Poenulus

Plautus, Titus Maccius

Plautus. Plauti Comoediae, Volume 2. Leo, Friedrich, editor. Berlin: Weidmann, 1896.

  1. divitem audacter solemus mactare infortunio.
  2. nec tibi nos obnoxii sumus istuc, quid tu ames aut oderis:
  3. quom argentum pro capite dedimus, nostrum dedimus, non tuom;
  4. liberos nos esse oportet. nos te nihili pendimus,
  5. ne tuo nos amori servos tuos esse addictos censeas.
  6. liberos homines per urbem modico magis par est gradu
  7. ire, servile esse duco festinantem currere.
  8. praesertim in re populi placida atque interfectis hostibus
  9. non decet tumultuari. sed si properabas magis,
  10. pridie nos te advocatos huc duxisse oportuit.
  11. ne tu opinere, haud quisquam hodie nostrum curret per vias,
  12. neque nos populus pro cerritis insectabit lapidibus.