Cynegetica

Oppian of Apamea

Oppian of Apamea. Cynegetica. Mair, A. W., editor. London, William Heinemann, Ltd.; New York: G.P. Putnam's Sons. 1928.

  1. συρικτῇ, τὸν ὄρινεν ἑῆς πάρος ἀτρεμέοντα
  2. ἰοδόκου χειῆς ἀμαλητόμος ἤ τις ἀροτρεύς.
  3. ὣς ὅ γε καγχαλόων ὠκὺς θόρεν· ἢν δὲ τυχήσῃ,
  4. ῥεῖά μιν ὀξυτέροισι δαμασσάμενος ὀνύχεσσι
  5. καὶ γενύεσσιν ἑλὼν φόρτον μέγαν ἀντιάσειεν·[*](ἀντία σεῖο Lobeck.)
  6. ὦκα φέρει μογέων τε βαρυνόμενός τε πελάζει.
  7. οἵη δʼ ἐκ ληΐοιο φέρει θέρος ἀμητοῖο
  8. βριθομένη πυρῷ τε μετʼ αὔλιον εἶσιν ἀπήνη,
  9. τὴν δʼ ἐσιδόντες ὄρουσαν ἀολλέες ἀγροιῶται,
  10. πρόπροθι δʼ ἀντήσαντες ὁ μὲν κύκλοισιν ἐρείδει,
  11. ἄλλος ὑπερτερίην, ὁ δʼ ἄρʼ ἄξονα βουσὶν ἀρήγων·
  12. εἰς αὖλιν δὲ μολόντες ἐλύσανθʼ ἱστοβοῆα,
  13. ταῦροι δʼ ἱδρώοντες ἀνέπνευσαν καμάτοιο,
  14. θυμὸς δʼ ἠπεδανοῦ μέγʼ ἐχήρατο βουπελάταο·
  15. ὣς ὁ μὲν ἱκνεῖται φόρτον γενύεσσιν ἀγινῶν.
  16. αὐτὰρ ὅ γʼ ἀντιάᾳ κεχαρημένος ὠκὺς ἐπακτήρ,
  17. ἄμφω δʼ ἀείρας ἀπὸ μητέρος ὑψόθι γαίης,
  18. κόλποισιν θέτο θῆρα καὶ αὐτὸν θηροφονῆα.