Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. Non secus ac liquidis Phrygius Maeandrus in undis
  2. ludit et ambiguo lapsu refluitque fluitque
  3. occurrensque sibi venturas adspicit undas,
  4. et nunc ad fontes, nunc ad mare versus apertum
  5. incertas exercet aquas: ita Daedalus implet
  6. innumeras errore vias. Vixque ipse reverti
  7. ad limen potuit: tanta est fallacia tecti.
  8. Quo postquam geminam tauri iuvenisque figuram
  9. clausit, et Actaeo bis pastum sanguine monstrum
  10. tertia sors annis domuit repetita novenis,
  11. utque ope virginea nullis iterata priorum
  12. ianua difficilis filo est inventa relecto,
  13. protinus Aegides rapta Minoide Diam
  14. vela dedit comitemque suam crudelis in illo
  15. litore destituit. Desertae et multa querenti
  16. amplexus et opem Liber tulit; utque perenni
  17. sidere clara foret, sumptam de fronte coronam
  18. inmisit caelo. Tenues volat illa per auras
  19. dumque volat, gemmae nitidos vertuntur in ignes
  20. consistuntque loco specie remanente coronae,