Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. “me miserum!” dicturus erat: vox nulla secuta est.
  2. Ingemuit: vox illa fuit, lacrimaeque per ora
  3. non sua fluxerunt; mens tantum pristina mansit.
  4. Quid faciat? repetatne domum et regalia tecta
  5. an lateat silvis? pudor hoc, timor impedit illud.
  6. Dum dubitat, videre canes. Primumque Melampus
  7. Ichnobatesque sagax latratu signa dedere,
  8. Gnosius Ichnobates, Spartana gente Melampus.
  9. Inde ruunt alii rapida velocius aura,
  10. Pamphagus et Dorceus et Oribasus, Arcades omnes,
  11. Nebrophonusque valens et trux cum Laelape Theron
  12. et pedibus Pterelas et naribus utilis Agre,
  13. Hylaeusque ferox, nuper percussus ab apro,
  14. deque lupo concepta Nape, pecudesque secuta
  15. Poemenis et natis comitata Harpyia duobus,
  16. et substricta gerens Sicyonius ilia Ladon,
  17. et Dromas et Canache Sticteque et Tigris et Alce
  18. et niveis Leucon et villis Asbolus atris
  19. praevalidusque Lacon et cursu fortis Aello
  20. et Thous et Cyprio velox cum fratre Lycisce,