Fall of Troy
Quintus Smyrnaeus
Quintus Smyrnaeus. Fall of Troy. Way, Arthur S., editor. London: W. Heinemann; New York: The Macmillan Co., 1913.
- ἀμφὶ δέ οἱ κρατὸς κόρυν εἵλετο μαρμαίρουσαν
- ἠελίου ἀκτῖσιν ἀλίγκιον ἢ Διὸς· αἴγλῃ·
- τῆς δὲ καὶ ἐν κονίῃσι καὶ αἵματι πεπτηυίης
- ἐξεφάνη ἐρατῇσιν ὑπʼ ὀφρύσι καλά πρόσωπα
- καίπερ ἀποκταμένης. οἱ δʼ, ὡς ἴδον, ἀμφιέποντες
- Ἀργεῖοι θάμβησαν, ἐπεὶ μακάρεσσιν ἐῴκει.
- κεῖτο γὰρ ἐν τεύχεσσι κατὰ χθονὸς ἠΰτʼ ἀτειρὴς
- Ἄρτεμις ὑπνώουσα, Διὸς τέκος, εὖτε κάμῃσι
- γυῖα κατʼ οὔρεα μακρὰ θοοὺς βάλλουσα λέοντας·
- αὐτὴ γάρ μιν ἔτευξε καὶ ἐν φθιμένοισιν ἀγητὴν
- Κύπρις ἐϋστέφανος κρατεροῦ παράκοιτις Ἄρηος,
- ὄφρα τι καὶ Πηλῆος ἀμύμονος υἱ̓͂ ἀκαχήσῃ.
- πολλοὶ δʼ εὐχετόωντο κατʼ οἰκία νοστήσαντες
- τοίης ἧς ἀλόχοιο ταρὰ λεχέεσσιν ἰαῦσαι.
- καὶ δʼ Ἀχιλεὺς ἀλίαστον ἑῷ ἐνετείρετο θυμῷ,
- οὕνεκά μιν κατέπεφνε καὶ οὐκ ἄγε δῖαν ἄκοιτιν
- Φθίην εἰς εὔπωλον, ἐπεὶ μέγεθός τε καὶ εἶδος
- ἔπλετʼ ἀμώμητός τε καὶ ἀθανάτῃσιν ὁμοίη.
- Ἄρεϊ δʼ ἔμπεσε πένθος ὑπὸ φρένας ἀμφὶ θυγατρὸς
- θυμὸν ἀκηχεμένῳ· τάχα δʼ ἔκθορεν Οὐλύμποιο