Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. per freta longa trahar.” Vix dixerat, insilit undis
  2. consequiturque rates, faciente cupidine vires,
  3. Gnosiacaeque haeret comes invidiosa carinae.
  4. Quam pater ut vidit (nam iam pendebat in aura
  5. et modo factus erat fulvis haliaeetus alis),
  6. ibat, ut haerentem rostro laceraret adunco.
  7. Illa metu puppim dimisit, et aura cadentem
  8. sustinuisse levis, ne tangeret aequora, visa est.
  9. Pluma fuit: plumis in avem mutata vocatur
  10. ciris, et a tonso est hoc nomen adepta capillo.
  11. Vota Iovi Minos taurorum corpora centum
  12. solvit, ut egressus ratibus Curetida terram
  13. contigit, spoliis decorata est regia fixis.
  14. Creverat opprobrium generis, foedumque patebat
  15. matris adulterium monstri novitate biformis.
  16. Destinat hunc Minos thalamo removere pudorem
  17. multiplicique domo caecisque includere tectis.
  18. Daedalus ingenio fabrae celeberrimus artis
  19. ponit opus turbatque notas et lumina flexu
  20. ducit in errorem variarum ambage viarum.