Truculentus

Plautus, Titus Maccius

Plautus. Plauti Comoediae, Volume 2. Leo, Friedrich, editor. Berlin: Weidmann, 1896.

  1. postquam filiolum peperit, animos sustulit.
  2. nunc quasi mi dicat: nec te iubeo neque voto
  3. intro ire in aedis. at ego nolo, non eo.
  4. ego faxo dicat me in diebus pauculis
  5. crudum virum esse. sequere me hac. verbum sat est.—
Strabax
  1. Rus mane dudum hinc ire me iussit pater,
  2. ut bubus glandem prandio depromerem.
  3. post illoc quam veni, advenit, si dis placet,
  4. ad villam argentum meo qui debebat patri,
  5. qui ovis Tarentínas erat mercatus de patre.
  6. quaerit patrem. dico esse in urbe. interrogo,
  7. quid eum velit ---
  8. homo cruminam sibi de collo detrahit,
  9. minas viginti mihi dat. accipio libens,
  10. condo in cruminam. ille abit. ego propere minas
  11. ovis ín crumina hác in urbem detuli.
  12. fuít edepol Mars meo periratus patri,
  13. nam oves illius hau longe absunt a lupis.
  14. nunc ego istos mundulos urbanos amasios
  15. hoc ictu exponam atque omnis eiciam foras.