Birds
Aristophanes
Aristophanes. Aristophanis Comoediae, Vol. 1. Hall, F. W. and Geldart, William M., editors. Oxford: Clarendon Press, 1906.
- τούτων περὶ πάντων αὐτοκράτορες ἥκομεν.
- ἀλλʼ οὔτε πρότερον πώποθʼ ἡμεῖς ἤρξαμεν
- πολέμου πρὸς ὑμᾶς, νῦν τʼ ἐθέλομεν, εἰ δοκεῖ,
- ἐάν τι δίκαιον ἀλλὰ νῦν ἐθέλητε δρᾶν,
- σπονδὰς ποιεῖσθαι. τὰ δὲ δίκαιʼ ἐστὶν ταδί,
- τὸ σκῆπτρον ἡμῖν τοῖσιν ὄρνισιν πάλιν
- τὸν Δίʼ ἀποδοῦναι· κἂν διαλλαττώμεθα
- ἐπὶ τοῖσδε, τοὺς πρέσβεις ἐπʼ ἄριστον καλῶ.
- ἐμοὶ μὲν ἀπόχρη ταῦτα καὶ ψηφίζομαι.
- τί ὦ κακόδαιμον; ἠλίθιος καὶ γάστρις εἶ.
- ἀποστερεῖς τὸν πατέρα τῆς τυραννίδος;
- ἄληθες; οὐ γὰρ μεῖζον ὑμεῖς οἱ θεοὶ
- ἰσχύσετʼ, ἢν ὄρνιθες ἄρξωσιν κάτω;
- νῦν μέν γʼ ὑπὸ ταῖς νεφέλαισιν ἐγκεκρυμμένοι
- κύψαντες ἐπιορκοῦσιν ὑμᾶς οἱ βροτοί·
- ἐὰν δὲ τοὺς ὄρνις ἔχητε συμμάχους,
- ὅταν ὀμνύῃ τις τὸν κόρακα καὶ τὸν Δία,
- ὁ κόραξ παρελθὼν τοὐπιορκοῦντος λάθρᾳ
- προσπτόμενος ἐκκόψει τὸν ὀφθαλμὸν θενών.
- νὴ τὸν Ποσειδῶ ταῦτά γέ τοι καλῶς λέγεις.