Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Eratque absentis admirator maximus,
  2. Sermone ab ipso cognitum cupidissime
  3. Ad se recepit; veste, nummis, familia
  4. Hominem exornavit. Ceteri tabulam suam
  5. Portant rogantes victum. Quos casu obvios
  6. Simonides ut vidit: Dixi, inquit, mea
  7. Mecum esse cuncta; vos quod rapuistis perit.
  1. Mons parturibat, gemitus immanes ciens,
  2. Eratque in terris maxima exspectatio.
  3. At ille murem peperit. †Hoc scriptum est tibi,
  4. Qui, magna cum minaris, extricas nihil.

    Nihil agere quod non prosit fabella admonet.

  1. Formica et musca contendebant acriter
  2. Quae pluris esset. Musca sic coepit prior:
  3. Conferre nostris tu potes te laudibus?
  4. Moror inter aras, templa perlustro omnia,
  5. Ubi immolatur, exta praegusto deum.
  6. In capite regis sedeo cum visum est mihi,
  7. Et matronarum casta delibo oscula.
  8. Laboro nihil atque optimis rebus fruor.
  9. Quid horum simile tibi contingit, rustica?