Wasps
Aristophanes
Aristophanes. Aristophanis Comoediae, Vol. 1. Hall, F. W. and Geldart, William M., editors. Oxford: Clarendon Press, 1906.
- ἐλέησον καὶ σῶσον νυνὶ τὸν σαυτοῦ πλησιόχωρον·
- κοὐ μή ποτέ σου παρὰ τὰς κάννας οὐρήσω μηδʼ ἀποπάρδω.
- οὗτος ἐγείρου.
- τί τὸ πρᾶγμʼ;
- ὥσπερ φωνή μέ τις ἐγκεκύκλωται.
- μῶν ὁ γέρων πῃ διαδύεται αὖ;
- μὰ Δίʼ οὐ δῆτʼ, ἀλλὰ καθιμᾷ
- αὑτὸν δήσας.
- ὦ μιαρώτατε τί ποιεῖς; οὐ μὴ καταβήσει;
- ἀνάβαινʼ ἀνύσας κατὰ τὴν ἑτέραν καὶ ταῖσιν φυλλάσι παῖε,
- ἤν πως πρύμνην ἀνακρούσηται πληγεὶς ταῖς εἰρεσιώναις.
- οὐ ξυλλήψεσθʼ ὁπόσοισι δίκαι τῆτες μέλλουσιν ἔσεσθαι,
- ὦ Σμικυθίων καὶ Τεισιάδη καὶ Χρήμων καὶ Φερέδειπνε;
- πότε δʼ, εἰ μὴ νῦν, ἐπαρήξετέ μοι, πρίν μʼ εἴσω μᾶλλον ἄγεσθαι;
- εἰπέ μοι τί μέλλομεν κινεῖν ἐκείνην τὴν χολήν,
- ἥνπερ, ἡνίκʼ ἄν τις ἡμῶν ὀργίσῃ τὴν σφηκιάν;
- νῦν ἐκεῖνο νῦν ἐκεῖνο
- τοὐξύθυμον, ᾧ κολαζόμεσθα,
- κέντρον †ἐντέτατʼ ὀξύ†.
- ἀλλὰ θαἰμάτια βαλόντες ὡς τάχιστα, παιδία,