  20. Idaliasque domos Erycinaque templa subiret.