Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Est gloriosus sane convictus deum,
  2. Sed illi qui invitatur, non qui invisus est.
  3. Aras frequentas? nempe abigeris, quom venis.
  4. Reges commemoras et matronarum oscula?
  5. Super etiam iactas tegere quod debet pudor.
  6. Nihil laboras? ideo, cum opus est, nil habes.
  7. Ego granum in hiemem cum studiose congero,
  8. Te circa murum pasci video stercore.
  9. Aestate me lacessis; cum bruma est siles.
  10. Mori contractam cum te cogunt frigora,
  11. Me copiosa recipit incolumem domus.
  12. Satis profecto rettudi superbiam.
  13. Fabella talis hominum discernit notas
  14. Eorum qui se falsis ornant laudibus,
  15. Et quorum virtus exhibet solidum decus.
  1. Quantum valerent inter homines litterae,
  2. Dixi superius: quantus nunc illis honos
  3. A superis sit tributus tradam memoriae.
  4. Simonides idem ille de quo rettuli,
  5. Victori laudem cuidam pyctae ut scriberet