Ex Ponto
Ovid
Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).
- tempus adest aptum precibus, valet ille videtque
- quas fecit vires. Roma, valere tuas.
- incolumis [*](incolumi) coniunx sua pulvinaria servat;
- promovet Ausonium filius imperium;
- praeterit ipse suos animo Germanicus annos,
- nec vigor est Drusi nobilitate minor,
- adde nurus [*](nurum ) neptesque pias natosque nepotum
- ceteraque Augustae membra valere domus;
- adde triumphatos modo Paeonas, adde quieti
- subdita montanae brachia Dalmatiae.
- nec dedignata est abiectis Illyris armis
- Caesareum famulo vertice ferre pedem,
- ipse super currum placido spectabilis ore
- tempora Phoebea virgine nexa tulit.
- quem pia vobiscum proles comitavit euntem,
- digna parente suo nominibusque datis,
- fratribus adsimiles, [*](adsimilis) quos proxima templa tenentis
- divus ab excelsa Iulius aede videt.
- his Messalinus, quibus omnia cedere debent,
- primum laetitiae non negat esse locum,