Halieutica
Oppian
Oppian. Halieutica. Mair, A. W., editor. London, William Heinemann, Ltd.; New York: G.P. Putnam's Sons. 1928.
- ἑλκόμενος· τὸν μέν τις ἰδὼν προφυγόντα θαλάσσης
- ἄμφω γηθήσειε καὶ οἰκτείρων ἀκάχοιτο·
- ὧδε γὰρ ἠπεδανοῖσι παριεμένου μελέεσσι
- δείματι καὶ καμάτῳ θυμαλγέϊ γυῖα λέλυνται.
- πολλάκι δʼ ἐχθίστης τε τυχὼν καὶ ἀπηνέος ἄγρης
- ἅλμενος ἐς πόντοιο βαθὺν πόρον οὐκέτʼ ἀνέσχε,
- δύσμορος, ἀντιάσας δυσδερκέϊ θηρὶ πελώρῳ·
- καί ῥʼ ὁ μὲν οἷς ἑτάροισιν ἐπισείων θαμὰ δεσμὸν
- κέκλεται αὖ ἐρύειν, τὸ δέ οἱ δέμας ἡμιδάϊκτον
- κητείη τε βίη καὶ ὁμόστολοι ἔσπασαν ἄνδρες,
- οἰκτρὸν ἰδεῖν, ἔτι νηὸς ἐφιέμενον καὶ ἑταίρων·
- οἱ δὲ θοῶς κεῖνόν τε πόρον καὶ λυγρὸν ἄεθλον
- ἀχνύμενοι λείπουσι καὶ ἐς χέρσον κατάγονται
- λείψανα δυστήνοιο περικλαίοντες ἑταίρου.
- Τόσσʼ ἐδάην, σκηπτοῦχε διοτρεφές, ἔργα θαλάσσης.
- σοὶ δʼ αἰεὶ νῆες μὲν ἀπήμονες ἰθύνοιντο,
- πεμπόμεναι λιαροῖσι καὶ ἰθυπόροισιν ἀήταις,
- αἰεὶ δʼ ἰχθυόεσσα περιπλήθοιτο θάλασσα,
- γαίης δʼ ἀστυφέλικτα Ποσειδάων ἐρύοιτο
- Ἀσφάλιος ῥιζοῦχα θεμείλια νέρθε φυλάσσων.