Prometheus Bound

Aeschylus

Aeschyli Tragoediae. Sidgwick, Arthur, editor. Oxford: Clarendon Press, 1902.

  1. καὶ τήνδε νῦν πόρπασον ἀσφαλῶς, ἵνα
  2. μάθῃ σοφιστὴς ὢν Διὸς νωθέστερος.
Ἥφαιστος
  1. πλὴν τοῦδ᾽ ἂν οὐδεὶς ἐνδίκως μέμψαιτό μοι.
Κράτος
  1. ἀδαμαντίνου νῦν σφηνὸς αὐθάδη γνάθον
  2. στέρνων διαμπὰξ πασσάλευ᾽ ἐρρωμένως.
Ἥφαιστος
  1. αἰαῖ, Προμηθεῦ, σῶν ὑπερστένω[*](ὑποστένω mutatum in ὑπερστένω M) πόνων.
Κράτος
  1. σὺ δ᾽ αὖ κατοκνεῖς τῶν Διός τ᾽ ἐχθρῶν ὕπερ
  2. στένεις; ὅπως μὴ σαυτὸν οἰκτιεῖς ποτε.
Ἥφαιστος
  1. ὁρᾷς θέαμα δυσθέατον ὄμμασιν.
Κράτος
  1. ὁρῶ κυροῦντα τόνδε τῶν ἐπαξίων.[*](τωνδε, ό supra scr. M)
  2. ἀλλ᾽ ἀμφὶ πλευραῖς μασχαλιστῆρας βάλε.
Ἥφαιστος
  1. δρᾶν ταῦτ᾽ ἀνάγκη, μηδὲν ἐγκέλευ᾽ ἄγαν.
Κράτος
  1. ἦ μὴν κελεύσω κἀπιθωύξω γε πρός.
  2. χώρει κάτω, σκέλη δὲ κίρκωσον βίᾳ.
Ἥφαιστος
  1. καὶ δὴ πέπρακται τοὔργον οὐ μακρῷ πόνῳ.
Κράτος
  1. ἐρρωμένως νῦν θεῖνε διατόρους πέδας:
  2. ὡς οὑπιτιμητής γε[*](γε recc. m1: σε M) τῶν ἔργων βαρύς.
Ἥφαιστος
  1. ὅμοια μορφῇ γλῶσσά σου γηρύεται.
Κράτος
  1. σὺ μαλθακίζου, τὴν δ᾽ ἐμὴν αὐθαδίαν
  2. ὀργῆς τε τραχυτῆτα μὴ ᾽πίπλησσέ μοι.