Scholia in Euripidis Orestem (scholia vetera et scholia recentiora Thomae Magistri, Triclinii, Moschopuli et anonyma)

936.

ἀμύνων

: βοηθῶν. Gr. I.

ὅσιος

: θεμιτός. Gr. δίκαιος καὶ ἀνεύθυνος· ὃ γένοιτ’ ἂν, εἰ ἐμοῦ καταψηφιεῖσθε. Gu.

οὐ φθάνοιτ’ ἄν

: οὐκ ἀρκεσθήσεσθε πρὸς τὸν γυναικῶν φόνον. Ἁλλως. οὐ φθάνοιτε ἀποθνήσκοντες τῷ ἰδίῳ μόρῳ. B.M. I. φθάνω τὸ προλαμβάνω καὶ τὸ καταλαμβάνω, καθὸ λέγεται, οὐκ ἂν φθάνοις εἰς τὸ δικαστήριον ἰὼν καὶ διδοὺς δίκην, ἤγουν οὐκ ἂν ἀρκοίης, οὐκ ἂν καταλαμβάνοις, τουτέστι τοσοῦτόν σε ἕλξουσι συντόμως, ὡς μὴ δύνασθαί σε καταλαμβάνειν τοὺς ἕλκοντας, ἀφ’ οὗ κατὰ μεταφορὰν ἐνταῦθα τὸ οὐκέτ’ ἂν φθάνοιτε θνήσκοντες, τουτέστιν οὐκ ἂν ἀρκοίητε πρὸς τὴν τοῦ θανάτου συντομίαν. οὕτως ὑμᾶς ἕλξει δηλονότι μετὰ ταχυτῆτος. Gr. I. τουτέστιν οὐ προλάβητε ἀλλήλους τῷ θανάτῳ, ὁ μὲν πρόσθεν, ὁ δ’ ἔπειτα θνήσκων, ἀλλ’ ὁμοῦ πάντες οἰχήσεσθε. ἐδήλωσε δὲ ἐνταῦθα τὴν ὑπερβολὴν τοῦ κακοῦ, ὃ γένοιτ’ ἂν, εἰ γυναιξὶν ὁ τῶν ἀνδρῶν φόνος ἀνεύθυνος ἔσται. Gu.