Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. nec sentitur hiems; sunt poma gravantia ramos,
  2. sunt auro similes longis in vitibus uvae,
  3. sunt et purpureae: tibi et has servamus et illas.
  4. Ipsa tuis manibus silvestri nata sub umbra
  5. mollia fraga leges, ipsa autumnalia corna
  6. prunaque, non solum nigro liventia suco,
  7. verum etiam generosa novasque imitantia ceras.
  8. Nec tibi castaneae me coniuge, nec tibi deerunt
  9. arbutei fetus: omnis tibi serviet arbor.
  10. Hoc pecus omne meum est, multae quoque vallibus errant,
  11. multas silva tegit, multae stabulantur in antris.
  12. Nec, si forte roges, possim tibi dicere, quot sint:
  13. pauperis est numerare pecus! De laudibus harum
  14. nil mihi credideris: praesens potes ipse videre,
  15. ut vix circueant distentum cruribus uber.
  16. Sunt, fetura minor, tepidis in ovilibus agni,
  17. sunt quoque, par aetas, aliis in ovilibus haedi.
  18. Lac mihi semper adest niveum: pars inde bibenda
  19. servatur, partem liquefacta coagula durant.
  20. Nec tibi deliciae faciles vulgataque tantum