Frogs

Aristophanes

Aristophanes. Aristophanis Comoediae, Vol. 2. Hall, F. W. and Geldart, William M., editors. Oxford: Clarendon Press, 1907.

  1. ἀλλʼ ἐχρῆν τι δρᾶν.
Πανδοκευτρία
  1. ἴθι δὴ κάλεσον τὸν προστάτην Κλέωνά μοι.
Πλαθάνη
  1. σὺ δʼ ἔμοιγʼ ἐάνπερ ἐπιτύχῃς Ὑπέρβολον,
  2. ἵνʼ αὐτὸν ἐπιτρίψωμεν.
Πανδοκευτρία
  1. ὦ μιαρὰ φάρυξ,
  2. ὡς ἡδέως ἄν σου λίθῳ τοὺς γομφίους
  3. κόπτοιμʼ ἄν, οἷς μου κατέφαγες τὰ φορτία.
Πλαθάνη
  1. ἐγὼ δέ γʼ ἐς τὸ βάραθρον ἐμβάλοιμί σε.
Πανδοκευτρία
  1. ἐγὼ δὲ τὸν λάρυγγʼ ἂν ἐκτέμοιμί σου
  2. δρέπανον λαβοῦσʼ, ᾧ τὰς χόλικας κατέσπασας.
Πλαθάνη
  1. ἀλλʼ εἶμʼ ἐπὶ τὸν Κλέωνʼ, ὃς αὐτοῦ τήμερον
  2. ἐκπηνιεῖται ταῦτα προσκαλούμενος.
Διόνυσος
  1. κάκιστʼ ἀπολοίμην, Ξανθίαν εἰ μὴ φιλῶ.
Ξανθίας
  1. οἶδʼ οἶδα τὸν νοῦν· παῦε παῦε τοῦ λόγου.
  2. οὐκ ἂν γενοίμην Ἡρακλῆς ἄν.
Διόνυσος
  1. μηδαμῶς
  2. ὦ Ξανθίδιον.
Ξανθίας
  1. καὶ πῶς ἂν Ἀλκμήνης ἐγὼ
  2. υἱὸς γενοίμην δοῦλος ἅμα καὶ θνητὸς ὤν;
Διόνυσος
  1. οἶδʼ οἶδʼ ὅτι θυμοῖ, καὶ δικαίως αὐτὸ δρᾷς·