Birds

Aristophanes

Aristophanes. Aristophanis Comoediae, Vol. 1. Hall, F. W. and Geldart, William M., editors. Oxford: Clarendon Press, 1906.

  1. Ἐπικεχοδὼς ἔγωγε Φασιανικός.
Ἐυελπίδης
  1. ἀτὰρ σὺ τί θηρίον ποτʼ εἶ πρὸς τῶν θεῶν;
Θεράπων Ἔποπος
  1. ὄρνις ἔγωγε δοῦλος.
Ἐυελπίδης
  1. ἡττήθης τινὸς
  2. ἀλεκτρυόνος;
Θεράπων Ἔποπος
  1. οὐκ ἀλλʼ ὅτε περ ὁ δεσπότης
  2. ἔποψ ἐγένετο, τότε γενέσθαι μʼ ηὔξατο
  3. ὄρνιν, ἵνʼ ἀκόλουθον διάκονόν τʼ ἔχῃ.
Ἐυελπίδης
  1. δεῖται γὰρ ὄρνις καὶ διακόνου τινός;
Θεράπων Ἔποπος
  1. οὗτός γʼ, ἅτʼ οἶμαι πρότερον ἄνθρωπός ποτʼ ὤν,
  2. τοτὲ μὲν ἐρᾷ φαγεῖν ἀφύας Φαληρικάς·
  3. τρέχω ʼπʼ ἀφύας λαβὼν ἐγὼ τὸ τρύβλιον.
  4. ἔτνους δʼ ἐπιθυμεῖ, δεῖ τορύνης καὶ χύτρας·
  5. τρέχω ʼπὶ τορύνην.
Ἐυελπίδης
  1. τροχίλος ὄρνις οὑτοσί.
  2. οἶσθʼ οὖν ὃ δρᾶσον ὦ τροχίλε; τὸν δεσπότην
  3. ἡμῖν κάλεσον.
Θεράπων Ἔποπος
  1. ἀλλʼ ἀρτίως νὴ τὸν Δία
  2. εὕδει καταφαγὼν μύρτα καὶ σέρφους τινάς.
Ἐυελπίδης
  1. ὅμως ἐπέγειρον αὐτόν.