Thebais
Statius, P. Papinius (Publius Papinius)
Statius, P. Papinius. Statius, Volumes 1-2. Mozley, John Henry, editor. London: William Heinemann; New York: G.P. Putnam's Sons, 1928.
- ceu leges hominemque novum ritusque sacrorum
- seminaque in vacuas hinc descendentia terras,
- sic sacrasse loco commune animantibus aegris
- confugium, unde procul starent iraeque minaeque
- regnaque, et a iustis Fortuna recederet aris.
- iam tunc innumerae norant altaria gentes:
- huc victi bellis patriaque a sede fugati,
- regnorumque inopes scelerumque errore nocentes
- conveniunt pacemque rogant; mox hospita sedes
- vicit et Oedipodae Furias et funus Olynthi [*]()
- texit et a misero matrem submovit Oreste.
- huc volgo monstrante locum manus anxia Lernae
- deveniunt, cedunt [*]() miserorum turba priorum,
- vix ibi, sedatis requierunt pectora curis:
- ceu patrio super alta grues Aquilone fugatae
- cum videre Pharon; tunc aethera latius implent,
- tunc hilari clangore sonant; iuvat orbe [*]() sereno
- contempsisse nives et frigora solvere Nilo.
- Iamque domos patrias Scythicae post aspera gentis
- proelia laurigero subeuntem Thesea curru