Metamorphoses
Ovid
Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.
- et Minoa, queri. Qui, dum fuit integer aevi,
- terruerat magnas ipso quoque nomine gentes.
- Tunc erat invalidus Deionidenque iuventae
- robore Miletum Phoeboque parente superbum
- pertimuit credensque suis insurgere regnis,
- haud tamen est patriis arcere penatibus ausus.
- Sponte fugis, Milete, tua, celerique carina
- Aegaeas metiris aquas et in Aside terra
- moenia constituis positoris habentia nomen.
- Hic tibi, dum sequitur patriae curvamina ripae,
- filia Maeandri totiens redeuntis eodem
- cognita Cyanee, praestantia corpora forma,
- Byblida cum Cauno, prolem est enixa gemellam.
- Byblis in exemplo est, ut ament concessa puellae:
- Byblis Apollinei correpta cupidine fratris:
- non soror ut fratrem, nec qua debebat, amabat.
- Illa quidem primo nullos intellegit ignes
- nec peccare putat, quod saepius oscula iungat,
- quod sua fraterno circumdet bracchia collo,
- mendacique diu pietatis fallitur umbra.