Clouds
Aristophanes
Aristophanes. Aristophanis Comoediae, Vol. 1. Hall, F. W. and Geldart, William M., editors. Oxford: Clarendon Press, 1906.
- ἄγε δὴ τί βούλει πρῶτα νυνὶ μανθάνειν
- ὧν οὐκ ἐδιδάχθης πώποτʼ οὐδέν; εἰπέ μοι.
- πότερα περὶ μέτρων ἢ περὶ ἐπῶν ἢ ῥυθμῶν;
- περὶ τῶν μέτρων ἔγωγʼ· ἔναγχος γάρ ποτε
- ὑπʼ ἀλφιταμοιβοῦ παρεκόπην διχοινίκῳ.
- οὐ τοῦτʼ ἐρωτῶ σʼ, ἀλλʼ ὅ τι κάλλιστον μέτρον
- ἡγεῖ· πότερα τὸ τρίμετρον ἢ τὸ τετράμετρον;
- ἐγὼ μὲν οὐδὲν πρότερον ἡμιεκτέου.
- οὐδὲν λέγεις ὦνθρωπε.
- περίδου νυν ἐμοί,
- εἰ μὴ τετράμετρόν ἐστιν ἡμιεκτέον.
- ἐς κόρακας, ὡς ἄγροικος εἶ καὶ δυσμαθής.
- ταχύ γʼ ἂν δύναιο μανθάνειν περὶ ῥυθμῶν.
- τί δέ μʼ ὠφελήσουσʼ οἱ ῥυθμοὶ πρὸς τἄλφιτα;
- πρῶτον μὲν εἶναι κομψὸν ἐν συνουσίᾳ,
- ἐπαΐονθʼ ὁποῖός ἐστι τῶν ῥυθμῶν
- κατʼ ἐνόπλιον, χὠποῖος αὖ κατὰ δάκτυλον.
- κατὰ δάκτυλον; νὴ τὸν Δίʼ, ἀλλʼ οἶδʼ.
- εἰπὲ δή.
- τίς ἄλλος ἀντὶ τουτουὶ τοῦ δακτύλου;