Wasps

Aristophanes

Aristophanes. Aristophanis Comoediae, Vol. 1. Hall, F. W. and Geldart, William M., editors. Oxford: Clarendon Press, 1906.

  1. ἐρᾷ τε τούτου, τοῦ δικάζειν, καὶ στένει
  2. ἢν μὴ ʼπὶ τοῦ πρώτου καθίζηται ξύλου.
  3. ὕπνου δʼ ὁρᾷ τῆς νυκτὸς οὐδὲ πασπάλην.
  4. ἢν δʼ οὖν καταμύσῃ κἂν ἄχνην, ὅμως ἐκεῖ
  5. ὁ νοῦς πέτεται τὴν νύκτα περὶ τὴν κλεψύδραν.
  6. ὑπὸ τοῦ δὲ τὴν ψῆφόν γʼ ἔχειν εἰωθέναι
  7. τοὺς τρεῖς ξυνέχων τῶν δακτύλων ἀνίσταται,
  8. ὥσπερ λιβανωτὸν ἐπιτιθεὶς νουμηνίᾳ.
  9. καὶ νὴ Δίʼ ἢν ἴδῃ γέ που γεγραμμένον
  10. υἱὸν Πυριλάμπους ἐν θύρᾳ Δῆμον καλόν,
  11. ἰὼν παρέγραψε πλησίον κημὸς καλός.
  12. τὸν ἀλεκτρυόνα δʼ, ὃς ᾖδʼ ἀφʼ ἑσπέρας, ἔφη
  13. ὄψʼ ἐξεγείρειν αὐτὸν ἀναπεπεισμένον,
  14. παρὰ τῶν ὑπευθύνων ἔχοντα χρήματα.
  15. εὐθὺς δʼ ἀπὸ δορπηστοῦ κέκραγεν ἐμβάδας,
  16. κἄπειτʼ ἐκεῖσʼ ἐλθὼν προκαθεύδει πρῲ πάνυ,
  17. ὥσπερ λεπὰς προσεχόμενος τῷ κίονι.
  18. ὑπὸ δυσκολίας δʼ ἅπασι τιμῶν τὴν μακρὰν
  19. ὥσπερ μέλιττʼ ἢ βομβυλιὸς εἰσέρχεται
  20. ὑπὸ τοῖς ὄνυξι κηρὸν ἀναπεπλασμένος.