Clouds
Aristophanes
Aristophanes. Aristophanis Comoediae, Vol. 1. Hall, F. W. and Geldart, William M., editors. Oxford: Clarendon Press, 1906.
- τοῖς ἐκ Πύλου ληφθεῖσι τοῖς Λακωνικοῖς.
- ἀτὰρ τί ποτʼ ἐς τὴν γῆν βλέπουσιν οὑτοιί;
- ζητοῦσιν οὗτοι τὰ κατὰ γῆς.
- βολβοὺς ἄρα
- ζητοῦσι. μή νυν τουτογὶ φροντίζετε·
- ἐγὼ γὰρ οἶδʼ ἵνʼ εἰσὶ μεγάλοι καὶ καλοί.
- τί γὰρ οἵδε δρῶσιν οἱ σφόδρʼ ἐγκεκυφότες;
- οὗτοι δʼ ἐρεβοδιφῶσιν ὑπὸ τὸν Τάρταρον.
- τί δῆθʼ ὁ πρωκτὸς ἐς τὸν οὐρανὸν βλέπει;
- αὐτὸς καθʼ αὑτὸν ἀστρονομεῖν διδάσκεται.
- ἀλλʼ εἴσιθʼ, ἵνα μὴ ʼκεῖνος ὑμῖν ἐπιτύχῃ.
- μήπω γε μήπω γʼ· ἀλλʼ ἐπιμεινάντων, ἵνα
- αὐτοῖσι κοινώσω τι πραγμάτιον ἐμόν.
- ἀλλʼ οὐχ οἷόν τʼ αὐτοῖσι πρὸς τὸν ἀέρα
- ἔξω διατρίβειν πολὺν ἄγαν ἐστὶν χρόνον.
- πρὸς τῶν θεῶν τί γὰρ τάδʼ ἐστίν; εἰπέ μοι.
- ἀστρονομία μὲν αὑτηί.
- τουτὶ δὲ τί;
- γεωμετρία.
- τοῦτʼ οὖν τί ἐστι χρήσιμον;