Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. et nigram medio frontem distinctus ab albo
  2. Harpalos, et Melaneus hirsutaque corpore Lachne,
  3. et patre Dictaeo, sed matre Laconide nati
  4. Labros et Argiodus, et acutae vocis Hylactor,
  5. quosque referre mora est. Ea turba cupidine praedae
  6. per rupes scopulosque adituque carentia saxa,
  7. quaque est difficilis quaque est via nulla, sequuntur.
  8. Ille fugit per quae fuerat loca saepe secutus,
  9. heu famulos fugit ipse suos. Clamare libebat
  10. “Actaeon ego sum, dominum cognoscite vestrum!”
  11. Verba animo desunt: resonat latratibus aether.
  12. Prima Melanchaetes in tergo vulnera fecit,
  13. proxima Therodamas, Oresitrophus haesit in armo:
  14. tardius exierant, sed per compendia montis
  15. anticipata via est. Dominum retinentibus illis,
  16. cetera turba coit confertque in corpore dentes.
  17. Iam loca vulneribus desunt. Gemit ille sonumque,
  18. etsi non hominis, quem non tamen edere possit
  19. cervus habet, maestisque replet iuga nota querellis.
  20. Et genibus pronis supplex similisque roganti