Scholia in Euripidis Orestem (scholia vetera et scholia recentiora Thomae Magistri, Triclinii, Moschopuli et anonyma)
Scholia in Euripidem
Scholia Euripidem. Scholia Graeca in Euripidis Tragoedias, Vol. 2. Dindorf, Wilhelm, editor. Oxford: Oxford University Press, 1863.
805.
ὡς ἀνὴρ ὅστις τρόποισι: ὅστις τρόπῳ καὶ διαθέσει συγκάμνει φίλῳ πολλῶν ἐστι συγγενῶν ἀμείνων πρὸς τὸ εἶναι φίλος. A. B. C. M.I. Ἄλλως. ὡς κρείσσων ἐστὶν ὁ ἀνὴρ ὁ θυραῖος καὶ ξένος ὢν, τοῖς τρόποις δὲ συντακεὶς, ἤγουν ὁμότροπος γενόμενος, κεκτῆσθαι ἤγουν κτηθῆναι φίλος ἀνδρί. κρείσσων δέ τινων μυρίων ὁμαιμόνων καὶ ἀδελφῶν, ἢ κοινῶς εἰπεῖν συγγενῶν. A.
ὡς ἀνὴρ ὅστις τρόποισι συντακῇ: τὸ ὡς ἀντὶ τοῦ ὅτι. τὴ δὲ τρόποισι συντακῇ ἀντὶ τοῦ κατὰ τοὺς τρόπους συμφωνήσῃ, συμβιβασθῆ, δυσαποσπάστως συγκολληθῇ καὶ ἑνωθῇ κατὰ τὰ μέταλλα τὰ ὑπὸ πυρὸς ὁμοῦ τηκόμενα. Gu.
συντακῇ: συναναπλασθῇ. M. συμβιβασθῇ. Gr. συναρμοσθῇ, συνουσιωθῇ, συναναπλησθῇ. Gu.
θυραῖος: ξένος. M. ἀλλότριος. Gr. ξένος καὶ οὐ συγγενής. Gu.